Kigali: Igishushanyo mbonera kiratanga amahirwe yo kuwuturamo ku bantu bose

Yanditswe na Sezibera Anselme

Ku ya 21-11-2019 saa 15:54:39
Umutoni Gatsinzi Nadine, umuyobozi wungirije w'Umujyi wa Kigali ushinzwe ubukungu n'imibereho myiza avuga ku gishushanyo mbonera(Foto Sezibera A)

Ubuyobozi bw’umujyi wa Kigali burahamya ko igishushanyo mbonera cyawo kivuguruye giherutse gushyirwa ahagaragara gitanga amahirwe kuri buri wese yo kuwuturamo kandi mu buryo bunoze

Ibyo byatangajwe kuri uyu wa 21 Ugushyingo 2019 ubwo hafungurwa amahugurwa y’iminsi 2 yagenewe abayobozi b’imidugugu ndetse n’abanyamabanga nshingwabikorwa b’utugari bose bagize uturere 3 tw’Umujyi wa Kigali kugira ngo bongererwe ubumenyi bugamije gutanga serivisi zinoze ku baturage.

Umuyobozi w’Umujyi wa Kigali wungirije ushinzwe ubukungu n’imibereho myiza Umutoni Gatsinzi Nadine avuga ko icyo gishushanyo mbonera kivuguruye kiganisha ku kerekezo uwo mugi ufite wo kuba utuwemo n’abantu b’amikoro bose.

Ati: “Icyo gishushanyo kizaba kigaragaza n’aho abantu b’amikoro makeya babasha gutura mu mugi wa Kigali kuko hari na gahunda yo gukoresha ibikoresho biciriritse mu kubaka bifite aho byagenewe. Icyo gishushanyo twakiganiriyeho n’ubwo kitari cyasohoka kumugaragaro ariko uburyo cyateguwe cyanakozwe kikanagezwa ku baturage ariyo mpamvu twahuye n’abayobozi b’ibanze kugira ngo batangire bategure abaturage banabaganiriza uko kizaba kimeze.

Icyo gishushanyo gifasha abaturage bose kandi kizanafasha izi karitsiye zitari zubatse neza kugira ngo harebwe uburyo bwo kuzigezaho ibikorwa remezo abantu batimutse cyangwa bakaba batura neza ariko batavuye mu mugi”.

Umutoni akomeza asobanura ko ibikorwa bitandukanye byo gukoresha ubutaka bikomeza gukorwa hakurikijwe igishushanyo mbonera gisanzweho kuko igishya kitari cyasohoka ku mugaragaro.

Ati: “Nta bwo twahagaritse ubwubatsi n’ibindi bikorwa bitandukanye gusa tubasaba kutugana bakatugisha inama kugira ngo igishushanyo gisanzwe n’igishya kitaba cyagira uwo gihungabanya”.

Umutoni kandi asubiza ku kibazo cy’abavuga ko kubona ibyangombwa by’ubutaka byaba bitinda bigatuma hari abubaka mu kajagari, avuga ko Atari byo ahubwo bisaba kuba hari ibyo umuntu agomba kuba yujuje.

Ati: “Nta bwo bitinda kuko hari icyo bisaba ubyifuza, kandi n’abariya bubaka mu kajagari hari ubwo usanga batarabisabye ahubwo ugasanga bafite uko bashaka kubaka biyumvisha neza ubwabo ko bidashobora kwemerwa. Ingamba zihari ni uko dushaka ko abayobozi bose babikurikirana bakabyitaho umunsi ku wundi, umuyobozi ku karere ntabe ariwe uzaza kubona ayo makosa nyamara hari inzego zegereye abo baturage umunsi ku wundi.”

Abayobozi b’imidugudu n’ab’utugari bigize umujyi wa Kigali bagaragarijwe imiterere y’igishushanyombonera cy’umujyi kivuguruye(Foto Sezibera A)

Umutoni avuga ko hari n’aho usanga abo bubaka mu kajagari babitewe na ruswa bashobora guha umwe mu bayobozi akaba ariyo mpamvu bifuza ko ibyo byacika, uwubatse mu kajagari asenyerwe ndetse n’umuyobozi wabimufashijemo abibazwe.

Nk’uko abishimangira icyo gishushanyo kizafasha gutuza abaturage neza hirindwa akajagari nk’uko hari aho byagiye bikorwa ahahoze amanegeka, abatuye ahameze nabi kurusha ahandi baraganirizwa ndetse batanga ubutaka bwabo buguranishwa kubatuza mu mudugudu wa Karama ufite byose.

Atangaza ko Kigali igomba kuba umugi ubereye iterambere ryifuzwa, ukaba uw’ikitegererezo mu karere no muri Afurika. Yahamagarariye abo bayobozi b’ibanze kurwanya no guhagarika ibikorwa byo kubaka mu kajagari byongeye kugaragara kuko aribo babasha kuba bari kumwe n’abaturage umunsi ku wundi.

Muri rusange igishushanyo mbonera kiriho kandi gifite ikerekezo kirekire ari nako kigenda kivugururwa bitewe n’ibyifuzo by’abaturage.

Umukozi w’Umujyi wa Kigali ushinzwe ishyirwa mu bikorwa ry’igishushanyo mbonera Rukundo Benon, avuga ko ibiganiro ku gishushanyo mbonera kivuguruye biri gukorwa, bigamije gushishikariza abantu kukimenya ngo kitazagira uwo gitungura kandi banasobanurirwe ibirimo ndetse n’ingamba nyinshi zikirimo.

Ati: “Tugamije kubagaragariza uburyo bwinshi buhari bwo kugishyira mu bikorwa, hari ukubereka itandukaniro ry’igishya n’icya 2013 kugira ngo nikijya ahagaragara bye kuzatungurana kandi bazabe bazi ibigikubiyemo.

Mu bishya biri muri icyo gishushanyo mbonera gishya harimo inyito nshyashya zitabaga mucyari kiriho mu 2013, hakabamo ikomatanyabikorwa ku mikoreshereze y’ubutaka ritari ririho mu myaka yashize, kuko kizafasha mu guha abaturage gukora ibikorwa byinshi bitandukanye  byaba ubucuruzi, gutura n’ibindi bitahungabanya abatuye muri karitsiye, bidahuye n’ibyemerwaga muri 2013.

Rukundo avuga ko abantu b’amikoro makeya na bo batekerejweho muri icyo gishushanyo mbonera kuko kibaha uburenganzira bwo gukora ibiri mu bushobozi bwabo. Ati: “Kuri ubu umuntu yemerewe kuzaba yubaka umuryango umwe yaba atuyemo hamwe n’umuryango we indi miryango 5 isabwa n’ibiteganywa n’icyo gishushanyo mbonera akazaba ayubaka uko agenda abona ubushobozi, mbere ntibyashobokaga”.

Nk’uko na we abishimangira hazagenda hafashwa abatuye mu tujagari kugira ngo bavugurure imiturire yabo aho kugira ngo bajyanwe ahandi. Icyo gihe bazahabwa nk’ibikorwa remezo ndetse nabo basabwe kwigomwa metero zishobora kubinyuzwamo hanyuma bahabwe uburenganzira bwo gusana cyangwa bavugurura imiturire yabo uko ubushobozi buboneka.

Rukundo kandi avuga ko banateganya gufasha abafite ibibanza mu mujyi wa Kigali ariko babuze ubushobozi bwo kubyubaka, aho bazemererwa kubaka mu byiciro cyangwa se bakagirwa inama zo kwifatanya bakishyira hamwe n’abandi mu gushyira mu bikorwa imishinga yabo.

Avuga ko abafite ubutaka bunini bashobora kugurisha igice kimwe ikindi gisigaye nawe akacyubaka yifashishije ayo mafaranga yishyuwe.

Ubuyobozi bw’umujyi butangaza ko igishushanyo mbonera kivuguruye giteganywa gushyirwa hanze mu mpera za 2019 nyuma yo kugitegura, gukurikiza ibisabwa byose ngo kemezwe.

Umwanditsi:

Sezibera Anselme

Tanga Igitekerezo

Email yanyu ntigaragazwa ku rubuga. Amazina na Email ni ngombwa.