19°C , Intermittent clouds | Kigali-Rwanda

Kigali: Haratangira gupimwa COVID-19 ku mihanda itandukanye

Yanditswe na Imvaho Nshya

Ku ya 01-07-2020 saa 13:23:37

Ubuyobozi bw’Ikigo k’Igihugu gishinzwe Ubuzima (RBC) bwatangaje ko mu rwego rwo gukomeza gusesengura  uko icyorezo cya COVID-19 gihagaze mu Mujyi wa Kigali, guhera kuri uyu wa Kane tariki ya 2 Nyakanga 2020 hatangira igikorwa cyo gusuzuma icyo cyorezo mu mihanda imwe n’imwe yatoranyijwe.

Abakoresha ibinyabiziga, moto, n’abanyamaguru barasabwa kwigomwa iminota itanu igihe bazaba bageze aho bapimirwa, bisuzumishe mbere yo gukomeza urugendo, ndetse barasabwa ubufatanye no korohereza abakozi bari muri iki gikorwa kuko ari kimwe mu bigize uruhare rwabo mu guhashya iki icyorezo.

Umuyobozi wa RBC Dr Nsanzimana Sabin, yatangaje ko kuri ubu nta wapfa kwemeza ko iki cyorezo kitari mu Banyarwanda mu gihe buri wese adapimwe ngo bigaragazwe n’ibipimo byizewe, cyane ko hari n’abagendana ubwo burwayi batagaragaza ibimenyetso.

Ahamya ko abatuye mu Mujyi wa Kigali igihe bemererwaga gusubukura ibikorwa by’ubuzima busanzwe bakagenda bahura ari benshi, inzego z’ubuzima ziteguye gukurikirana imiterere y’ubuzima bw’Abanyakigali bwa buri munsi.

Yahishuye ko imibare y’abarwayi bashya b’icyorezo cya COVID-19 batahurwa mu Muyi wa Kigali ari umusaruro w’ubushakashatsi bukorwa ku buryo buhoraho, ari na bwo bwabaye intandaro yo kuba hari imidugudu yasubijwe muri Gahunda ya Guma Mu Rugo mu rwego rwo kwirinda ikwirakwizwa ryacyo.

Ati: “Twakoze ubushakashatsi bugenda bwerekana abantu bafite uburwayi, ari na cyo cyavuyemo y’uko imidugudu imwe n’imwe ishyirwa muri Gahunda ya Guma Mu Rugo. Ni ho hakomeje gutahurwa imibare y’abarwaye icyo cyorezo,  Bitavuze ko hatari n’ahandi dushobora gupima tukaba twahasanga n’abarwayi. Ni akazi gahoraho nta waca urubanza uyu munsi ngo COVID-19 igeze aha n’ahaha, ndayihagaritse. Ku Isi yose turacyarwanana yo.”

Minisiteri y’Ubuzima yaraye itangaje abarwayi bashya 24 barimo 7 batahuwe mu Mujyi wa Kigali, 13 b’i Rusizi, 2 b’i Ngoma, umwe w’i Nyagatare n’undi w’i Rutsiro. Abamaze gutahurwaho icyo cyorezo mu Rwanda bageze ku 1,025 barimo 576 vakirimo kwitabwaho n’abaganga.

Abaturarwanda barasabwa kurushaho kubahiriza amabwiriza yo kwirinda ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa arukoro yabugenewe.

 

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.