28°C , Partly sunny | Kigali-Rwanda

Kigali: Batatu bafungiwe guhohotera umuturage bitwaje COVID-19

Yanditswe na Imvaho Nshya

Ku ya 10-09-2020 saa 09:56:31

Polisi y’u Rwanda yatangaje ko itazihanganira abayobozi n’abashinzwe umutekano mu nzego z’ibanze bitwaza icyorezo cya COVID-19 bagahohotera abaturage, kandi ari bo bakagombye kubarindira umutekano.

Ibyo byatangajwe nyuma y’aho itaye muri yombi abayobozi b’inzego zibanze baherutse gukubita abaturage mu Murenge wa Gatsata mu Karere ka Gasabo, nk’uko byagaragaye mu mashusho yakwirakwijwe ku mbuga nkoranyambaga.

Abo bayobozi batawe muri yombi ni  Sindayigaya Ildephonse, Karangwa Jean Bosco na Ndahiro Elisa bari mu bashinzwe umutekano ku rwego rw’ibanze, bagaragaye mu mashusho ku itariki ya 08 Nzeri 2020 bakubita umuturage witwa Tuyisenge Evode.

Mu itangazo Polisi yanyujije ku mbuga nkoranyambaga, yagize iti:  “Abitwaza kurwanya ikwirakwira rya Koronavirusi bagahohotera abaturage, ntibazihanganirwa. ”

Ubu abafashwe bafungiye kuri Sitasiyo ya Polisi ya Gatsata mu gihe iperereza ririmo gukorwa n’urwego rubishinzwe.

Uretse abayobozi mu nzego z’ibanze bahagurukiwe, ubuyobozi bwa Polisi y’u Rwanda buvuga ko n’abapolisi bahohotera abaturage cyangwa bagakoresha imbaraga z’umurengera mu kugenzura iyubahirizwa ry’amategeko  bazajya bagezwa imbere y’ubutabera babihanirwe.

 

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.