19°C , Mostly cloudy | Kigali-Rwanda
Abaminisitiri b'Imari b'ibihugu 10 by'Umuryango w'Afurika Yunze Ubumwe bazahurira i Kigali bige ku hazaza ha AU

Kigali: Ba Minisitiri b’imari n’igenamigambi bazigira hamwe ku hazaza ha AU

Yanditswe na NIYONSENGA SCHADRACK

Ku ya 12-01-2018 saa 08:01:48

Abaminisiti 10 b’Imari n’Igenamigambi bagiye guhurira i Kigali mu nama igamije kuganirira hamwe ku ishyirwa mu bikorwa ryo kugenera umuryango w’Afurika Yunze Ubumwe (AU) inkunga ingana na 0.2% by’amafaranga aturuka mu musoro w’ibyinjizwa mu bihugu bigize uyu muryango.

Abaminisitiri b’Imari b’ibihugu 10 by’Umuryango w’Afurika Yunze Ubumwe bazahurira i Kigali bige ku hazaza ha AU

AU ifatanyije na Minisiteri y’Imari n’Igenamigambi y’u Rwanda (MINECOFIN) ni bo bateguye iyo nama izaba ku wa 13 Mutarama 2018 ikazahuza abaminisitiri 10 basanzwe bari mu kiswe ‘F10’ gishinzwe gushakira umutungo uyu muryango.

Ikemezo cyo gusaba buri gihugu gukata amafaranga 0.2% by’aturuka mu misoro y’ibyinjizwa akoherezwa muri AU cyafashwe n’abakuru b’ibihugu bigize uyu muryango mu nama idasanzwe yabahurije i Kigali ku wa 16 Kamena 2016 nyuma y’uko byari bimaze kugaragara ko uyu muryango ukomeza kubura amafaranga yo kwifashisha mu gushyira mu bikorwa imigambi yawo itandukanye by’umwihariko mu mugambi wawo wo kwishakamo ibisubizo hakagabanywa inkunga z’amahanga.

Iyi nama y’abaminisitiri bagize F10 ije ikurikira indi yahurije Ethiopia ku wa 09 Kamana 2017 yafatiwemo ibyemezo bitandukanye birimo n’icyo gukomeza gushyiraho amategeko yerekana uko umutungo w’umuryango ucunzwe ndetse n’uburyo bwo kuwongera, ndetse n’ikemezo cyo gusaba isubirwamo ry’ibihano bigenerwa abadatanga umusanzu.

Minisiteri y’Imari n’Igenamigambi mu itangazo ryayo ivuga ko muri iyo nama abaminisitiri basabye ko iyi komisiyo yabo yakongerwamo abandi baminisitiri aho gukomeza kuba icumi gusa hagamijwe gushimira ibihugu bitera inkunga nyinshi umuryango w’Afurika Yunze Ubumwe. Biteganyijwe ko iyi nama izabera i Kigali izasuzuma ikanemeza inyandiko y’imyanzuro y’iyo nama yabanje ndetse ikazanareba ku myanzuro yayo ya nyuma izahabwa abakuru b’ibihugu mu nama izabahuriza muri Ethiopia muri uku kwezi.

Raporo yaherukaga gushyirwa ahagaragara na AU kuri iyi ngingo ni iyo mu Kuboza 2017, iyo raporo yagaragazaga ko ibihugu 21 ari byo byatangiye kugira icyo bikora kuri icyo kemezo cyo guha AU 0.2% by’umusoro w’ibyinjizwa, muri ibyo bihugu harimo 14 byagaragaye ko byo byamaze gutanga aya mafaranga, ibyo ni Kenya, Ethiopia, u Rwanda, Chad, Djibouti, Guinea, Sudan, Morocco, Congo Brazzaville, Gambia, Gabon, Cameroun, Sierra Leone na Cote d’Ivoire.

Ku rundi ruhande ibihugu nka Ghana, Benin, Malawi na Senegal byo byatangiriye ku gushyiraho amategeko n’uruhererekane rw’imiyoborere yabyo ku buryo bizoroherwa gushyira mu bikorwa iki kemezo naho Ibirwa bya Mauritius na Seychelles byo byagaragaje gushyigikira iki kemezo n’ubwo bikibangamiwe n’ubukungu bwabyo butifashe neza ndetse n’amategeko yabyo atarimo iki kemezo.

Perezida Paul Kagame ni we watorewe kuyobora Umuryango w’Afurika Yunze Ubumwe muri manda itaha akazatangirira izo nshingano ku kuyobora iyo nama izaterana bitarenze uku kwezi izahuza abakuru b’ibihugu bigize uyu muryango izabera Addis Ababa muri Ethiopia.

Ibihugu 10 bigize iyi komisiyo ya ‘F10’ bizitabira inama izabera i Kigali bigabanyije mu turere 5 tw’ibihugu by’uyu muryango ari two ak’Afurika yo hagati kagizwe na Chad na Congo, ak’Amajyaruguru kagizwe na Algeria na Misiri, Uburasirazuba kagizwe na Ethiopia na Kenya, Uburengerazuba kagizwe na Cote d’Ivoire na Ghana ndetse n’Amajyepfo ahagarariwe n’Afurika y’Epfo na Botswana. Ibindi bihugu bizitabira iyi nama nyuma y’uko byabisabye bikemererwa ni Cameroon, Nigeria na Morocco.

Kuva ku wa 11 kugeza 12 Mutarama 2018 habanje kuba inama y’umwihariko y’abatekinisiye ari nayo izategura iyi izahuza abaminisitiri nyirizina.

TANGA IGITEKEREZO

Leave a Reply

Your email address will not be published. Required fields are marked *