21°C , Partly cloudy | Kigali-Rwanda

Kenya: Bidasubirwaho Urukiko rwemeje intsinzi ya Kenyatta

Yanditswe na admin

Ku ya Nov 21, 2017

Ku wa Mbere w’iki cyumweru Urukiko rw’ikirenga rwa Kenya rwatangaje ko ubujurire ku matora ya Perezida yabaye ku wa 26 Ukwakira 2017 nta shingiro bufite. Rwemeje bidasubirwaho intsinzi ya Uhuru Kenyatta ku mwanya w’umukuru w’icyo gihugu.

Ibinyamakuru Jeune Afrique na AFP (ibiro ntaramakuru by’Abafaransa) byatangaje ko umucamanza David Maraga yatanagarije abari mu rukiko ku wa 20 Ugushyingo 2017 ko nyuma yo gusesengura iby’abatanze ibirego by’ubujurire ku byavuye mu matora y’umukuru w’igihugu cya Kenya yo ku nshuro ya kabiri yabaye ku wa 26 Ukwakira 2017 no kubihuza n’amategeko, ngo byateshejwe agaciro kuko basanze nta shingiro bifite.

Abacamanza b’Urukiko rw’ikirenga rwa Kenya mbere gato y’uko bemeza ko Uhuru ari we watsinze amatora yo ku wa 26 Ukwakira 2017 (Foto Reuters)

Ati « Kubera iyo mpamvu, abacamanza b’Urukiko rw’ikirenga uko ari 6 mu bumwe batesheje agaciro ibirego byombi by’abari bajuririye ibyatangajwe na IEBC, komisiyo yigenga y’amatora ya Kenya. Urukiko ruboneyeho kwemeza ko Uhuru Kenyatta ari we watsindiye kuba Perezida wa Kenya ». Ubujurire bumwe bwari bwatanzwe na rwiyemezamirimo wahoze ari depite, ubundi butangwa n’abakorera umuryango utegamiye kuri Leta uharanira uburenganzira bwa muntu.

Mu byo ababuraniraga abatanze ibirego mu Rukiko rw’ikirenga rwa Kenya bashingiyeho batanga ubujurire, nkuko byemezwa na RFI, Radio Mpuzamahanga y’u Bufaransa, ngo harimo ko amatora ya Perezida yagombaga gukorwa bundi bushya, hakabaho abandi banyapolitiki batanga kandidatire bagapiganirwa umwanya wa Perezida kuva Raila Odinga ngo yari yivanyemo.

Abavoka bari mu rukiko bagize bati « Mwibuke ko iminsi itatu mbere yuko amatora yo ku wa 26 Ukwakira aba, Perezida wa IEBC Wafula Chebukali ubwe yivugiye ko komisiyo abereye umuyobozi idafite ubushobozi bwo kuyobora amatora ngo akorwe mu kuri no mu bwisanzure kubera ibibazo bya politiki bibugarije».

Icyakora RFI igaruka k’ubwigenge n’ubudahangarwa Urukiko rw’ikirenga rwa Kenya ruzwiho, iti « Kubera ko uru rukiko ari rwo rwatesheje agaciro amatora ya mbere y’umukuru w’igihugu yo ku itariki 08 Kanama, bikaba ngombwa ko asubirwamo nubwo ari ikintu kitigeze kibaho mu mateka y’amatora yo ku mugabane w’Afurika, byanze bikunze Abanyakenya baribuhe agaciro ikemezo gishimangira intsinzi ya Uhuru Kenyatta mu matora ya Perezida yo ku wa 26 Ukwakira ».

Kenyatta ugiye kuyobora Kenya muri manda ya kabiri y’imyaka itanu, yatsinze ayo matora ku majwi 98% yabonetse mu Banyakenya bagera 38% bayitabiriye. Abatavuga rumwe na Guverinoma ya Nairobi bashyigikiye Raila Odinga banze kwitabira amatora, banateza imvururu zikomeye zatumye ubwitabire buba buke cyane, dore ko hari uduce 25 twose amatora atabaye kubera umutekano muke.

Ku Cyumweru tariki 19 Ugushyingo 2017 bucya Urukiko rw’ikirenga rutangaza iby’abajuririye amatora aherutse ya Perezida wa Kenya, hongeye kuvuka imyigaragambyo ikaze y’abayoboke ba Odinga ku buryo RFI yemeje ko abantu 3 baguye mu myigaragambyo i Nairobi ahitwa Mathare. Biteganyijwe ko Uhuru Kenyatta azarahirira izo nshingano nshya z’umukuru w’igihugu ku wa 28 Ugushyingo 2017.

KAYIRA ETIENNE