Kigali: Abasora bacuruza imbaho batewe inkeke no gutunga mudasobwa

Yanditswe na Imvaho Nshya

Ku ya 18-02-2021 saa 04:50:26
Abasora bakorera mu gakiriro ka gahanga batewe impungenge no gusabwa gutunga mudasobwa kugira ngo babone uko basora

Impinduka zo gukoresha inyemezabuguzi z’ikoranabuhanga (EBM) ku bacuruzi bose zikomeje gushyirwamo imbaraga kugira ngo zifashe gukemura ibibazo bitandukanye birimo korohereza abasora no guhangana n’abanyereza imisoro kandi ari yo nkingi ya mwamba mu kubaka Igihugu. 

Abagomba gutunga ikoranabuhanga rya EBM bari basanzwe babizi ko bagomba kuritunga guhera mu ntangiriro z’umwaka wa 2021, ariko bamwe bavuga ko byabagora kurikoresha mu gihe ryaba rikomeje gukora nk’uko barisobanuriwe ko bisaba kuba utunze mudasobwa.

Bamwe mu bavuga ko batewe inkeke n’imikoreshereze y’iryo koranabuhanga ni abacuruza imbaho mu mu Mujyi wa Kigali, bagaragaza ko hatabayeho uburyo buborohereza, gukoresha iryo koranabuhanga risaba mudasobwa bizabagora cyane.

Imvaho Nshya yasuye bamwe muri abo bacuruzi bakorera mu Gakiriro ka Gahanga gaherereye mu Murenge wa Gahanga, Akarere ka Kicukiro, bamwe mu bacuruzi bagaragaza ko bagize impungenge igihe basabwaga gutunga mudasobwa kugira ngo babashe kubona ikoranabuhanga rya EBM ribafasha kwishyura imisoro.

Ibibanza by’abacuruza imbaho, biba byegeranye ndetse birimo imashini zisakuza cyane. Usanga buri mucuruzi n’abakozi bamufasha gusatura imbaho baba bari ku mashini, ari na ko abakiriya binjiza imodoka kugira ngo bapakire izimaze gutunganywa, n’izindi zisohoka mbese ari urujya n’uruza rw’abakozi, abakiriya n’abacuruzi.

Muri bo, nta n’umwe ufite ibiro yashyiramo mudasobwa kuko bose bakorera ahantu harangaye, bikaba bigoye buri wese kuba yazana mudasobwa ye ngo ayicarane ku gatebe ashobora gutera iruhande rw’imashini zisakuza, n’urujya n’uruza rw’abantu akenshi baba bataziranye.

Umwe mu bacuruzi yagize ati: “Ikoranabuhanga rya EBM twaryakiriye neza ariko turaribonamo imbogamizi ku ruhande rwacu, kuko biragoye gutunga mudasobwa mu kajagari kaba hano. Nubwo ndi umucuruzi ariko nisaturira imbaho, imodoka ziba zicicikana mu bibanza, zipakira imbaho ku buryo byaba byoroshye kuba n’iyo mudasobwa yakwangirika mu rujya n’uruza rw’abasatura n’abapakira imbaho mu modoka.”

Mugenzi we na we yagize ati: “Uretse kuba yakwangirika kuko imbaho ubwazo zishobora kuyigwira, hano mu gakiriro duhora duhanganye n’abajura biba ibyuma by’imashini zibaza. Gutunga mudasobwa bivuze ko hari n’ibyago byo kwibwa kuko nta biro dufite twajya tuzishyiramo ngo nuba ugiye kuvugana n’umukiriya ufunge.”

Abo bacuruzi bakomeza bashimangira ko izindi mbogamizi bagiye bahura na zo zishamikiye ku kuba bamwe mu muri bo baba batamenyereye gukoresha mudasobwa kandi byagorana ko buri wese yatanga akazi gahoraho ku giti cye, bitewe n’imiterere y’isoko ituma bashobora no kumara icyumweru, bibiri cyangwa bitatu batabona abakiliya.

Ibyo ngo byiyongeraho kuba n’igiciro basabwa kwishyuriraho inyemezabuguzi gishobora kubashyira mu gihombo bitewe n’uko cyafatiwe ku kigero cy’abazibaranguraho, kandi bo barazitakajeho n’ikiguzi cyo kuzitunganya.

Ikindi bavuga ko kibateye inkeke, ni uburyo nyuma y’iminsi 21 ya Guma Mu Rugo yatewe n’ubwiyongere bw’icyorezo cya COVID-19 bahise bahabwa amabaruwa abasaba kuba batangiye gukoresha EBM batiteguye kandi benshi muri bo badasanzwe batunze mudasobwa.

Uwitonze Paulin, Komiseri Wungirije ushinzwe abasora mu Kigo cy’Imisoro n’Amahoro (RRA), yatangarije Imvaho Nshya ko EBM kuri bose ari umushinga udasubira inyuma, cyane ko ari itegeko ririmo gushyirwa mu bikorwa risaba buri mucuruzi wese gutanga inyemezabuguzi ikozwe mu buryo bw’ikoranabuhanga.

Ibibanza by’abacuruza imbaho biba byuzuyemo urujya n’uruza rw’abazisatura, abazirangura imodoka zipakira n’urusaku rw’imashini zisatura

Yahamije ko abenshi mu bacuruzi bamenyeshejwe ko bagomba guherwaho basanzwe bafite mudasobwa kuko ubucuruzi bwabo badashobora kubukora batazitunze; ariko avuga ko abadafite mudasobwa na bo hari ibisubizo biri hafi gukemura ikibazo cyabo.

Muri ibyo bisubizo harimo ikoranabuhanga rishobora gushyirwa muri telefoni zigezweho (smartphone), biba bigoranye ko wabona umucuruzi utayitunze,  ku buryo bizaborohera gutanga inyemezabwishyu bidasabye gutunga mudasobwa.

Ikindi gisubizo ni icy’abadatanga inyemezabwishyu inshuro nyinshi ku munsi bagiye gushyirirwaho uburyo bashobora kuzitanga bagiye kuri murandasi bakinjira ku rubuga rwa RRA.

Uwitonze Paul yagize ati: “Hari bisubizo byinshi biri kugenda bitegurwa ku buryo n’abadashoboye gukoresha izo mudasobwa bashobora kubona ibindi bisubizo byabafasha ariko icy’ingenzi tugomba kumvikanaho ni uko imashini ni iy’umuntu ku giti cye, nta bwo uyikoreraho EBM gusa. Ubundi yayikoresha no mu bindi bintu bitandukanye mu bucuruzi bwe, ni umutungo we, icyo tumuha ni software y’ubuntu tukanamuhugura uko ikoreshwa.”

Akomeza ashimangira ko “application” zizashyirwa muri telefoni zigezweho ziri mu igeragezwa rya nyuma ku buryo mu gihe cya vuba zizaba zatangiye kugezwa ku bacuruzi.

Hakomeje gahunda yo gusura abafite imbogamizi zihariye

Ku basora bafite imbogamizi zihariye ku mikorere n’imikoreshereze ya EBM, Uwitonze avuga ko RRA ikomeje gusura ibyiciro bitandukanye by’ubucuruzi kugira ngo imenye izo mbogamizi n’uburyo zashakirwa ibisubizo bigamije kurushaho kunoza imikoreshereze y’ikoranabuhanga.

Ati: “Icyo nabamenyesha ni uko turi kugenda duhura n’abo mu nzego zitandukanye z’ubucuruzi; niba hari abari mu mbaho, abari mu bwubatsi, abari mu mahoteli n’ahandi. Baratugaragariza imbogamizi bafite tukazigira hamwe, tugashaka n’umuti. Abo tutarageraho ngo tubaganirize batwandikira bakatubwira ko bakeneye amahuugurwa cyangwa se ibiganiro kuri iyi gahunda n’uburyo bayubahiriza kurushaho, hanyuma tugateganya umwanya tukabasura tukabiganiraho.”

Gahunda ya EBM ku bacuruzi bose bayimenyeshejwe mu mpera z’umwaka ushize wa 2020, bibutswa ko izatangirana n’umwaka wa 2021, ariko hagiye hazamo n’imbogamizi zaturutse ku cyorezo cya COVID-19.

Ubuyobozi bwa RRA buvuga ko kuva uyu mwaka watangira hari abasora bateye intambwe yo kuza gusaba iryo koranabuhanga, gusa ngo ubwitabire bwabo ntiburaba bwinshi by’umwihariko nko mu Mujyi wa Kigali hahise haba gahunda ya Guma Mu Rugo bamwe bagahita bafunga ubucuruzi bwabo.

Gahunda yo gutanga ikoranabuhanga rya EBM no guhugura abasora irakomeje muri iki gihe mu Mujyi wa Kigali abasora bemerewe gukoresha 30% by’abakozi. Abacuruzi baributswa ko ikoranabuhanga rishya rya EBM ribafitiye akamaro, kuko ribafasha mu ibaruramari n’icungamutungo, bikaborohereza no kumenya uko ubucuruzi bwabo buhagaze batarinze gushyuha umutwe.

Agakiriro ka Gahanga gaherereye mu Murenge wa Gahanga mu Karere ka Kicukiro

Umwanditsi:

Imvaho Nshya

One Comment on “Kigali: Abasora bacuruza imbaho batewe inkeke no gutunga mudasobwa”

Tanga Igitekerezo

Email yanyu ntigaragazwa ku rubuga. Amazina na Email ni ngombwa.