17°C , Partly cloudy with thunderstorms | Kigali-Rwanda
Ambasaderi w'Ubuyapani mu Rwanda, Mr Takayuki Miyashita ari kumwe n'abana barererwa muri CECYDAR nyuma yo gutangiza ibikorwa by'umuryango Honda Estilo (Foto Bugingo Fidele)

Kicukiro: Hatangijwe ibikorwa bya Honda Estilo mu Rwanda

Yanditswe na admin

Ku ya 11-12-2017 saa 09:35:49

Mu kigo cyakira  abana bahoze mu muhanda  cyashinzwe na Rugamba Cyprien n’umugore we Daphrose Rugamba (Centre Cyprien et Daphrose Rugamba- CECYDAR) gihereye Kicukiro ni ho hatangirijwe  ibikorwa by’umuryango “Honda Estilo” byo gufasha  abana kugira indoto n’ikizere  biciye mu mupira w’amaguru no kwiga.

Ambasaderi w’Ubuyapani mu Rwanda, Mr Takayuki Miyashita ari kumwe n’abana barererwa muri CECYDAR nyuma yo gutangiza ibikorwa by’umuryango Honda Estilo (Foto Bugingo Fidele)

Uyu muryango washinzwe na rutahizamu w’ikipe y’igihugu y’u Buyapani  akaba yarakiniye n’ikipe ya Milan AC mu Butaliyani, Keisuke Honda. Mu gutangiza iki gikorwa taliki 09 Ukuboza 2017, Ambasaderi w’u  Buyapani mu Rwanda, Mr Takayuki  Miyashita  yatangaje ko n’ubwo  ari icy’umuntu ku giti cye bagomba kugishyigikira  kuko kizafasha abana kugira  ikerekezo cy’ubuzima.

Yakomeje avuga ko iki gikorwa ari ingirakamaro ku Rwanda n’Afurika muri rusange.  Mr Takayuki  Miyashita  yasabye aba bana  kwigirira ikizere no  gutegura neza ejo hazaza kuko hari mu biganza byabo.

Ambasaderi w’u Buyapani mu Rwanda   yanijeje ko azagerageza kuvugana na Keisuke Honda ku buryo ubutaha azaza mu Rwanda mu gihe byaba bigenze neza.

Umuyobozi w’inama y’ubutegetsi  ya CECYDAR, Ngezahayo Claudine yashimiye cyane iki gikorwa cy’umuryango  “Honda Estilo” kuba barahisemo kubitangiriza mu kigo cyabo. Yakomeje avuga ko ubundi inshingano zabo ari ugufasha abana basa n’abihebye bakongera kugaruka mu buzima bakagira indoto no gutegura ejo hazaza.

Motoki Futamura, uhagarariye ibikorwa by’uyu muryango muri Afurika yatangaje ko  bafite intego yo gutoza abana bagera ku 100 muri uku kwezi ariko  mu mwaka wose bifuza kugera ku bana 200.

Uyu muryango ubu ukorera mu bihugu 3 by’Afurika aribyo Kenya, Uganda n’u Rwanda, Motoki avuga ko bifuza kugera ku bana 1000 mu mwaka wose. Ibi bakaba biri muri gahunda bihaye “Africa Dream Soccer tour” iterwa inkunga na “Car-Tana.com”, sosiyete yo mu Buyapani igurisha imodoka zakoze.

Kuko gahunda yabo ari ufasha abana kugera ku ndoto zabo no kugira ikizere cy’ubuzima bw’ejo hazaza, Motoki avuga ko   mu Rwanda hari amasosiyete menshi  y’Abayapani akora ibintu bitandukanye nk’ikoranabuhanga n’ibindi ko bazabegera ku buryo mu minsi iza abana bajya banigishwa n’ibindi ku buryo nabyo byazabafasha.

Abana 25 ni bo bakoreshejwe imyitozo

Muri CECYDAR ubu habarizwa abana 47 b’abahungu.  Mu gutangiza igikorwa abana 25 bakoreshejwe imyitozo   n’abatoza b’impuguke bo mu Buyapani ari bo Shuzo Sakamoto na  Daichi Motomatsu.

Motoki akaba yaratangaje ko aba batoza bazagumana inaha nyuma bage muri Kenya na Uganda nyuma bagaruke mu Rwanda mu kiciro cya kabiri kuko barifuza ko ibi bikorwa byakomeza.

CECYDAR imaze imyaka 25 imaze  kurera  abana 4650 kandi bamwe bahanyuze babaye abantu bakomeye. Ubu  iki kigo kirimo abana 47 gusa  mu mwaka hanyura abana 180 bari hagati y’imyaka 7 na 15

BUGINGO FIDELE

TANGA IGITEKEREZO

Leave a Reply

Be the First to Comment!

avatar