22°C , Mostly cloudy | Kigali-Rwanda
Abaminisitiri mu by'ingufu n'abandi bayobozi batandukanye bo mu bihugu bihuriye mu muryango PEAC, ubwo batangizaga inama yiga ku kongera imishinga y'ingufu z'umuriro muri Afurika yo hagati (Foto MININFRA)

Kigali: Abaminisitiri mu by’ingufu barasuzuma imishinga yo kongera amashanyarazi

Yanditswe na MUTUNGIREHE SAMUEL

Ku ya 08-06-2018 saa 05:49:13

Abaminisitiri muri Minisiteri zishinzwe ingufu zo mu bihugu 11 byibumbiye mu muryango w’inzego zigize igice k’ingufu cy’Afurika yo hagati (PEAC), bateraniye i Kigali barebera hamwe imishinga ijyanye n’imiyoboro migari, yo kongera ingufu z’amashanyarazi muri ibyo bihugu.

Abaminisitiri mu by’ingufu n’abandi bayobozi batandukanye bo mu bihugu bihuriye mu muryango PEAC, ubwo batangizaga inama yiga ku kongera imishinga y’ingufu z’umuriro muri Afurika yo hagati (Foto MININFRA)

Ibihugu bigize uwo muryango (PEAC) birimo u Rwanda, Repubulika Iharanira Demokarasi ya Kongo, Centarafurika, Tchad, Congo, Gabon, Guinea Equatorial, Sao Tome, Cameroun, u Burundi na  Angola.

Ubwo yatangizaga iyo nama ngarukamwaka ejo hashize tariki ya 7 Kamena 2018, ibaye ku nshuro ya 18, Minisitiri w’Ibikorwa Remezo Amb. Gatete Claver, yavuze ko buri gihugu cyumva akamaro k’ingufu z’umuriro mu iterambere ry’abaturage.

Ati “Birazwi ko abaturage bacu bataragezwaho umuriro w’amashanyarazi, bityo hakenewe ishoramari rinini ryo gukora, gukwirakwiza no kugeza umuriro ku baturage”.

Yakomeje avuga ko iryo shoramari rikomeza kuba ikibazo na ryo igihe ukoresha umuriro agihenzwe n’ibiciro byawo akaba yizera ko iyo nama izasiga hari ingamba zifashwe kuri ibyo bibazo byose.

Umunyamabanga wa Leta muri Minisiteri y’Ibikorwa Remezo ushinzwe ingufu, Eng. Kamayirese Germaine, yasobanuye ko nk’u Rwanda hari byinshi ruzungukira muri uwo muryango bigiye kuganirwaho n’abaminisitiri mu by’ingufu bateraniye mu Rwanda.

Ati “Ni inyungu ku Rwanda nk’igihugu kirimo kwiyubaka kuko dushaka amashanyarazi; aho dushobora kuzagura ku baturanyi cyangwa se natwe tukaba twagurisha ku baturanyi. Uko dukora amashanyarazi mu gihugu, dutekereza ko dushobora no kuyagura aturutse mu baturanyi, kandi uko tuyagwiza ni na ko dushobora kuyagurisha.

Hari imishinga itandukanye ihuza ibihugu, ariko natwe nk’u Rwanda hari umushinga uzaza uri muri uyu muryango, u Rwanda, Kongo (RDC) n’u Burundi bihuriramo, noneho na Kongo (RDC) ikazahura n’ibindi bihugu kugeza ubwo mu by’ingufu z’umuriro tubasha guhuriza hamwe umushinga wa Rusizi ya III, kandi biri mu byo turimo kuganiraho bizakorwa vuba aha”.

Umunyamabanga uhoraho w’umuryango PEAC, Mukondongo Jean Claude, yavuze ko nubwo kuva mu 2003 umuryango PEAC watangizwa kugeza ubu nta mushinga bari bashyira mu bikorwa ngo utange ingufu z’umuriro, ariko barabyigaho, kuko hari imishinga igera kuri 20 y’ibanze n’indi 10 igeragezwa mu gihe gito kandi bisaba imyaka iri mu icumi kugira ngo umushinga urangire, bikanasaba miliyoni zirenga icumi z’amadolari y’Amerika bikaba ari yo mpamvu nta kirakorwa.

Mu nama yabanjirije iyahuje abaminisitiri, yagaragaje ko inyigo yakozwe ku bihugu by’Afurika yo hagati igaragaza ko hari amahirwe yo kubona ingufu z’umuriro ziturutse ku migezi n’inzuzi biri muri ibyo bihugu, zingana na megawati ibihumbi 150, bingana na 58% by’umuriro wose waboneka ku mugabane w’Afurika.

TANGA IGITEKEREZO

Leave a Reply

Be the First to Comment!

avatar