27°C , Mostly cloudy | Kigali-Rwanda

Kigali: Abafite ibibanza barasabwa kubyubaka

Yanditswe na KAYITARE JEAN PAUL

Ku ya 26-04-2018 saa 05:51:49

Ubuyobozi bw’Umujyi wa Kigali burasaba abafite ibibanza muri uyu mugi bafite ibyangombwa byo kubaka n’abatangiye kubaka bagahagarara, ko bakubaka, kuko biteza umwanda n’umutekano muke mu mugi.

Ibi byagarutsweho na Busabizwa Parfait, umuyobozi w’Umujyi wa Kigali w’agateganyo, ejo hashize ku wa 25 Mata 2018. Yavuze ko abafite ibibanza kimwe n’abari baratangiye kubaka bakabihagarika bakwihutira kubaka kuko ngo biteza umutekano muke n’umwanda.

Busabizwa Parfait, Umuyobozi w’agateganyo w’Umujyi wa Kigali usaba abafite ibibanza kubyubaka

Busabizwa Parfait yagize ati “Abafite ibibanza bafite icyangombwa cyo kubaka bubake kuko biradutera ikibazo, hari ibibanza bimaze kuba umwanda, ubona bimaze imyaka nta we ubyubakamo biri aho, birimo ibihuru ndetse hari n’ahandi biteza umutekano muke kubera ko murabona ko ikibanza hari abantu bagenda bakakibika bagashyiraho amabati ukagira ngo agiye gutangira kubaka warungurukamo ugasanga ni ibigori byatangiye kumera. Biraduteza rero umutekano muke”.

Akomeza avuga ko hari n’abandi batangiye kubaka bageza hagati bagahagarara, akavuga ko ibyo nabyo ari umwanda kandi binateza umutekano muke.

Ubuyobozi bw’Umujyi wa Kigali bugaragaza ko hari amategeko ashobora gutuma bwambura ibyo bibanza ba nyirabyo ariko ko ngo nta mpamvu yuko babibambura ahubwo bugasaba ko abashoramari bafite ibyangombwa babyaza umusaruro ibibanza bafite bityo barinde Umujyi wa Kigali umwanda n’umutekano muke.

Umujyi wa Kigali kandi ubu wakoze amavugurura mu bijyanye n’imyubakire. Busabizwa asobanura ko aya mavugururwa azafasha kugabanya ibisabwa kugira ngo umushoramari abone icyangombwa cyo kubaka, bikava mu byiciro 15 bikaba 7 no kugabanya iminsi 113 kugera kuri 55 kugira ngo umuntu abone ibisabwa byose kandi bikazagabanya ikiguzi ibi byose byatwaraga.

Aya mavugururwa agamije kugabanya isiragira ryagaragaraga kugira ngo umuntu abone icyangombwa cyo kubaka no kugabanya iminsi yo kubona icyangombwa cyo kubaka. Biteganyijwe ko aya mavugurura azashyirwa mu bikorwa mu kwezi kwa Gicurasi uyu mwaka.

Bimwe mu bizashingirwaho muri aya mavugurura ni uko hazajya hakurikizwa ingaruka umushinga wo kubaka inzu ushobora kugira ku bidukikije, imishinga y’inzu ziciriritse n’iz’ububiko ntibisaba isuzuma ry’ubutaka kugira ngo umuturage abone icyangombwa cyo kuzubaka.

Abagiye gutangira kubaka ntibazajya basabwa kumenyesha ibiro bishinzwe ubutaka mu gihe bagiye gutangira kubaka nyuma yo kubona icyangombwa, aha akaba ari ho ubuyobozi bw’umujyi buhera busaba abafite ibibanza kubyubaka ndetse n’abari barahagaze kubyubaka bagakomeza imirimo yabo kuko aya mavugururwa araborohereza.

Ubuyobozi bw’Umujyi wa Kigali buratangaza ko mu myaka itanu ishize umugi washyizeho ingamba zo gufasha ishoramari mu myubakire no kunoza imitangire ya serivisi mu rwego rwo gushyira igishushanyo mbonera cy’umugi mu bikorwa.

TANGA IGITEKEREZO

Leave a Reply

Be the First to Comment!

avatar