19°C , Partly cloudy | Kigali-Rwanda

Kigali: Abakobwa 4 bafungiwe gusakaza amashusho yabo y’urukozasoni

Yanditswe na Imvaho Nshya

Ku ya 31-07-2020 saa 12:33:08
Abo bakobwa bavuga ko nubwo bashutswe batari bazi ko gukwiza amafoto y'ubwambure bwabo ari icyaha gihanwa n'amategeko

Urwego rw’Igihugu rw’Ubugenzacyaha (RIB), rwerekaye abakobwa bane batawe muri yo mbi nyuma yo gufatwa amashusho y’urukozasoni bayayakwirakwiza ku mbuga nkoranyambaga.

Ubuyobozi bwa RIB buvuga ko abo bakobwa uko ari bane bakukirikiranyweho icyaha cyo gushyira amashusho y’urukozasoni ku mbuga nkoranyambaga, bakaba barafashwe bimaze kumenyekana ko bakorana n’umugabo ucuruza abakobwa mu bikorwa by’ubusambanyi ari na we wabafashaga gushyira aya mashusho ku mbuga nkoranyambaga.

Umwe mu bafashwe, avuga ko yari kumwe n’inshuti ye y’umukobwa bajya gusura umuhungu. Uwo muhungu basuye ngo yabasohokanye ku kabari kitwa Pili Pili, bagezeyo abagurira inzoga barasinda, maze abasaba kwerekana ubwambure bwabo ku rubuga rwa ‘instagram’.

Ubwo bo n’abandi bagenzi babo babiri berekwaga itangazamakuru kuri uyu wa Gatanu tariki ya 31 Nyakanga 2020, abafashwe bavuze ko batari bazi ko kwerekana amashusho bambaye ubusa ari icyaha gihanwa n’amategeko mu Rwanda.

Umwe muri bo yagize ati: “Tumaze gusinda twatangiye kwiyerekana twambaye ubusa, ntabwo nari nzi ko mu Rwanda bitemewe, ntabwo byari ibyo kuryamana na we, ahubwo byari ukwambara ubusa gusa, bwarakeye numva nkozwe n’ikimwaro, ndasaba imbabazi umuryango Nyarwanda ko nawukojeje isoni”.

Bahorera Dominique, Umujyanama w’ Umunyamabanga Mukuru wa RIB akaba arimo gukora nk’Umuvugizi w’ w’Umusigire, yabwiye itangazamakuru ko abo bakobwa bafatanywe n’umusore usanzwe acuruza amashusho y’urukozasoni.

Uwo mugabo ngo abanza guha abana b’abakobwa ibiyobyabwenge mbere yo kubakoresha ibikorwa by’urukozasoni birimo no kwiyerekana bambaye ubusa, hanyuma akabacuruza kugira ngo bage kubasambanya.

Bahorera yagize ati: “Icyo aba agamije ni uko abantu iyo bamaze kureba amashusho y’umukobwa wambaye ubusa bahindukira bakamubwira ko bumva bashaka kuryamana na we, icyo gikorwa kiganisha ku icuruzwa ry’abantu n’ibiyobyabwenge, kandi harimo no kwangiza umuco Nyarwanda”.

Ingingo ya 38 y’Itegeko No 60/2018 ryo ku wa 22/8/2018 ryerekeye gukumira no guhana ibyaha bikoresheje ikoranabuhanga, ivuga ko umuntu wese, utangaza, wohereza cyangwa utuma hatangazwa ubutumwa ubwo ari bwo bwose bw’urukozasoni akoresheje mudasobwa cyangwa urusobe rwa mudasobwa, aba akoze icyaha.

Iyo abihamijwe n’urukiko, ahanishwa igifungo kitari munsi y’amezi atandatu, ariko kitarenze imyaka ibiri, n’ihazabu y’amafaranga y’u Rwanda atari munsi ya miliyoni imwe, ariko atarenze miliyoni ebyiri.

Iyo ubutumwa bw’urukozasoni buvugwa mu gika cya mbere k’iyi ngingo budahuye n’ukuri cyangwa bureba umwana, uwahamwe n’icyaha ahanishwa igifungo kitari munsi y’imyaka itatu ariko kitarenze imyaka itanu, n’ihazabu y’amafaranga y’u Rwanda atari munsi ya miliyoni imwe ariko atarenze miliyoni eshatu.

Umwanditsi:

Imvaho Nshya

7 Comments on “Kigali: Abakobwa 4 bafungiwe gusakaza amashusho yabo y’urukozasoni”

  1. Nibabahane ariko harinabandi benshi cyane bakwiye ibihano Indirimbo zisohoka nibyo bashyira kuri istagram nibyo bagire icyo bakora peeeee rib mudufashe gushyira abanyarwanda kumurongo

  2. Bazampanire n’umusore wiyita Naomie kuko na we akora ibikorwa nk’ibyo yigize umukobwa Kandi ari n’umusore agacuruza abakobwa muri ubwo buryo. Rwose nibamushaka bazambwire mutange.

  3. Mwibahisha mumaso mubagaragaze tubarebe abo basebya Rwanda koko ibyo nibintu baba bakoze mubahane uwo muhungu we akatirwe burundu

Tanga Igitekerezo

Email yanyu ntigaragazwa ku rubuga. Amazina na Email ni ngombwa.