19°C , Mostly clear | Kigali-Rwanda
Umunyamabanga wa Leta muri Minisiteri y'Ubutabera, Mé Uwizeyimana Evode, avuga ko ubu umuntu atagifungwa hagamijwe kumwimvisha, ahubwo ingufu zishyirwa mu kumugorora. Ifoto/Janvier Popote

“Kera wafungwaga uri umujura woroheje ukavamo uri umujura kabombo”

Yanditswe na Nshimyumukiza Janvier Popote

Ku ya 09-06-2019 saa 08:43:14

Umunyamabanga wa Leta ushinzwe Itegeko Nshinga n’andi mategeko muri Minisiteri y’Ubutabera (MINIJUST), Mé Uwizeyimana Evode, arashima ingufu zishyirwa mu gufasha imfungwa n’abagororwa.

Avuga ko mbere umuntu yafungurwaga agakora ibyaha biruta ibyo yafungiwe bitewe ahanini no kuba nta buryo bwo kumugorora bwabagaho, ahubwo ngo bamufungaga mu rwego rwo kumwumvisha.

Ati, “Kera kujya muri gereza, wajyagamo uregwa vol simple (ubujura bworoheje) ukazasohoka uri voleur qualifié (umujura kabombo). Gereza si ahantu bakorera imyitozo y’ubugizi bwa nabi, ariko byabayeho.”

Yabivuze mu muhango wo gusoza umwiherero w’iminsi itatu w’abacungagereza bakuru wabereye i Nyamata mu Karere ka Bugesera, aho hafashwe imyanzuro 12 yizera ko izabafasha kunoza imikorere yabo.

Bamwe mu bacungarereza bakuru bitabiriye uyu mwiherero, bari kumwe na Mé Uwizeyimana mu ifoto y’urwibutso. Ifoto/Janvier Popote

Mé Uwizeyimana yagarutse ku mateka y’amagereza mu bihe bya Repubulika ya mbere n’iya kabiri, avuga ko gufunga bitajyanaga no kugorora, ariko ubu ngo ingufu zishyirwa mu kugorora ufunzwe.

Ati, “Akazi ka kera kari ugufunga ariko ntiharimo kugorora, kera abitwaga abanyururu, bitwa gutyo kubera umunyururu uzirika imbwa, ishene, uriya muntu abayeho aboshye…”

Avuga ko kuri ubu umuntu afungwa, yagera muri gereza hakabaho kumugorora ngo azasohokemo atagifite umutima wo kugira nabi, ndetse bamwe bakigishwa imyuga ku buryo ibatunga bafunguwe.

Ati, “Uyu muntu waje gufungwa si ukuvuga ngo urafata imbunda cyangwa inkoni (umukubite), uwaje nta mwuga azi aragororwa akigishwa imyuga agataha azi kubaza, azi kudoda…”

Yunzemo ati, “Ubu ni ugufata umuntu uri dangerous (w’umugome) ukamuhinduramo umuntu muzima uzagirira igihugu akamaro, wakora umwuga wamutunga, wawigira muri prison, ni ibintu bitashoborwa na buri wese.

Kuba urwego rw’abacungagereza rwitwa mu Cyongereza “Rwanda Correctional Services”, avuga ko “Correctional” byumvikanisha ko inshingano y’urwego ya mbere eari ukugorora, bityo agasaba abacungagereza kubizirikana, ku buryo abantu b’ubu badafungwa nk’aba kera.

Komiseri Mukuru w’Urwego rw’Imfungwa n’Abagororwa, CG Rwigamba George aganira n’itangazamakuru. Ifoto/Janvier Popote

Mé Uwizeyimana yagarutse ku mateka y’amagereza, aho Abakoloni b’Ababiligi babaye u Rwanda gereza ya mbere izwi nka 1930 yubatswe mu mwaka wa 1930 mbere ya Kaminuza y’u Rwanda yubatswe mu 1963, nk’aho Abanyarwanda bari bakeneye gereza kurusha kaminuza, avuga ko imitekerereze y’Ababiligi yo gufata nabi imfungwa yakomeje kuranga Repubulika ya Mbere n’iya Kabiri, ubu u Rwanda rukaba ruri mu nzira yo kuyikuraho.

Yavuze ko kugeza ubu hari amategeko menshi agikoreshwa mu Rwanda yashyizweho mu gihe cy’Ubukoloni, ayo akaba agomba kuvaho, ndetse avuga ko umuco wo gufunga hagamije kumvisha ukwiye gucika ugasimburwa no guhana bigamije kugorora.

Ati, “Turashaga gukuraho amategeko ya Congo Belge, na Kayibanda na Habyara bari barayayobotse, natwe twari twarayayobotse, ntitwitane ba mwana. Uko bahanwaga mbere y’ubukoloni, kuva mu 1961 kugeza za 2006 gereza zari zikigengwa n’icyo kintu, muri gereza nta nshingano yo kugorora yari ihari, byari ufufunga, ngo uyu muntu ni nk’inyamaswa, fata imbunda uhagarare hariya kandi natoroka umurase.”

Yunzemo ati, “Mu 1990 kugeza mu 1994, umuntu wese w’umuyobozi yaragufataga akagufunga, kandi akakujyana kuri gereza akavuga ati mfungira uyu muntu nzamufungura aho nzabishakira, watakambira ugufunze sinjye wakuzanye aha, ayo ni amateka, ababaye aha barabizi, ni uko abantu bafungwaga.”

Mé yavuze ko n’abakoranye na Perezida Kayibanda Grégoire wayoboye u Rwanda kuva mu 1961-1973 bafunzwe hagamijwe kubumvisha ku ngoma ya Habyarimana wamusimbuye, ndetse bamwe baricwa.

Ati, “Kudeta yo mu 1973, Leta ya Kayibanda hafi ya yose bayiciriye muri gereza, babanje kubafungira aho bari batuye nyuma babajyana aho bitaga Speciale hariya mu Ruhengeli, na Kayibanda ni ko byamugendekeye nubwo yagiye azengurutswa za Rwerera za Gabiro.”

Mu bafunzwe nabi ngo harimo na Harelimana Gaspard wari Minisitiri w’Amashuri, akagira muramu we witwa Sylvestre Nsengimana, uyu akaba umunyamategeko wakoraga mu Muryango w’Ubumwe bw’Afurika nyuma aza kuba Minisitiri w’Intebe.

Mé Uwizeyimana yavuze ko Nsengimana yagiye kwa Habyarimana “ati nshaka kuramukanya na muramu wanjye Harelimana Gaspard, Habyarimana ati uri umwe na babantu bari muri Leta ya Kayibanda? Habyara akumva baramubaza umuntu wakabaye yarapfuye kera, abajije bati twari twaramwibagiwe, baramutwara baramwica.”

Komiseri Mukuru w’Urwego rw’Imfungwa n’Abagororwa (RCS), CG Rwigamba George, avuga ko umwiherero bakoze ari uwa kane, ukaba uri mu rwego rwo gukaza umutekano w’amagereza n’abayafungiyemo, ndetse no kongerera ubumenyi abacungagereza kugira ngo babashe kuzuza inshingano zabo neza.

Umunyamabanga wa Leta muri Minisiteri y’Ubutabera, Mé Uwizeyimana Evode, avuga ko ubu umuntu atagifungwa hagamijwe kumwimvisha, ahubwo ingufu zishyirwa mu kumugorora. Ifoto/Janvier Popote

TANGA IGITEKEREZO

Leave a Reply

Your email address will not be published. Required fields are marked *