Kigali: Abayobozi bahagurukanye ingamba zo gufasha abaturage kubahiriza igishushanyombonera

Yanditswe na Sezibera Anselme

Ku ya 26-11-2019 saa 10:17:33
Abayobozi b'Imidugudu n'Utugari mu Mujyi wa Kigali bagejejweho imiterere y'igishushanyombonera cy'umujyi banasabwa kucyumvisha abaturage (Foto Sezibera)

Abayobozi b’Imidugudu n’Utugari baragaragaza ko hari ibyo biteguye gukora mu rwego rwo kurwanya no guca burundu imyubakire y’akajagari mu Mujyi wa Kigali, nyuma yo gutangarizwa igishushanyombonera gishya kigomba kugenderwaho.

Ibyo babitangaje ubwo bitabiraga amahugurwa y’iminsi ibiri yateguwe n’Umujyi wa Kigali agamije kubashishikariza kwegera abaturage no kubarinda kubaka mu kajagari kugira ngo bagendane n’igishushanyombonera.

Umukuru w’Umudugudu w’Inyange mu kagari ka Bibare, Umurenge wa Kimironko, Fred Sam, avuga ko afite ingo 400 ziri mu mudugudu we zishobora kureba uburyo bw’imyubakire inoze kandi ijyanye n’igishushanyombonera binyuze mu masibo yagiye ashyirwaho.

Avuga ko hari ubujagari busanzwe bwarubatswe kuri Leta zabanje mbere ya Jenoside yakorewe Abatutsi, ariko kugira ngo butiyongera amasibo akwiye gushyirwamo ingufu kugira ngo yunganire umudugudu.

Uwizeyimana Eustache, Umukuru w’Umudugudu wa Byimana, Akagari ka Musezero mu murenge wa Gisozi muri Gasabo, avuga ko ikihutirwa bagiye gusobanurira abaturage kumva neza igishushanyombonera. Ati: “Abaturage bakwiye gufashwa kumva neza ko aho waba utuye hose, hari uburenganzira bafite ariko hari n’ibyo bashobora kuhakora hakaba neza ntihabe akajagari kabangamira igishushanyombonera. Tugiye kubasobanurira mu buryo bwimbitse kumenya uko bagomba gukoresha ubutaka bwabo neza kandi basaba amakuru yuzuye atuma badakora amakosa.”

Asaba inzego zibakuriye gushyira ingufu mu gushyira ibimenyetso ahateganyirijwe ibikorwa remezo kugira ngo birinde abaturage kubihutaza mu gihe bakihafite uburenganzira.

Umukozi w’Umujyi wa Kigali ushinzwe ishyirwa mu bikorwa ry’igishushanyombonera, Rukundo Benon, avuga ko ibiganiro ku gishushanyombonera kivuguruye birimo gukorwa bigamije gushishikariza abantu kukimenya ngo kitazagira uwo gitungura kandi banasobanurirwe ibirimo ndetse n’ingamba nyinshi zikirimo.

Ati: “Tugamije kubagaragariza uburyo bwinshi buhari bwo kugishyira mu bikorwa, hari ukubereka itandukaniro ry’igishya n’icya 2013 kugira ngo nikijya ahagaragara bye kuzatungurana kandi bazabe bazi ibigikubiyemo.”

Mu bishya biri muri icyo gishushanyombonera gishya harimo inyito nshyashya zitabaga mu cyariho mu 2013, hakabamo ikomatanyabikorwa ku mikoreshereze y’ubutaka ritari ririho mu myaka yashize, kuko kizafasha mu guha abaturage gukora ibikorwa byinshi bitandukanye byaba ubucuruzi, gutura n’ibindi bitahungabanya abatuye muri karitsiye, bidahuye n’ibyemerwaga muri 2013.

Umwanditsi:

Sezibera Anselme

Tanga Igitekerezo

Email yanyu ntigaragazwa ku rubuga. Amazina na Email ni ngombwa.