17°C , Partly cloudy | Kigali-Rwanda
Aba ni bo basore batatu bafatanywe urumogi baruvanye i Rulindo barutwaye i Rwamagana (Foto Kayitare J.P)

Kigali: Abasore batatu bafatanywe kg 20 z’urumogi barujyanye i Rwamagana

Yanditswe na Kayitare Jean Paul

Ku ya 15-05-2019 saa 13:13:53

Polisi y’Igihugu ku mugoroba wo kuwa Kabiri tariki 14 Gicurasi 2019, yerekanye abasore batatu barimo abakora umwuga wo gutwara abagenzi kuri moto bari batwaye urumogi ibiro 20 barukuye mu Karere ka Rulindo bagiye kurugurishiriza mu Karere ka Rwamagana.

Manishimwe Protogene ukora akazi ko gutwara abagenzi kuri moto avuga ko yafatiwe mu i Zindiro atwaye urumogi mu Karere ka Rwamagana. Avuga ko aramutse agizwe umwere atakongera gutwara ibyo atazi, ikindi kandi ngo yajya atangira amakuru ku gihe.

Yagize ati “Nari natashye ubukwe bigeze nijoro abo twari kumwe bampa urumogi ngeze muri Kigali mfatirwa mu Zindiro. Isomo nkuyemo ni uko ntazongera gutwara ibintu ntazi ikindi bambabariye najya ntangira amakuru ku gihe.”

Ndatimana Didas na we wafatanywe urumogi ikindi kandi akaba ari umumotari, avuga ko atari azi ibyo atwaye, akavuga ko abikuyemo isomo. Akomeza avuga ko agize umugenzi atwara yajya abanza akareba ibyo atwaye ngo nubwo byaba biteye isoni ntiyabura kutabirebamo.

Ati “Amasaha maze mfashwe hari isomo mbikuyemo cyane ko n’ibyo nari ntwaye ntari mbizi. N’iyo umugenzi yaba atwaye ibiteye isoni ku buryo watinya kubirebamo nge sinabitinya. Abamotari ndabagira inama yo kudatwara uwo babonye batabanje kureba ibyo afite mu gikapu ke.”

Umuvugizi wa Polisi mu Mujyi wa Kigali, CIP Umutesi Marie Gorette, ashima uruhare rw’abaturage mu gutangira amakuru ku gihe, bityo bigatuma ibiyobyabwenge bifatwa. Avuga ko aba basore bafashwe batwaye urumogi ibiro 20 barukuye mu karere ka Rulindo barutwaye mu karere ka Rwamagana.

Yagize ati “Aba basore bafatiwe i Ndera bava i Rulindo batwaye urumogi mu karere ka Rwamagana mu ntara y’Iburasirazuba. Ibi bivuze ko mu Mujyi wa Kigali twashyizeho ingamba zituma abatunda cyangwa abacuruza ibiyobyabwenge bafatwa, cyane ko n’aba bafashwe bivugira ko kunyura muri Kigali ufite ibiyobyabwenge bitoroshye.”

CIP Umutesi, ashimangira ko muri buri mudugudu hari itsinda ry’abantu barwanya ibiyobyabwenge kandi no mu bigo by’amashuri hari club zifasha mu kubirwanya. Akomeza asaba abamotari kugira amakenga ku bo batwaye. Avuga kandi ko ibyo bitakorwa n’abamotari gusa, ahubwo ko n’abandi bakwiye kurwanya ibiyobyabwenge kandi bakabigira ibyabo.

CIP Umutesi avuga ko mu Mujyi wa Kigali ibiyobyabwenge biri ku mwanya wa gatatu mu byaha biri ku isonga. Yongeraho ko urumogi rubarirwa mu biyobyabwenge bihambaye. Ibiyobyabwenge bikunze gufatirwa mu Mujyi wa Kigali, CIP Umutesi avuga ko birimo urumogi n’inzoga z’inkorano.

Yasobanuye ko nibahamwa n’icyaha bazahanishwa ingingo ya 263 yo mu gitabo cy’amategeko ahana ibyaha mu Rwanda. Iyi ngingo ivuga ko umuntu uhindura urumogi, uruhinga n’ururanguza ahanishwa igihano cyo kuva ku myaka 20 kugeza kuri 25 ndetse n’ihazabu y’amafaranga y’u Rwanda miriyoni 15 ariko atarengeje miriyoni 20.

Ikomeza ivuga ko umuntu uruha umwana we ahanishwa igifungo cya burundu n’ihazabu y’amafaranga kuva kuri miriyoni 30 ariko atarenze miriyoni 50.

Aba ni bo basore batatu bafatanywe urumogi baruvanye i Rulindo barutwaye i Rwamagana (Foto Kayitare J.P)

TANGA IGITEKEREZO

Leave a Reply

Your email address will not be published. Required fields are marked *