17°C , Partly cloudy | Kigali-Rwanda

Kigali: Hatewe intambwe ikomeye mu ngengo y’imari irimo gusozwa

Yanditswe na Kayira Etienne

Ku ya 14-06-2019 saa 16:46:41
Umuyobozi w'Umujyi wa Kigali Rwakazina Marie Chantal afungura inteko rusange y'Umujyi wa Kigali (Foto CoK)

Umuyobozi w’Umujyi wa Kigali Rwakazina Marie Chantal, yatangaje ko mu ngengo y’imari y’umwaka wa 2018-2019, muri Kigali bateye intambwe ikomeye mu bikorwa remezo, mu mibereho myiza y’abaturage no mu miyoborere.

Yabitangarije Inteko rusange y’Umujyi wa Kigali yanitabiriwe na Minisitiri w’Ubutegetsi bw’Igihugu Prof. Shyaka Anastase, mu gikorwa ngarukamwaka cyo kugeza ku bafatanyabikorwa ibyagezweho mu mihigo y’uyu mwaka ugiye gusozwa n’ibiteganyijwe kuzakorwa mu gihe gikurikiraho.

Muri iyo Nteko rusange ihuza abavuye mu turere 3 ari two, Gasabo, Kicukiro na Nyarugenge, Meya w’Umujyi wa Kigali Rwakazina yagize ati “Nk’uko musanzwe mubizi, Inteko y’Umujyi wa Kigali iba rimwe mu mwaka. Ni igihe kiza ubuyobozi bw’Umujyi wa Kigali bugeza ku bafatanyabikorwa bawo ibimaze kugerwaho n’ibitegenywa mu gihe kizaza. Twungurana ibitekerezo kuri gahunda ziteza imbere umugi wacu, ndetse tukanafatira hamwe ingamba nk’abayobozi kugira ngo iterambere ry’Umujyi wa Kigali n’abawutuye byihute, ndetse na serivise duha abaturage zirusheho kunozwa.”

Meya Rwakazina yakomeje agira ati “Uyu mwaka w’ingengo y’imari wa 2018-2019 dusoje, wabaye umwaka twateye intambwe ikomeye yaba mu kubaka ibikorwa remezo, mu mibereho myiza y’abaturage ndetse no mu miyoborere. Ni muri uyu mwaka kandi hatangijwe gahunda yo kuvugurura itegeko rigenga Umujyi wa Kigali, nk’uko tubisabwa n’Itegeko Nshinga. Ni muri uyu mwaka nanone twakozemo igikorwa cyo kuvugurura igishushanyombonera cy’Umujyi wa Kigali”.

Umuyobozi w’Umujyi wa Kigali Rwakazina Marie Chantal afungura inteko rusange y’Umujyi wa Kigali (Foto CoK)

Ayo mavugurura ngo yashingiye ku byifuzo by’abaturage byo kugira umugi umwe utera imbere ku buryo bunoze, nk’uko ngo ari yo ntego ubuyobozi bwa Kigaki bufite, yo gushyira umuturage imbere mu bimukorerwa kandi abigizemo uruhare.

Muri gahunda ziteganyijwe gukorwa mu ngengo y’imari y’umwaka utaha wa 2019-2020, Umuyobozi w’Umujyi wa Kigali Rwakazina yagarutse ku gikorwa kimwe rukumbi.

Ati “Muri gahunda ziteganyijwe, nifuje kuvugamo imwe muri gahunda nyinshi turi buganireho birushijeho. Iyo ni gahunda yo gukora imihanda mu midugudu aho dutuye. Ni gahunda dufatanyije na Minisiteri y’Ibikorwa Remezo. Iyo gahunda turacyariho turayinoza, ariko twifuza gutangira kuyishyira mu bikorwa umwaka utaha. Tuzahera aho byagaragaye ko abaturage batangiye kwishyira hamwe, bakegeranya inkunga yabo bagira uruhare muri iki gikorwa gishimwa kandi kifuzwa natwe twese.”

Yaba imihigo y’umwaka ushize yaba n’iy’umwaka utaha, Meya Rwakazina yabwiye abari bitabiriye inteko ko, ngo ibyo bikorwa byose bigamije gushyira Umujyi wa Kigali mu kerekezo cyo kuba intangarugero muri Afurika no kuzamura u Rwanda rukagera ku rugero rushimwa n’Isi yose.

Minisitiri w’Ubutegetsi bw’Igihugu, Prof. Shyaka Anastase, na we yashimye ibikorwa by’iterambere byihuse ngo yabonye byagezweho n’abayobozi ba Kigali umwaka ushize. Yatangaje ko asanga ibyo bikorwa bitanga ikizere n’ubwo bitarangiza ibibazo byose byo mu mugi. Yagarutse kandi ku muhigo wo gukora imihanda yo mu midugudu abaturage batangiye kugiramo uruhare. Minisitiri Shyaka yasabye abayobozi b’umujyi wa Kigali kwihutira gutera inkunga abaturage bazaba bagaragaje kwishyira hamwe ngo bagire uruhare mu gukora imihanda y’aho batuye.

TANGA IGITEKEREZO

Leave a Reply

Your email address will not be published. Required fields are marked *