Kigali: Amashuri yafunzwe kubera COVID-19

Yanditswe na NYIRANEZA JUDITH

Ku ya 17-01-2021 saa 17:07:01

Minisiteri y’Uburezi MINEDUC yatangaje ko amashuri y’inshuke n’icyiciro cya mbere cy’abanza yari butangire ejo tariki ya 18 Mutarama 2021 ahagaritswe kimwe n’ayisumbuye yo mu Mujyi wa Kigali mu rwego rwo kwirinda Covid-19.

Iyo Minisiteri ku bufatanye na Minisiteri y’Ubuzima, yasohoye itangazo rimenyesha abafatanyabikorwa bose ingamba zafashwe mu rwego rwo gukumira icyorezo cya Koronavirusi, cyane cyane mu Mujyi wa Kigali.

Ingingo ya mbere ni uko amashuri yose y’inshuke, abanza n’ayisumbuye, aya Leta n’ayigenga abarizwa mu Mujyi wa Kigali afunze kuva ku wa Mbere tariki ya 18 Mutarama 2021. Ayo mashuri arashishikarizwa kwiga hakoreshejwe ikoranabuhanga aho bishoboka hose.

Minisitiri w’Uburezi Dr. Uwamariya Valentine yavuze ko iyi gahunda ireba gusa amashuri yo muri ibyo byiciro kandi mu Mujyi wa Kigali gusa.

Yagize ati: “Usibye mu Mujyi wa Kigali, ahandi gahunda irakomeza uko byari biteganyijwe, mu tundi turere tw’igihugu amashuri arakomeza na cya kiciro cyagombaga gutangira ejo kiratangira, ibi birareba gusa Umujyi wa Kigali.”

Minisitiri w’Uburezi Dr. Uwamariya yavuze kandi ko ibi binareba amashuri y’imyuga n’ubumenyingiro ari mu Mujyi wa Kigali kuko nayo abarirwa mu yisumbuye.

Yagize ati: “Amashuri y’imyuga n’ubumenyingiro nayo abarirwa mu yisumbuye ndetse bikanareba aya Leta n’ayigenga arimo na mvamahanga (international schools), ni ukuvuga ngo ikitwa amashuri yose ari muri ibi byiciro guhera ku munsi w’ejo nta bwo bari bwige. Ariko ahandi mu gihugu amashuri arakomeza mu byiciro byari byaratangiye ndetse n’abagomba gutangira ejo baratangira ahatari mu Mujyi wa Kigali.”

Ingingo ya kabiri y’iryo tangazo ni uko abanyeshuri biga bacumbikirwa mu Mujyi wa Kigali bazaguma mu bigo byabo, bakomeze guhabwa serivisi z’ingenzi.

Ingingo ya gatatu ivuga ko amashuri yose atabarizwa mu Mujyi wa Kigali azakomeza kwiga uko bisanzwe, hubahirizwa amabwiriza yo kwirinda Covid-19.

Izi ngamba zizavugururwa nyuma y’ibyumweru bibiri hamaze gukorwa isesengura ry’uko icyorezo cya Koronavirusi kizaba cyifashe.

Ku birebana n’amafaranga y’ishuri ababyeyi bari bamaze gutanga Minisitiri w’Uburezi avuga ko nta mpungenge byagombye guteza, kuko nyuma y’ibyumweru bibiri, nyuma y’isesengura  rizaba rigaragaza kugabanyuka k’ubwandu mu Mujyi wa Kigali amashuri yakomeza bikaba bivuze ko amashuri akomeje, amafaranga yishyuwe ari yo azaherwaho, si ukuvuga ko bazongera kwishyura bushyashya.

Abantu bose barasabwa gukomeza kurangwa n’ubufatanye mu kwirinda Covid-19, ndetse no mu bice bitafunze amashuri, kuko iki kemezo ntawe cyaje kije kubangamira ahubwo ni inyungu z’Abanyarwanda bose muri rusange.

Umwanditsi:

NYIRANEZA JUDITH

Tanga Igitekerezo

Email yanyu ntigaragazwa ku rubuga. Amazina na Email ni ngombwa.