22°C , Mostly sunny | Kigali-Rwanda
Rwakaniza Marie Chantal (uwa 3 uvuye ibumoso) na Visi meya Mukarubega (ibumoso bwe) n'Umunyamabanga Niyonsenga (iburyo bwe) hamwe n'intumwa za RPF mu matora ku ya 15 Kamena 2019

Kigali: Batoye Komite Nyobozi y’Umuryango FPR-Inkotanyi

Yanditswe na Kayira Etienne

Ku ya 16-06-2019 saa 09:49:36

Abanyamuryango ba FPR-Inkotanyi bo mu turere twa Gasabo, Kicukiro na Nyarugenge, ku wa Gatandatu 15 Kamena batoye Komite Nyobozi y’Umujyi wa Kigali.

Hanatowe Abayobozi b’Urugaga rw’Urubyiruko n’ab’Urugaga rw’Abagore zishamikiye ku Muryango FPR, hamwe n’abagize komisiyo uko ari 4 mu byiciro bose. Icyo gikorwa kitabiriwe ku ijanisha rya 99,4% dore ko mu banyamuryango bagize Inteko itora batumiwe mu matora bagera kuri 760, hitabiriye 756, bane bataje ngo bakaba bari bafite impamvu zizwi zatumye bataboneka.

Iyo Komite Nyobozi y’Umuryango FPR-Inkotanyi y’Umujyi wa Kigali, irangajwe imbere n’Umunyamuryango Rwakazina Marie Chantal ku mwanya wa Perezida. Yungirijwe na Mukarubega Zulfat (Visi Perezida). Uwatorewe umwanya w’Umunyamabanga ni uwitwa Niyonsenga Jean de Dieu. Hanatowe kandi ba Komiseri ba komisiyo 4 ari zo, iy’Ubukungu, iy’Imibereho Myiza na Komisiyo y’Ubutabera.

Abatowe kuyobora Urugaga rw’Urubyiruko harimo Iradukunda Sabato watorewe umwanya wa Perezida, Mukeshimana Eugène Perezida wungirije na Niyonkuru Philbert watorewe Ubunyamabanga. Muri iki kiciro hanatowe kandi abayobozi ba komisiyo bane. Muri uru rugaga rw’Urubyiruko, hatowe abanyamuryango bane bazabahagararira muri Komite Nyobozi ya RPF mu mujyi wa Kigali. Mu rugaga rw’Abagore, Uwamaliya Cécile ni we watorewe kuba Perezida, Musayidire Irène (Visi Perezida) n’Umunyamabanga witwa Uwera Parfaite. Hatowe nanone abayobozi b’amakomisiyo 4 kimwe no mu byiciro byavuzwe hejuru.

Nyuma yo kugirirwa ikizere n’abanyamuryango b’uturere 3 tugize Umujyi wa Kigali, Marie Chantal Rwakazina mu ijambo rye yashimiye cyane abamuhundagajeho amajwi, ariko abasaba kuzabatiza amaboko we n’abo batoranwe kugira ngo bazabashe kuzuza neza inshingano zitoroshye bahawe na FPR-Inkotanyi. Rwakazina ati “Muri iyi manda dutorewe kuyobora Umuryango FPR-Inkotanyi muri Kigali, ndasaba abo twatoranwe kuzakora umuti nkuko abasore b’iki gihe babivuga. Dutowe turi makumyabiri ariko si twe twenyine twazamura ibikubiye muri ziriya nkingi uko ari ennye. Ni muri urwo rwego tubasaba Banyamuryango mwese mwadutoye, kuzadutiza amaboko kungira ngo turusheho kuzamura Kigali yacu tukayigeza mu Iterambere rirushijeho kuba ryiza”.

Mu ijambo rya Komiseri Marie Claire Mukasine wari intumwa y’Umunyamabanga Mukuru wa FPR muri icyo gikorwa cy’amatora, yashimiye cyane Abanyamuryango batumiwe uburyo bubahirije igihe n’uburyo bitabiriye ari benshi, ugereranyije n’imyaka ishinze. Yagize ati “Mu izina ry’Umunyamabanga Mukuru naje mpagarariye, mbashimiye ubwitange mwagaragaje muri iki gikorwa cy’amatora tumazemo ukwezi kose. Kwishyiriraho inzego z’Umuryango hari icyo bivuze. Mumenye ko gutorwa n’abanyamauryango bivuga ko ugomba gukora, kwiyemeza umurimo no kuzuza inshingano wahawe neza”.

Komiseri Mukasine yibikije ko igikorwa cy’amatora y’inzego za FPR cyasabaga imbaraga n’ubushake bw’abanyamuryango kuko ngo cyahereye ku mudugudu, gikomereza mu kagari, mu murenge, mu karere no kugera mu Mujyi wa Kigali. Yagize ati “Abatsinze aya matora mwishimire amahirwe mwahawe n’abanyamuryango. Mwiboneye ubwanyu uburyo mu byiciro byose abantu bahatanye bikomeye kandi bafite ishyaka no gukunda gukorera umuryango FPR-Inkotanyi. Murasabwa rero kugira imikoranire myiza, kugira ngo ibyo dukora byose tubikorere ku neza ya buri Munyarwanda”.

Mukasine yashimiye abanyamuryango bose, ariko ashimira by’umwihariko urubyiruko uburyo rwagaragaje ishyaka mu kwiyamamaza n’uburyo rugenda rugaragaza gukunda gukorera igihugu. Yibukije ko habayeho igihe imbaraga z’urubyiruko zakoreshejwe nabi n’ubutegetsi bubi ubwo rwakoreshwaga gusenya u Rwanda.

Yashimiye Perezida Paul Kagame, Umuyobozi Mukuru wa RPF wahinduye ayo mateka mabi agatoza urubyiruko gukunda igihugu no kucyubaka, dore ko ari rwo mizero y’ejo hazaza. Agira abagore inama, yabibukije ko ari ba mutima w’urugo, bakaba na ba mutima w’igihugu ndetse n’Umuryango. Komiseri Mukasine yabwiye abagore ko iyo umutima urwaye, ngo izindi ngingo ziwushamikiyeho zose zigira ikibazo. Yabasabye kurangwa n’ikinyabupfura n’ubunyangamugayo mu byo bakora byose.

Amatora ya Komite Nyobozi ya FPR y’Umujyi wa Kigali yaranzwe n’ubwitabire bwo hejuru, n’abanyamuryango kuhagerera ku gihe.

Rwakaniza Marie Chantal (uwa 3 uvuye ibumoso) na Visi meya Mukarubega (ibumoso bwe) n’Umunyamabanga Niyonsenga (iburyo bwe) hamwe n’intumwa za RPF mu matora ku ya 15 Kamena 2019

TANGA IGITEKEREZO

Leave a Reply

Your email address will not be published. Required fields are marked *