26°C , Partly sunny | Kigali-Rwanda
Umuyobozi w'akarere ka Kicukiro, Dr. Nyirahabimana Jeanne uri imbere, asobanurira abavuga rikumvikana bo muri ako karere uko igishushanyombonera kizabafasha kwinjiza imisoro yisumbuye

Kicukiro: Kongera ibikorwaremezo bizabafasha kwinjiza miliyari zirenga 8

Yanditswe na MUTUNGIREHE SAMUEL

Ku ya 19-02-2018 saa 07:26:37

Umuyobozi w’Akarere ka Kicukiro, Dr. Nyirahabimana Jeanne yatangaje ko nubwo akarere abereye umuyobozi ari ko kugeza ubu kinjiza amafaranga make mu turere tugize Umujyi wa Kigali, bateganya kongera ibikorwaremezo ku buryo umwaka utaha bazaba binjiza miliyari 8.1, zivuye kuri miliyari 5.6 bagezeho muri uyu mwaka, ziturutse mu kongera ibikorwaremezo kimwe mu by’ibanze akarere gakuraho imisoro myinshi.

Umuyobozi w’akarere ka Kicukiro, Dr. Nyirahabimana Jeanne uri imbere, asobanurira abavuga rikumvikana bo muri ako karere uko igishushanyombonera kizabafasha kwinjiza imisoro yisumbuye

Yabitangaje ejo hashize, tariki ya 18 Gashyantare 2018, ubwo abayobozi b’ako karere bahuriraga hamwe n’abavuga rikumvikana bo muri ako karere n’abandi bayobozi mu nzego za Leta bagatuyemo, hagamijwe kurebera hamwe aho iterambere ry’akarere rigeze mu mihigo kihaye umwaka wa 2017/2018 no kureba uko ishyirwa mu bikorwa ry’igishushanyombonera cy’Umujyi wa Kigali ryarushaho gusobanurirwa abaturage mu iterambere.

Dr. Nyirahabimana yavuze ko muri gahunda y’igishushanyombonera cy’Umujyi wa Kigali, akarere gafitemo umwihariko wako cyane mu bijyanye n’imiturire mu bice bizatuzwamo abaturage n’ibice bizakoreramo ubucuruzi nka bimwe mu bizaturukaho imisoro myinshi akarere gateganya.

Ati “Iyo ahantu hamaze gutunganywa habaye aho gutura; ntabwo ikibanza cyo gutura gisorerwa nk’ahabarwaga nk’ubuhinzi. Niba dutunganyije ahagenewe inganda ntabwo ahagenewe uruganda hasora nk’aho gutura gusa, igiciro kigenda kiyongera kuko hari ibihaza bijyanye n’icyo gikorwa kandi bifasha abahari, ibyo biri mu byo tubona bizaduha amafaranga.

Ahandi, noneho za nganda niba zije hari ibyo zisorera, niba tuzanye umuhanda wa kaburimbo, aho hantu havuka ibindi bikorwa by’ubucuruzi byinjiza amafaranga ku muturage ariko bininjiza umusoro kuri Leta. Ni ibyo bikorwa twebwe tureba, tukavuga ngo ibi tugiye kubitunganya ariko turabona mu minsi iri imbere bizongera amafaranga yinjiraga mu karere.”

Yongeyeho ko muri gahunda barimo yo gutunganya aho gutura n’ahandi bishoboka ko hari n’abantu badasora, ariko bari gutunganya ku buryo nta muntu ufite ubutaka muri Kigali uzongera kubihisha atabusorera.

Mu bikorwa Umuyobozi w’Akarere yeretse abavuga rikumvikana ku bijyanye n’Igishushanyombonera birimo ubuso bungana na 7% by’ahagomba gutunganywa. Ahagenewe gutura hangana na 43%, ahakomye hangana na 26%, ah’inganda hangana na 5%, ahagenewe ubucuruzi hangana n’ahagenewe ibindi bikorwa hangana na 13%.

Bamwe mu bayobozi batanze ibitekerezo barimo  Imboni y’ako karere ka Kicukiro, akaba na Minisitiri ushinzwe Imirimo y’Inama y’Abaminisitiri, Kayisire Marie Solange yasabye buri wese kubigira nk’ibye kugira ngo Kicukiro ibe Akarere k’isuku mu Mujyi wa Kigali kandi kari imbere mu  biteza imbere imibereho myiza y’abaturage.

Umuyobozi w’Umuryango mpuzamahanga wo kurwanya ruswa n’akarengane, ishami ry’u Rwanda Ingabire Marie Immaculée yasabye bagenzi be ko bafatanya bakubaka imihanda.

Umuvunyi Wungirije, Yankurije Odette yabagiriye inama ko bajya babanza gukemura ibibazo by’abaturage bakamenya ko birangiye kuko iyo bitarangiye neza bijya bituma havuka ibindi.

TANGA IGITEKEREZO

Leave a Reply

Be the First to Comment!

avatar