19°C , Partly cloudy | Kigali-Rwanda
Abaminisitiri n'abayobozi bashinzwe ubucuruzi mpuzamahanga muri Afurika, bemeranyijwe ko hazajyaho isoko rimwe ry'Afurika

Kigali: Ibihugu by’Afurika byemeranyijwe guhuza isoko

Yanditswe na KAYITARE JEAN PAUL

Ku ya 12-03-2018 saa 05:20:29

Inama yahuzaga abaminisitiri bayoboye za Minisiteri zifite mu nshingano ubucuruzi mu bihugu by’Afurika, yasoje bemeranyijwe ko buri gihugu cyose cy’Afurika kiteguye gusinya amasezerano yo gushyiraho isoko rimwe kugira ngo ubucuruzi bukorwa hagati y’ibihugu by’Afurika bwiyongere buve kuri 15%, ikegereranyo abitabiriye inama bose bahurizaho ko ubucuruzi muri Afurika bukiri hasi cyane.

Abaminisitiri n’abayobozi bashinzwe ubucuruzi mpuzamahanga muri Afurika, bemeranyijwe ko hazajyaho isoko rimwe ry’Afurika

Minisitiri w’Inganda, Ubucuruzi n’Ishoramari muri Nigeria, Dr. Okechukwu E. Enelamah, avuga ko buri gihugu cy’Afurika gikwiye gusinya amasezerano yo gushyiraho isoko rimwe ry’Afurika kuko ngo bigaragara ko ubucuruzi buri hasi cyane.

Ati “Icyo twese twemeranyijwe kandi kiza ni uko ibihugu byose byemeye ko byiteguye gusinya kuri aya masezerano, n’abatazahita basinya bazasinya nyuma yo kuvugana n’Inteko Ishinga Amategeko zo mu bihugu byabo. Nta kizatubuza gusinya kuko nk’uko mubizi ubucuruzi hagati y’ibihugu by’Afurika buri 15%, dukeneye kubuzamura kandi bizakunda cyane.”

Mu izina ry’abayobozi bakuru bashinzwe ubucuruzi bwo hanze y’igihugu byabo muri za minisiteri bakorera, Assome Aminata Diatta, Umuyobozi Mukuru ushinzwe ubucuruzi bwo hanze muri Minisiteri y’Ubucuruzi mu gihugu cya Senegal, na we yashimangiye ko aya masezerano aziye igihe kandi ko ubucuruzi bw’Afurika hagati y’ibihugu byayo buzihuta. Yagize ati “Ntawashidikanya ko aya masezerano atazateza imbere Umugabane w’Afurika kuko dufite byinshi twahahirana hagati yacu, tukava kuri 15% tukajya hejuru ya 50%.”

Komiseri ushinzwe ubucuruzi n’inganda mu muryango w’Afurika Yunze Ubumwe (AU), Ambasaderi Albert M. Muchanga, avuga ko amasezerano yo gushyiraho isoko rimwe ry’Afurika (AFCFTA) kimwe no kuritangiza ku mugaragaro bizaba bigamije kongera ubukungu bw’Umugabane w’Afurika, guteza imbere inganda, gutanga imirimo kuri buri wese ntawitaye ku bava hanze y’uyu mugabane, guhagarika ingendo z’urubyiruko zijya mu yindi migabane.

Twizeye Alice ushinzwe ubucuruzi mpuzamahanga muri Minisiteri y’Ubucuruzi n’Inganda mu Rwanda, yagize ati “Impamvu nyamukuru y’iyi nama ni ukugira ngo ibihugu by’Afurika bizahahirane hatariho imbogamizi, zaba izishingiye ku misoro n’amahoro, cyangwa ari imbogamizi zidashingiye ku misoro n’amahoro, bivuze ko ubucuruzi hagati y’Afurika ubwayo biramutse bigenze bitya ubucuruzi bwakwiyongera kuko buri hasi ugereranyije nuko Afurika icuruzanya n’ibindi bihugu bitari iby’Afurika.”

I Kigali hateganyijwe inama y’Abakuru b’ibihugu na za Guverinoma izaba tariki ya 21 Werurwe 2018, ikazaba igamije isinywa ry’amasezerano yo kwemeza isoko rimwe hagati y’ibihugu by’Afurika.

TANGA IGITEKEREZO

Leave a Reply

Be the First to Comment!

avatar