23°C , Partly sunny | Kigali-Rwanda

Kicukiro: Ingo 56 ziyubakiye kaburimbo yatwaye miriyoni 22 Frw

Yanditswe na UWAMARIYA OLIVE

Ku ya 03-07-2020 saa 12:43:46
Abayobozi bitabiriye igikorwa cyo gutaha umuhanda wa kaburimbo yubatswe n'abaturage bo mu Mudugudu w'Ubumwe

Abaturage bagize ingo 56 zo mu Mudugudu w’Ubumwe, Akagari ka Rubirizi, Umurenge wa Kanombe mu Karere ka Kicukiro mu Mujyi wa Kigali, biyujurije umuhanda wa kaburimbo wa metero 750 watwaye miriyoni 22 z’amafaranga y’u Rwanda.

Umuhango wo gutaha uwo muhanda wabaye ku wa kabiri tariki 2 Kamena 2019 mu rwego rwo kwizihiza isabukuru ya 26 yo Kwibohora, witabiriwe n’ubuyobozi bw’Umurenge wa Kanombe n’Akarere ka Kicukiro.

Umunyamabanga w’Umuryango FPR–Inkotanyi ku rwego rw’Akarere ka Kicukiro, Umubyeyi Monique, yashimiye
abaturage ubwitange n’umwete bagira mu kwiyubakira igihugu, kubera ibikorwa by’indashyikirwa n’ubutwari bakomeje kugaragaza mu kubaka igihugu.

Yagize ati “Mbashimiye ko mwitanze mukiyubakira uyu muhanda. Ibi bigaragaza kwibohora nyako”.

Abayobozi bafungura ku mugaragaro umuhanda wa kaburimbo abaturage bo mu Mudugudu w’Ubumwe biyubakiye

Yashimiye kandi ubuyobozi bw’inzego z’ibanze buhesha ishema umurenge wa Kanombe kubera ubufatanye.

Umuyobozi w’Umudugudu w’Ubumwe Matata Jean Baptiste, yashimiye abaturage bigomwe muri bike bafite kugira ngo bagere kuri iki gikorwa.

Ati: “Mbashimiye uruhare mwagize, mukitanga uko mushoboye ngo uyu muhanda wa kaburimbo udufashe kurushaho gutura heza.”

Yashimiye kandi komite nyobozi uburyo yegereye abaturage.

Umwe mu baturage batuye muri uwo mudugugu bashimiye ubuyobozi bwiza, banishimira uwo muhanda biyujurije.

Yagize ati “Uyu muhanda wa kaburimbo, wubatswe ku ruhare rwacu nk’abaturage bigaragaza ko twasobanukiwe neza ko kwibohora nyako ari ukwiyubakira Igihugu. Tunejejwe no kuba duciye ukubiri n’ivumbi n’icyondo. Ubu dutuye neza kandi heza”.

Uwo muhanda uje ukurikira indi mihanda ibiri abaturage bo muri uwo mudugudu bishyiriyemo kaburimbo.

Umwanditsi:

UWAMARIYA OLIVE

One Comment on “Kicukiro: Ingo 56 ziyubakiye kaburimbo yatwaye miriyoni 22 Frw”

  1. Kwibohora ni ukureba ikibazo kikubangamiye ukakikiza ubu ikibazo cyivumbi nubunyerere kivuyeho murakoze baturage bumudugudu wubumwe

Tanga Igitekerezo

Email yanyu ntigaragazwa ku rubuga. Amazina na Email ni ngombwa.