Kigali: Hakozwe umuganda w’isuku ku bikorwa by’umudugudu w’ikitegererezo wa Karama  

Yanditswe na MUTUNGIREHE SAMUEL

Ku ya Jun 30, 2019

Umujyi wa Kigali, Minisiteri y’Ibikorwa remezo na Minisiteri y’Ubutegetsi bw’igihugu n’ibigo bya Leta bitandukanye bifatanyije n’abaturage bo mu karere ka Nyarugenge mu murenge wa Kigali mu muganda rusange wo gukora ibikorwa by’isuku n’isukura ahubatse umudugudu w’ikerekezo wa Karama uzatuzwamo imiryango 240 yahoze mu manegeka mu bice bitandukanye by’Umujyi wa Kigali.

Ni umuganda wahuriyemo kandi n’abanyamahanga batandukanye barimo abaturutse muri za kaminuza zo muri Amerika, abaturutse mu kigo k’Icyambu cya Kenya, aho bakoze ibikorwa byo gusukura inzu z’uwo mudugudu, ikigo mbonezamikurire cy’abana bo muri uwo mudugudu n’abo muri ako gace, ibiraro by’inkoko no gusukura umuhanda Karama-Nyamirambo uturuka ku ruganda rwa Ruliba kuri Nyabarongo.

Nyuma y’umuganda rusange, Minisitiri w’Ibikorwa remezo, Amb. Gatete Claver, yabwiye abaturage ko ibyo bikorwa byose biri muri uwo mudugudu byatekerejwe na Perezida Paul Kagame nyuma yo kubona ko imidugudu nk’iyo yibandaga hanze y’Umujyi wa Kigali bityo naho bikwiye kuhagezwa.

Ati: “Nk’uko mubibona ni ahantu heza cyane ariko hatari hafite ibikorwa remezo bigezweho, aratubwira ati noneho nimushyireho n’uyu muhanda, uve Ruliba uhuze n’Umujyi wa Kigali. Ati kandi muhashyire noneho n’umudugudu w’ikitegererezo, mushyireho ishuri, amarerero n’ibyangombwa byose kugira ngo abantu bashobore kuba batura ahantu heza ariko noneho hashobore kuba hazamura agace ka Karama.”

Amb. Gatete yaboneyeho gushimira abakozi ba Kenya Port Authority batanze amafaranga miriyoni 8.5 ya mituweri ku baturage bo mu karere ka Nyarugenge 2400, ababwira ko igikorwa nk’icyo ari cyo umuganda uvuze.

Ati “Umuganda uvuze ko abantu iyo bishyize hamwe nta kibananira; iki gikorwa mumaze gukora iyo nka Leta tujya gushyiramo amafaranga byajyaga gutwara menshi cyane. Ariko umwanya wanyu wose mwawufashe uyu munsi, muravuga muti ibyo twakoraga reka tubireke, reka tureke kujya ahandi tuze gukorera umuganda Karama kugira ngo dufashe iki gikorwa nibura natwe dutange inkunga yacu.”

Umuyobozi w’Akarere ka Nyarugenge, Nzaramba Kayisime, yavuze ko uwo muganda ahanini ushingiye ku kwitegura umunsi mukuru wo kwibohora ku nshuro ya 25.

Umuyobozi w’Umujyi wa Kigali, Rwakazina Marie Chantal, yavuze ko ibikorwa byakozwe muri uwo muganda bigaragaza ko byose bishoboka, ashimira abantu bose bawitabiriye umuhate bagaragaje mu bikorwa by’isuku n’isukura byakozwe.

Amb. Gatete Claver, Minisitiri w’Ibikorwa remezo ashimira abaturage bitabiriye umuganda rusange usoza ukwezi kwa Kamena 2019 wabereye Karama mu karere ka Nyarugenge (Foto Samuel M)