20°C , Mostly cloudy | Kigali-Rwanda
Perezida Paul Kagame ibumoso na Madamu we Jeannette Kagame basubuhuzwa na Busabizwa Parfait muri siporo rusange

Kigali: Barashimira Kagame wabasabiye kongererwa igihe cya siporo

Yanditswe na admin

Ku ya 18-12-2017 saa 12:48:56

Bamwe mu batuye mu Mujyi wa Kigali biganjemo abakuze bashima Perezida Paul Kagame wabasabiye kongererwa igihe cyo gukora siporo, none ubuyobozi bw’Umujyi wa Kigali bukaba bwamaze gutangaza gahunda nshya izajya igenderwaho mu gukora siporo rusange mu rwego rwo kongera igihe.

Mu kiganiro cyahuje ubuyobozi bw’umujyi wa Kigali n’abanyamakuru ku wa 13 Ukuboza 2017 hatangajwe  gahunda nshya izajya igenderwaho mu gukora siporo rusange izwi nka “Car Free Day” aho iyo siporo yakorwaga rimwe mu kwezi none ubu ikaba izajya ikorwa kabiri mu kwezi.

Umuyobozi w’Umujyi wa Kigali wungirije ushinzwe iterambere ry’Ubukungu, Parfait Busabizwa, yatangaje ko hafashwe ikemezo cyo guhindura imikorerwe y’iyi siporo aho guhera mu kwezi kwa mbere 2018 iyo siporo izajya ikorwa kabiri mu kwezi.

Busabizwa yagize ati “Nyuma yo kubiganiraho n’izindi nzego, mu mwaka utaha mu Mujyi wa Kigali tuzajya twitabira Car Free Day inshuro ebyiri mu kwezi, ubusanzwe twabikoraga mu cyumweru cya mbere cya buri kwezi ariko ubu noneho tuzajya tubikora ku cyumweru cya mbere n’icya gatatu buri kwezi.”

Ibi bitangajwe nyuma y’uko ku wa 03 Ukuboza 2017 Perezida Paul Kagame yari yitabiriye iyo siporo agasaba ko yakongererwa igihe nk’uko byasobanuwe na Minisitiri w’Umuco na Siporo agira ati “Perezida yashimye iki gikorwa cya siporo, ashimira ko abantu bakitabira, ashimira na kiriya gikorwa cyo gupima indwara abaje muri siporo kugira ngo bamenye uko ubuzima bwabo buhagaze hanyuma aranatubwira ngo amasaha yo kubikora tuyongere turusheho gutanga umwanya uhagije ku bantu bayitabira yaba hano i Kigali ndetse n’ahandi hose mu gihugu”.

Bamwe mu baturage batuye Umujyi wa Kigali batangarije Imvaho Nshya ko kuba hongewe umwanya wo gukora siporo ari ibintu byiza banaboneraho gushimira umukuru w’Igihugu wabibasabiye.

Muhire Alphonse yagize ati “Ni ibintu byo kwishimira, bivuze ko perezida wacu akomeza kudutekerereza ibyiza nk’abaturage kuko siporo ni ingirakamaro, natwe icyo tuzakora ni ukutamutererana tukitabira iriya siporo nk’uko yayidusabiye, bizatuma tugira ubuzima bwiza. Perezida wacu turamushimira cyane kuko ni umuntu ureba kure akamenya ibyatubera byiza.”

Cyuzuzo Gisele we yagize ati “Twe nk’abagore twakundaga kubura umwanya wo gukora siporo ariko ubu twarasubijwe, tugira imirimo myinshi ariko umuntu azajya ashaka akanya aboneke no muri siporo n’iyo yaboneka muri imwe mu kwezi kuko siporo ni ingenzi cyane mu buzima bw’umugore, idufasha kurwanya ibinure biteza umubyibuho ndetse ikanaturinda indwara zitandura, ibyo byose rero urumva ko tubishimira ubuyobozi bwiza bwa Perezida wacu.”

Siporo rusange mu mujyi wa Kigali izwi nka ‘Car Free Day’ yari imaze umwaka ikorwa rimwe mu kwezi aho yakorwaga ku cyumweru cya mbere cya buri kwezi ariko ubu biteganyijwe ko guhera muri Mutarama 2018 iyo siporo izajya ikorwa ku cyumweru cya mbere no ku cya gatatu bya buri kwezi mu rwego rwo kurushaho kubonera abanyarwanda umwanya uhagije abaturage bashaka gukora siporo.

NIYONSENGA SCHADRACK

TANGA IGITEKEREZO

Leave a Reply

Be the First to Comment!

avatar