21°C , Mostly cloudy | Kigali-Rwanda

Kigali: Bashimiwe kwesa umuhigo mu gutanga amaraso afasha abarwayi

Yanditswe na Imvaho Nshya

Ku ya 26-03-2021 saa 17:06:47
Ubwitabire bwo gutanga amraso muri iki cyumweru ngo bwari bushimishije

Kuri uyu wa Gatanu tariki ya 26 Werurwe 2021 hasojwe icyumweru cyo gutanga amaraso cyatangiye ku ya 22 Werurwe , kikaba cyarateguwe n’Umuryango wigenga wita ku Rwego rw’Ubuzima (Health Sector Collective Outreach/HESCO) giterwa inkunga n’Ikigo cy’Ubwiteganyirize mu Rwanda (RSSB).

Muri ubwo bukangurambaga bwari bugamije gufasha Ikigo cy’Igihugu cy’Ubuzima (RBC) gukusanyiriza abarwayi amaraso ahora akenewe buri gihe, intego yari iyo kugera ku dushashi (units) tw’amaraso 300 ariko twarabonetse ndetse turanarenga.

Ubwitabire muri icyo cyumweru ngo bwagenze neza, ariko biba akarusho kuko hagaragaye abakorerabushake bo mu byiciro byihariye byiyongereye ku baturage basanzwe bakorera cyangwa batembera mu Mujyi wa Kigali.

Muri ibyo byiciro byihariye byatanze amaraso harimo icy’abanyamakuru bakorera ibigo bitandukanye, abanyeshuri bo muri Kaminuza y’Abalayiki b’Abadivantisiti (UNILAK) ndetse n’aba Kaminuza yigenga ya Kigali (ULK), abanyeshuri bo ku Ishuri Ryisumbuye rya St. André ndetse n’abakozi batandukanye bw’Uturere tugize Umujyi wa Kigali.

Buri wese mu batanze amaraso yashimiwe ubutwari yagaragaje mu gutabara ubuzima bw’abandi, by’umwihariko hashimirwa Akarere ka Gasabo kitanze mu bukangurambaga bwakuruye abatanga amaraso benshi.

Ishuri Ryisumbuye rya St. André na ryo ngo ryaratunguranye kuko ryavuyemo abanyeshuri basaga 90 batanze amaraso, mu gihe muri  Kaminuza ya ULK ho havuye abarenga 50 batanze amaraso.

Marie Claire Uwera, Umuyobozi w’agateganyo w’Ishami rishinzwe Itumanaho n’Ubukangurambaga muri RSSB, yashimiye abatanze amaraso bose bagaragaje umutima utabara, n’abafatanyabikorwa bagize uruhare muri ubwo bukangurambaga.

Yagize ati: “Turagira ngo dushime abakorerabushake bose batanze amaraso ku ruhare rukomeye mwagize,  by’umwihariko tunashime abateguye iki gikorwa n’abafatanyabikorwa babo. Dushishikariza buri wese cyane cyane abakiri bato gukomeza kugira uruhare ku buryo buhoraho muri iki gikorwa gitabara ubuzima bwa benshi.”

Rubagumya Donnah uhagarariye Umuryango HESCO wateguye iki gikorwa, yavuze ko intego nyamukuru y’ubukangurambaga bwasojwe uyu munsi yari iyo gukangurira abaturage kumenya agaciro ko gutanga amaraso.

Yashimangiye ko amaraso ari ubuzima, yongeraho ko banyuzwe no kubona ubwitabire bushimishije bwatumye barasa ku ntego bakanayirenza.

Agaruka ku buryo kizira kugurisha amaraso, cyane ko ntawugurisha ubuzima, Rubagumya yagize ati: “Kubona amaraso mu buryo bwizewe bishoboka gusa igihe habonetse abayatanga ku bushake mu buryo buhoraho, kandi batishyurwa. Turashimira abashyigikiye iki gikorwa bose, by’umwihariko RSSB n’Umujyi wa Kigali bakoze umurimo ukomeye cyane mu bukangurambaga, abakozi ba RBC batanze serivisi zizira amakemwa ku batanga amaraso ndetse n’ibitangazamakuru bitandukanye byafashije mu kongerera imbaraga ubwo butumwa.”

Umuyobozi w’Ishami ry’Ubuzima mu Karere ka Gasabo Rutarindwa Alphonse, ubwo yitabiraga ikiganiro kuri Televiziyo y’u Rwanda mu gitondo cyo kuri uyu wa Gatanu, yagarutse ku gaciro ko kwimakaza umuco wo gutanga maraso mu Banyarwanda.

Tumwe mu dusashe tw’amaraso twakusanyijwe mu cyumweru cyahariwe gutanga amaraso cyasojwe uyu munsi

Yagize ati: “Ubu nta kibazo cyo kubura amaraso gihari, ariko aza mu byiciro bitandukanye; ushobora gukenera amaraso  menshi y’ubwoko bwa O mu gihe ahari ari make, ari na yo mpamvu hakenewe igikorwa cyo gutanga amaraso ku buryo buhoraho.”

Ubukangurambaga bumaze icyumweru, bwanatewe inkunga n’imiryango itandukanye nka BRAC yatanze imipira yagenewe abatanze amaraso, Ikigo Peters Bakery cyateguriye ibyo kurya abaje gutanga amaraso, HDI Rwanda na Tomtransfers byafashije mu gutwara abatanga amaraso n’abandi.

Ubuyobozi bw’Ikigo cy’Igihugu cyo gutanga amaraso mu Rwanda (NCBT) buvuga ko buri mwaka Minisiteri y’Ubuzima ikenera udushashi tw’amaraso tubarirwa hagati y’ibihumbi 60 na 80 two guha abarwayi, cyane cyane abakoze impanuka hamwe n’ababyeyi babyaye babazwe.

Umwanditsi:

Imvaho Nshya

One Comment on “Kigali: Bashimiwe kwesa umuhigo mu gutanga amaraso afasha abarwayi”

  1. Mwiriwe? N’ukuri gutanga Amaraso nibyiza iyo utanze Amaraso uba urengeye ubuzima bw’indembe iyakeneye. Iki gikorwa ni cyiza kandi ndabona cyarateguwe neza kandi cyatanze Umusaruro. Dushimire Ubuyobozi bw’Umuryango HESCO wateguye iki gikorwa, duahimire RBC yatanze abaganga (Doctors). N’ukuri mukorane nka team nk’uko byagenze muri iki gikorwa, kugira ngo cyambuke kigere no mu Ntara. HESCO turabashimiye.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.