21°C , Mostly cloudy | Kigali-Rwanda
Abagize irondo ry'umwuga mu murenge wa Gatenga biyerekana (Foto Sezibera A.)

Kicukiro: Irondo ry’umwuga ryasabwe kuzuzanya n’inzego z’umuteno mu kurinda abaturage

Yanditswe na SEZIBERA ANSELME

Ku ya 14-09-2018 saa 08:31:19

Uhagarariye urwego rw’Inkeragutabara mu karere ka Kicukiro Maj. Karasira Eugene, yatanze ubutumwa bukangurira abagize Irondo ry’umwuga mu murenge wa Gatenga mu karere ka Kicukiro basoje amahugurwa gusobanukirwa n’inshingano bafite, abashishikariza kumenya umubare w’abo barinze kugira ngo bafatanyije n’izindi nzego zibakuriye babashe kubacungira umutekano.

Abagize irondo ry’umwuga mu murenge wa Gatenga biyerekana (Foto Sezibera A.)

Ibyo byagarutsweho mu gikorwa cyo gusoza amahugurwa y’ukwezi kumwe y’abagize irondo ry’umwuga bo mu murenge wa Gatenga mu karere ka Kicukiro bangana na 165, kuri uyu wa 13 Nzeri 2018.

Maj. Karasira agira ati: “Iyo urinda umuntu, uko umukurikirana ni nako na we agukurikirana, ntiwarinda umuntu utazi bityo murahamagarirwa kumenya abo murinze, mumenye kwa kanaka, abahatuye, uko babaho ni bwo muzamenya amakuru yabo murinze.”

Maj. Karasira asaba urwo rwego gutangira amakuru ku gihe kugira ngo agere ku nzego zibakuriye zibafashe mu kurinda ibyaha kuko amakuru atangirira aho baba bari ubwabo kandi ahari ibibazo baba bahazi neza ariko bakaba batarashobora kwitandukanya na byo.

Agira ati: Abanywa urumugi n’abarucuruza muba mubazi, ndabasaba kuba inyangamugayo, kuba abanyakuri kugira ngo murinde umutekano kandi mukarangwa n’indangagaciro bityo abaturage bandi bakabareberaho. Mwitandukanye n’ababashukisha ruswa ngo mubakingire ikibaba mu byaha bakoze.”

Umuyobozi w’Ingabo wungirije mu karere ka Kicukiro Maj. Mutagoma Emmanuel, abishimangira asaba abakora Irondo ry’umwuga kuzirikana icyo amahugurwa bahabwa abasigira no guhora biteguye kunoza akazi neza kandi bakubahisha umwambaro w’akazi bambaye birinda kuwukoresha ibyo bishakiye.

Agira ati Muheshe uwo mwambaro mwambaye agaciro, si uwo kujyana mu tubari kunywa inzoga. Mube inyangamugayo mwirinda ibiyobyabwenge na ruswa z’amafaranga 1000 kuko bibusanya n’inyigisho mwahawe, murye duke kuko arit wo dufite akamaro.”

Maj. Mutagoma abibutsa ko nibarangwa no gufatanya n’Ingabo z’Igihugu, Polisi y’Igihugu n’urwego rwa DASSO bagashyira hamwe, bagahuza imyumvire, nta cyaha cyaboneka kuko ari cyo barwanira.

Ati: Duhashye urumogi, ubujura bucukura amazu n’ibindi byaha kuko abazanga kubivamo hari izindi nzira bizakorwamo bakabicikaho. Mwirinde amatiku n’amakimbirane kuko ari bwo akazi kagenda neza.”

Uyu muyobozi w’Ingabo wungirije mu karere ka Kicukiro Maj. Mutagoma Emmanuel yakomeje asaba abayobozi b’Utugari n’Imidugudu gukorana neza kugira ngo n’irondo rikorwe neza kuko hari abagaragara ko badashyiramo imbaraga, bityo ugasanga hari abinjira mu kazi k’irondo ry’umwuga bazwiho ingeso yo kunywa urumogi cyangwa ubujura.

Ushinzwe irondo ry’umwuga muri uyu murenge wa Gatenga ho muri Kicukiro, Mutanguha J. Claude, atangaza ko abanyerondo bahuguwe ku masomo 15 ku bintu bitandukanye birimo amasomo ajyanye n’ubuzima, gukumira ibyaha, ikinyabupfura, imikoranire n’inzego, gucunga umutekano n’ubwizigamire. Mutanguha agashimangira ko buri kwezi abanyerondo b’umwuga bazajya bahugurwa ku isomo runaka rigamije kubongerera ubumenyi.

Umuyobozi w’umwe mu midugudu igize Gatenga unahagarariye bagenzi be ari na bo bashinzwe irondo bya hafi Murangira Fazili, yatangaje ko abaturage bamaze kugirira ikizere urwo rwego rw’irondo ry’umwuga kubera umusaruro rubagaragariza kandi aboneraho gushima abaturage kubera ko bahemba abanyerondo b’umwuga bakanabashakira imyambaro.

Umuyobozi ushinzwe ishami ry’igenamigambi muri sosiyete y’ubwishingizi Radiant Gakuru James, avuga ko nk’umufatanyabikorwa w’Akarere ka Kicukiro mu by’umutekano bagaragaje uruhare rwa Radiant mu kubahiriza no gushyira mu bikorwa irindo ry’umwuga mu murenge wa Gatenga basinyana amasezerano y’umwaka umwe mu bwishingizi ku banyerondo.

Gakuru avuga ko batanze ubwishingizi bw’impanuka kuri abo banyerondo 172 mu gihe bari mu nzira bajya ku kazi, bari mu kazi n’igihe bari mu nzira bakavaho, kandi bakaba bafite gahunda yo kuyagurira mu yindi mirenge igize aka karere ka Kicukiro.

Umunyamabanga Nshingwabikorwa w’Umurenge wa Gatenga muri Kicukiro Manevure Emmanuel ashimira ubuyobozi bw’igihugu bwabashyiriyeho urwego rw’Irondo ry’umwuga n’uruhare rwaryo mu kunganira izindi nzego zisanzwe zihari mu kubungabunga umutekano w’igihugu.

Avuga ko iri rondo rigitangira ritakoraga neza n’abaturage bakaba batari barifitiye ikizere, ariko nyuma y’amahugurwa bahabwa byagize impinduka. Manevure yibutsa iri rondo ko agaciro n’ikizere bazagirirwa ari bo bazabyihesha, bakabyishakamo bashingiye ku mikorere yabo n’uburyo bitwara. Yashimye ubuyobozi bw’Ingabo zIgihugu kugira ubufatanye n’umurenge ayobora mu kubaka ubushobozi bw’irondo kugira ngo abarigize bashobore kumva neza ibyo bakora n’ibyo abaturage babatezeho.

Mu kurushaho kunoza no koroshya akazi k’irondo ry’umwuga hakaba haratanzwe amatelefone ndendanwa ku rwego rw’umudugudu ndetse buri munyerondo ahabwa ubwishingizi mu kazi.

Irondo ry’umwuga rikaba rikora akazi ko gucunga umutekano, ariko kandi n’abaturage bawucungirwa bakagira uruhare rugaragara mu gutanga amakuru ya ngombwa ku gihe, kugira ngo hirindwe icyo ari cyo cyose cyahungabanya umutekano aho batuye.

Umutekano w’igihugu ni wo shingiro ry’iterambere ryacyo, kuko nta cyo abagituye bashobora gukora igihe cyose badafite umutekano, ari yo mpamvu mu Rwanda buri wese aba asabwa kuwugiramo uruhare, anarugira mu kurinda ibimaze kugerwaho.

 

 

TANGA IGITEKEREZO

Leave a Reply

Be the First to Comment!

avatar