Kenya: Umunyamakuru Jeff Koinange yatangaje ko yakize COVID-19

Yanditswe na KAYITARE JEAN PAUL

Ku ya 06-08-2020 saa 13:01:10

Jeff Mwaura Koinange, umunyamakuru wa Citizen TV wamenyekanye kubera ikiganiro gikunzwe cyane muri Kenya, yatangaje ko yakize icyorezo cya Koronavirusi (COVID-19).

Jeff Mwaura Koinange kandi azwi nk’umusangiza w’amagambo mu nama zikomeye, akaba akunze no kugaragara mu kanama nkemurampaka k’amarushanwa akomeye, yatangaje ko yakize icyorezo cya COVID-19.

Koinange avuga ko yasanzwemo COVID-19 agatangira kwitabwaho ariko ko mu minsi 14 abaganga basanze nta COVID-19 akirwaye.

Ati: “Narindwaye COVID-19 mu minsi 19 ariyo mpamvu nagarutse mu rugo. Nyuma y’iminsi 14 naripimishije basanga ntakirwaye ndi muzima. Mu masaha 72 na bwo basanze nta COVID-19 ndwaye”.

Yashimiye abanyakenya bakomeje kumwereka ko bari kumwe mu gihe cyose yamaze arwaye nkuko yakunze kubigaragaza ku mbuga nkoranyambaga.

Ati: “Ku munsi wa mbere nakiriye ubutumwa kuri WhatsApp nk’ibihumbi 3, n’ubundi ibihumbi 2 kuri terefoni bisanzwe.

Abantu benshi baransengeraga binyifuriza gukira, abandi bakansaba kunywa amazi n’indimu, tangawizi, gufata Vitamini C, kota izuba nk’iminota 20 n’ibindi byinshi bambwiraga bohereza ubutumwa”.

Jeff Koinange yatangaje ko yakize COVID-19

Jeff Koinange wari umaze iminsi mu kato, yatangaje ko yakize icyo cyorezo nyuma yo kubona igisubizo cya kabiri yafashwe kigaragaza ko yakize.

Koinange yatangaje bwa mbere ko yanduye COVID-19 tariki ya 20 Nyakanga 2020, ashimangira ko azakomeza kuba mu kato n’ubwo nta bimenyetso agaragaza.

Icyo gihe yagize ati: “Bagenzi bange, reka mbamenyeshe ko nsanzwe naranduye COVID-19. Merewe neza… Nta bimenyetso… kandi n’umuryango wange umeze neza. Abo twahuraga kenshi bose barabimenyesheje kandi ndashimira Ikigo nkorera ku bufasha cyampaye.”

Citizen TV yatangaje ko igihe yari mu kato, yakomeje kugaragara kuri tereviziyo ndetse akazi kose k’umwuga kamurebaga yagatunganyije neza haba kuri Citizen TV no kuri radiyo Hot 96.

Jeff Koinange byamenyekanye ko yakize COVID-19

Umwanditsi:

KAYITARE JEAN PAUL

Tanga Igitekerezo

Email yanyu ntigaragazwa ku rubuga. Amazina na Email ni ngombwa.