24°C , Intermittent clouds | Kigali-Rwanda
Minisitiri w'Ibidukikije Dr Biruta Vincent ubanza ibumoso na Fode Ndiaye bari mu nama yiga ku bukungu butangiza ibidukikije (Foto James)

Kigali: Hatangiye inama mpuzamahanga ku bukungu butangiza ibidukikije

Yanditswe na Mutungirehe Samuel

Ku ya 27-11-2018 saa 09:53:59

I Kigali hateraniye inama y’Ihuriro rya mbere nyafurika ku bukungu butangiza ibidukikije (Africa Green Growth Forum) ihuje abashoramari, abashyiraho za politiki n’abahanga mu by’imari baturutse hirya no hino muri Afurika no ku Isi.

Ni in ama igamije gusangira ubunararibonye ku bukungu butangiza ibidukikije n’iteramberre ridahangarwa n’imihindagurikire y’ibihe.

Minisitiri w’Ibidukikije Dr. Biruta Vincent, ubwo yafunguraga iyi nama y’iminsi itanu, yatangiye ejo hashize, tariki ya 26 kugeza ku wa 30 Ugushyingo 2018, yavuze ko gahunda yo guhangana n’ibyangiza ikirere u Rwanda rwabitangiye mu 2011 kandi byagize akamaro kanini mu bikorwa by’iterambere haba kuri Leta no mu bikorera.

Ati “Kuva iyo gahunda yatangira mu myaka irindwi ishize, yageze kuri byinshi byiza mu rugendo rwo kubungabunga ubukungu butangiza ikirere. Twashyizeho Ikigega k’Igihugu gitera inkunga imishinga y’ibidukikije no guhangana n’imihindagurikire y’ibihe (FONERWA) gifasha imishinga yose ijyanye no kurengera ibidukikije kandi cyagize umumaro munini, cyatumye habaho imirimo igera ku bihumbi 140, birinda hegitari ibihumbi 10 z’ubutaka bwari kwangirika, kandi ku bufatanye n’abafatanyabikorwa twakusanyije miliyoni zirenga 150 z’amadorari zo kwita ku iterambere ry’ubukungu butangiza ikirere.”

Yakomeje agaragaza ko muri gahunda yo kubungabunga ikirere u Rwanda rwashyizeho gahunda yo gukora ubusitani bw’ikitegererezo hirya no hino mu gihugu, abari muri iyo nama bazagira umwanya wo gusura hamwe muri ho nka Bugesera, ashimira abafatanyabikorwa bafashije igihugu kugera kuri ibyo bikorwa byose.

Minisitiri w’Ibidukikije, Dr. Biruta yijeje ko muri iyo nama izamara iminsi itanu bazafatiramo ingamba zishoboka zo gukomeza kwita ku bukungu n’iterambere ritangiza ikirere.

Uhagarariye Amashami y’Umuryango w’Abibumbye mu Rwanda, Fodé Ndiaye, yavuze ko kugira ngo hagerweho ingamba z’ubukungu butangiza ibidukikije, hakwiye ubufatanye bwimbitse bw’inzego z’abikorera n’abaterankunga n’imiryango ya sosiyete sivile.

Hashimangiwe ko ubwo bushake buzatizwa imbaraga n’uruhare rwa za Leta mu korohereza abikorera kubona imari, kugira ngo bagabanywe ibyuka bya karubone (Carbon) bihumanya ikirere, hakavugururwa uburezi bugamije kwigisha abakiri bato uko bafasha mu kugera ku iterambere, abaturage na bo bakabigiramo uruhare bikaramba, n’ibindi.

Ati “Ibyo dutekereza ko ari byo bisubizo byiza uyu munsi, bishobora kutaba ari byo bizaba bibereye ejo hazaza.”

Umuyobozi Mukuru w’Ikigo mpuzamahanga kita ku bukungu butangiza ibidukikije (Global Green Growth Institute), Dr. Frank Rijsberman, yavuze ko hari uburyo bwinshi bugezweho bwo kugabanya ibihumanya ikirere birimo n’urugero rw’ibihugu nk’u Bushinwa bwakoze ibinyabiziga bikoresha amashanyarazi aho gukoresha amavuta y’ibikomoka kuri peterori yangiza ikirere.

Ati “Kugera ku bukungu butangiza ikirere bihendukiye buri wese. Ndashaka gukuraho ibijya bivugwa ko kubigeraho bihenze cyane. Gusa birumvikana ko Afurika itabasha ubwayo guhagarika ibyuka byoherezwa mu kirere, ahanini kuko atari yo yateje ihindagurika ry’ibihe nubwo yagizweho ingaruka.”

Umuyobozi w’Ikigo mpuzamahanga k’ibidukikije Naoko Ishii, yashimiye u Rwanda ko rwashyize imbere ingamba zo kurengera ikirere mbere y’uko rwihuza n’ibindi bihugu by’Afurika mu rugamba rwo kurengera ibidukikije kandi rukaba rukomeje gushyiramo imbaraga.

Ni kuri uwo munsi kandi u Rwanda rwatangije ku mugaragaro gahunda y’ubufatanye mu rugamba rwo kurengera ibidukikije, ihuriweho n’ibihugu bigera kuri 60 ku Isi “Rwanda NDC Partnership Plan”.

Aba ni abitabiriye inama ku bukungu butangiza ibidukikije, izamara iminsi itanu ibera mu Rwanda (Foto James R.)

TANGA IGITEKEREZO

Leave a Reply

Your email address will not be published. Required fields are marked *