21°C , Partly sunny | Kigali-Rwanda
Umuyobozi w'akarere ka Kicukiro, Dr. Nyirahabimana Jeanne, avuga ko mu gukoresha neza ingengo y'imari bita no ku bitekerezo by'abaturage

Kicukiro: Ingengo y’imari imaze gukoreshwa ku kigero cya 62%

Yanditswe na MUTUNGIREHE SAMUEL

Ku ya 15-02-2018 saa 05:52:25

Akarere ka Kicukiro kagaragarije itsinda ry’abadepite ba Komisiyo y’ingengo y’imari ko mu mezi atandatu y’umwaka wa 2017/2018 bamaze gukoresha ingengo y’imari ku kigero cya 62% mu bikorwa bitandukanye akarere gashyize imbere mu kwesa imihigo y’uwo mwaka no mu iterambere.

Umuyobozi w’akarere ka Kicukiro, Dr. Nyirahabimana Jeanne, avuga ko mu gukoresha neza ingengo y’imari bita no ku bitekerezo by’abaturage

Umuyobozi w’Akarere ka Kicukiro, Dr. Nyirahabikamana Jeanne, yavuze ko habayeho imikoreshereze myiza y’ingengo y’imari muri ayo mezi kandi n’amafaranga agenda aturuka hirya no hino yabonetse bidasabye kuyategereza ku buryo byarinda kwica ishyirwa mu bikorwa ry’igenamigambi.

Ati “Ubona ko uko imyaka igenda yiyongera abaterankunga bagenda bahuguka kandi bagakora ibintu bikanoga bigakoreshwa neza kurushaho. Ni yo mpamvu usanga n’amafaranga aza vuba n’ibikorwa bigakorwa vuba; ni ukuvuga ngo mu mezi yandi asigaye turumva uko twabiteganyije bikunda.”

Umunyamabanga Nshingwabikorwa w’Akarere ka Kicukiro, Rukebanuka Adarbert, wabimurikiye itsinda ry’abadepite rikuriwe na Depite Mukayuhi Rwaka Constance, yagaragaje ko ingengo y’imari akarere kagenerwa buri mwaka ikoreshwa imirimo itandukanye ari nabyo akarere karimo.

Mu buryo amafaranga yakoreshejwe n’aho yavuye, Rukebanuka yavuze ko mu mafaranga yoherezwa na minisiteri zitandukanye ateganyijwe yose muri uyu mwaka ari miliyari 8 zirenga amaze gukoreshwaho miliyari 5.4, binangana na 67%, mu mafaranga akarere kinjiza ubwako azaba miliyari 5.6 ubu hamaze kwinjizwa agera kuri miliyari 2.8 bingana na 51%.

Amafaranga aturuka mu zindi nzego za Leta akarere kamaze kubona miliyoni 122 agera kuri 97% ya miliyoni 125, ku mafaranga atangwa n’abaterankunga miliyoni 336 ateganyijwe bamaze kubonaho 252 angana na 75% byayo.

Ati “Muri make mu ngengo y’imari ya miliyari 14 amaze kwinjira ni miliyari 8 angana na 62%.”

Zimwe mu mbogamizi aka karere kavuga kahuye nazo, zirimo kuba amafaranga yaba ay’igihembwe cya mbere n’ay’igihembwe cya kabiri yose yaraje mu gihembwe cya gatatu, ni ukuvuga ko yabonetse mu gihembwe cya kabiri mu mpera z’umwaka ushize wa 2017.

Hari kandi kuba mu basora hari abataramenyera gukoresha ikoranabuhanga kandi ari ryo ubu ryimirijwe imbere mu gutanga imisoro n’urutonde rutaranoga rw’abagomba gusora no kurujyanisha n’impiduka zabayeho buri gihe.

Umunyamabanga Nshingwabikorwa w’Akarere ka Kicukiro, yakomeje avuga ko mu ngamba akarere kafashe kugira ngo kazinjize amafaranga kateganyije, zirimo gukora ibishushanyo mbonera byihariye kugira ngo bongere ahaturuka umusoro w’ubutaka cyane cyane bategura neza ahaturwa kugira ngo abahatuye bongere imisoro no gutangira gukodesha bimwe mu bikorwa remezo by’akarere nka gare ya Nyanza.

Hari kandi gukomeza gukorana n’Ikigo k’Igihugu k’Imisoro n’Amahoro (RRA) bagakomeza gukorana neza n’ikigo akarere kahaye gukusanya imisoro “Ngali Holding Ltd” bagakomeza kunoza amasezerano.

Mu bitekerezo, abadepite bagiriye inama Akarere ka Kicukiro mu gukoresha neza ingengo y’imari birimo guha umwanya ibitekerezo abaturage baba baratanze bumva muri uwo mwaka byakorwa, bakareba ibyo nk’akarere bahisemo impamvu ari byo byatoranyijwe n’ibyo baretse bakamenya impamvu yabyo.

Hari kandi gutegura impapuro zigaragaza uko ibikorwa byakozwe, uko byarangiye bijyana n’uko ingengo y’imari yabyo ihagaze n’uko yakoreshejwe cyane ku byahawe ba rwiyemezamirimo.

 

TANGA IGITEKEREZO

Leave a Reply

Be the First to Comment!

avatar