22°C , Partly cloudy | Kigali-Rwanda

Kigali: Hagaragajwe ibyakozwe mu guhangana n’ingaruka za Jenoside

Yanditswe na MUTUNGIREHE SAMUEL

Ku ya 14-04-2018 saa 10:27:13

Depite Munyangeyo Theogene yavuze ko u Rwanda rufite amateka yihariye aranga ubudasa mu guhangana n’ingaruka za Jenoside yakorewe Abatutsi mu 1994.

Yabitangaje mu muhango wo kwibuka ku nshuro ya 24 Jenoside yakorewe Abatutsi mu 1994, wabereye mu murenge wa Kimironko ku Rwibutso rwa Kibagabaga.

Depite Munyangeyo Theogene, mu muhango wo kwibuka ku nshuro ya 24 Jenoside yakorewe Abatutsi mu 1994, mu murenge wa Kimironko (Foto Samuel M)

Depite Munyangeyo yavuze ko kubohora igihugu, hafashwe ingamba zikomeye zirimo gufata umurongo wo kutihorera, guhuza ingabo zatsinze n’izatsinzwe zikaba ingabo zimwe zirinda ubusugire bw’igihugu, ibyo byose bigakorwa n’Abanyarwanda bagifite ubumuntu.

Mu kiganiro kirekire ku mateka y’u Rwanda nyuma ya Jenoside yakorewe Abatutsi mu 1994, Depite Munyangeyo yagaragaje bimwe mu bigaragaza umuhate n’umutima ukomeye Abanyarwanda bagize wo gusubiza igihugu ku murongo.

Yavuze ko nyuma yo guhagarika Jenoside tariki ya 3 Nyakanga 1994, hakozwe byinshi birimo gucyura impunzi no kuziha ihumure mu gihe hari abatarabyumvaga, ibiganiro bitandukanye mu Rugwiro bigamije gushakisha uko igihugu cyashyirwa ku murongo, havamo ibiganiro byinshi birimo gukora Itegeko Nshinga rikozwe n’Abanyarwanda ubwabo, gushyiraho ikerekezo 2020 k’igihugu, amahame remezo yo gukumira icyasubiza u Rwanda mu icuraburindi, hashyirwaho amategeko atandukanye yo gukumira ko Jenoside itazongera ukundi.

Mu bindi hashinzwe kandi Komisiyo y’Igihugu yo kurwanya Jenoside (CNLG), hashyirwaho ikigega gishinzwe guharanira inyungu z’abarokotse Jenoside (FARG) n’ibindi.

Mu rwego rw’ubutabera, hashyizweho urugereko rwihariye rwo guca imanza zirebana n’ibyaha bya Jenosise, ku buryo kugeza mu mwaka wa 1998 hari hamaze gucibwa imanza 300 mu 130 000.

Kugeza mu 2012 ubwo inkiko gacaca zasozaga imirimo yazo, zaciye imanza 1 958 634 mu myaka 10,  mu gihe urukiko mpuzamahanga rwashyiriweho u Rwanda, Arusha muri Tanzania rwo rwasoje imirimo rumaze guca imanza 93 kuva tariki ya 8 Kanama 1994 kugeza tariki ya 31 Ukuboza 2015 rusoje imirimo.

Si ibyo gusa bigaragaza uko u Rwanda rwiyubatse nyuma ya Jenoside yakorewe Abatutsi mu 1994, rwakomeje kugirirwa ikizere mu mahanga, kugeza ubu rukaba ruhagarariwe mu bihugu 147 ku isi.

Kugeza ubu nta munyarwanda wahunze igihugu hagati y’umwaka wa 1959 n’uwa 1998 ukitwa impunzi utaratahuka, nyuma y’aho tariki ya 31 Ukuboza 2017 ishami ry’Umuryango w’Abibumbye ryita ku mpunzi (UNHCR) risanze mu Rwanda hari amahoro, nta gishobora gutuma umunyarwanda aguma mu buhunzi.

TANGA IGITEKEREZO

Leave a Reply

Be the First to Comment!

avatar