21°C , Intermittent clouds | Kigali-Rwanda
Dr Nyirahabimana Jeanne, Meya wa Kicukiro (Hagati), Mutambutsa Obedy wa RCN Justice & Démocratie (ubanza ibumoso) na Kanimba Nadia Belle umukozi wa MAJ (Foto Kayitare J.P)

Kicukiro: Imanza za Gacaca zirenga 900 ntizirarangizwa

Yanditswe na Kayitare Jean Paul

Ku ya 17-05-2019 saa 08:55:35

Ubuyobozi bw’Akarere ka Kicukiro mu Mujyi wa Kigali buravuga ko hari imanza zirenga 900 zifite imbogamizi mu irangizwa ryazo. Abahesha b’inkiko b’umwuga n’abatari ab’umwuga bagaragaza ko mu mikirize y’imanza za Gacaca n’iz’Inkiko hakirimo imbogamizi.

Ibi byagarutsweho ubwo Akarere ka Kicukiro kafatanyaga n’umufatanyabikorwa RCN Justice & Démocratie mu guhugura abahesha b’inkiko b’umwuga n’abatari ab’umwuga, n’abahagarariye Ibuka ku rwego rw’umurenge.

Meya w’Akarere ka Kicukiro, Dr. Nyirahabimana Jeanne, avuga ko inama nyunguranabitekerezo ku irangizwa ry’imanza bayitezeho kubafasha mu kubaha umurongo w’izo manza zose.

Avuga ku manza zitararangizwa, yagize ati “Imanza zimaze kurangizwa mu karere ni nyinshi ariko izo navuga ni izitararangizwa. Dufite imanza 1,111 zirimo n’iza Gacaca, izo mu rukiko hakaba n’imyanzuro y’Abunzi. Imanza za Gacaca zifite imbogamizi ni 994, izo zikaba ari imanza zifite ibibazo mu mirangirize yazo.”

Avuga ko imanza za Gacaca zishobora kurangizwa zidafite imbogamizi zigeze kuri 68 n’izigera kuri 40 mu myanzuro y’Abunzi n’imanza zigera ku 8 zanyuze mu nkiko.

Dr. Nyirahabimana yagaragaje imbogamizi mu irangizwa ry’imanza zitandukanye. Ati “Kutarangizwa kw’imanza biterwa n’imbogamizi zitandukanye. Urugero, hari umuntu ushobora kuba yari azwi ku izina ry’irihimbano ugasanga nta muntu n’umwe wakubwira uti yitwaga kanaka, yari atuye aha n’aha noneho kubijyana mu zindi nzego utazi amazina, ugasanga na byo ni ikibazo kugira ngo ubashe kumukurikirana.”

Kanimba Nadia Belle, Umuhuzabikorwa utanga ubufasha mu by’amategeko mu Karere ka Kicukiro, avuga ko bimwe mu byo bashinzwe harimo kurangiza imanza, ariko by’umwihariko ngo harimo no kunganira abatishoboye mu nkiko.

Kuri we avuga ko imbogamizi bahura na zo ari iz’uko hari abaturage batishoboye badashobora kwiyishyurira amafaranga y’ibyo basabwa kugira ngo urubanza rushyirwe mu bikorwa.

Ati “Imbogamizi tubona ni nk’iz’abaturage bagana abahesha b’inkiko batari ab’umwuga na MAJ kandi batishoboye ku buryo badashobora kwiyishyurira amafaranga y’ibyo asabwa kugira ngo urubanza rushyirwe mu bikorwa, nko kwishyura amatangazo n’igenagaciro.”

Mutebutsi Obedy, umukozi w’umuryango mpuzamahanga w’Ababiligi RCN Justice & Démocratie, avuga ko mu ntego zawo harimo kongerera ubushobozi inzego zitanga ubutabera bwegereye abaturage no kongerera ubushobozi abasaba ubutabera ari bo baturage.

Mutebutsi avuga ko kugeza ubu barimo kurebera hamwe imbogamizi zihari n’impamvu imanza zitarangizwa, icyakorwa kugira ngo imanza zirangizwe, n’impamvu imanza ziriho zitararangizwa.

Yagize ati “Twe nk’abafatanyabikorwa, uyu mwanya wateguwe wari uwo kugira ngo tubashe guha amakuru abahesha b’inkiko batari ab’umwuga kugira ngo bashobore gusobanukirwa ibigomba kwitabwaho n’uburyo bashobora kurangiza imanza.”

Akomeza avuga ko ibigomba kwitabwaho mu gihe cyo kurangiza imanza ari ukureba inzira zinyurwamo izo ari zo, imanza akarere gafite kandi zirimo imbogamizi uko zishobora gukurwaho.

Ati “Ibyo ni ukugira ngo bagire amakuru ahagije kuko akenshi iyo umuntu agiye kurangiza imanza aba agomba gusobanukirwa neza inzira zinyurwamo n’uburyo agomba kubikora.”

Umunyamabanga Nshingwabikorwa w’Umurenge wa Nyarugunga mu Karere ka Kicukiro akaba n’umuhesha w’inkiko utari uw’umwuga, Uwamahoro Genevieve, ashimangira ko mu manza zitari iza Gacaca nta mbogamizi nyinshi bahura na zo kuko ngo ziba zikurikije amategeko.

Ati “Tugira imbogamizi ariko nk’inkiko zisanzwe nta mbogamizi nyinshi zibamo kuko ziba zikurikije amategeko, ziteyeho kashe mpuruza n’uwatsinzwe ahari uretse kwa kwinangira k’umuturage watsinzwe wanga kurangiza urubanza ku neza.”

Avuga ku manza zarangijwe n’Inkiko Gacaca, Uwamahoro yemeza ko aho ari ho hari imbogamizi. Ati “Uyu munsi hari amarangizarubanza agaragara atariho kashe mpuruza kandi Inkiko Gacaca zarasojwe bigasaba ko umuntu asubira mu nkiko kugira ngo batezeho kashe mpuruza. Imbogamizi ihari cyane ni uko irangizarubanza riza ugasanga nk’umwirondoro uriho uwo muturage ntuzamubona bitewe n’amazina ariho.”

Rudasingwa Pierre, Umuhesha w’inkiko w’umwuga mu karere ka Kicukiro akaba ari no muri komite y’ubutabera muri aka karere, avuga ko hari imanza nyinshi zitarangizwa bigatuma abatsinze badahabwa ubutabera.

Mu bijyanye n’imanza zaciwe n’inkiko ngo zishobora kurangizwa kuko nta mbogamizi nyinshi ziba zirimo ariko ikibazo gikomeye bahura nacyo, kikaba ik’imanza Gacaca.

Ati “Imanza za Gacaca mu karere ka Kicukiro ziragera kuri 994 muri izo izishobora kurangizwa nta mbogamizi ni 68 urumva ko nta 10% zishobora kurangizwa. Izo mbogamizi zirimo ni uko zishobora kuba zaraciwe nabi cyangwa ugasanga zitavuga neza uburyo urwo rubanza rugomba kurangizwa. Ushobora gusanga barareze umuntu witwa Cederi, wajya mu muryango we bakakubwira ngo uwo muntu nta we twigeze tugira mu muryango wacu.”

Umunyamabanga Nshingwabikorwa w’umurenge yemerewe kurangiza imanza n’ibyemezo byafashwe n’Inkiko z’ibanze, Inkiko zisumbuye, Inkiko Gacaca, n’imyanzuro ya Komite z’Abunzi biri mu murenge akoreramo mu gihe Umunyamabanga Nshingwabikorwa w’akagari yemerewe gusa kurangiza imanza zaciwe n’Inkiko Gacaca hamwe n’imyanzuro ya komite z’abunzi biri mu kagari akoreramo.

Dr Nyirahabimana Jeanne, Meya wa Kicukiro (Hagati), Mutambutsa Obedy wa RCN Justice & Démocratie (ubanza ibumoso) na Kanimba Nadia Belle umukozi wa MAJ (Foto Kayitare J.P)

TANGA IGITEKEREZO

Leave a Reply

Your email address will not be published. Required fields are marked *