19°C , Mostly cloudy | Kigali-Rwanda
Guverineri wa Banki Nkuru y'u Rwanda afungura ku mugaragaro serivisi nshya y'ubwizigamire bw'izabukuru yatangijwe na KCB Bank (Foto James R.)

KCB yatangije serivisi zo kuzigamira abateganyiriza ikiruhuko k’izabukuru

Yanditswe na SEZIBERA ANSELME

Ku ya 08-06-2018 saa 05:45:55

Ejo hashize banki ya KCB yatangije gahunda nshya yo kuzigamira ikiruhuko k’izabukuru hagamijwe gukomeza gushyigikira gahunda yo guteza imbere urwego rw’ubukungu bityo n’imibereho y’abaturage ikarushaho kuba myiza.

Guverineri wa Banki Nkuru y’u Rwanda afungura ku mugaragaro serivisi nshya y’ubwizigamire bw’izabukuru yatangijwe na KCB Bank (Foto James R.)

“Kenya Commercial Bank Ltd” (KCB) yatangije ku mugaragaro serivisi nshya ijyanye no kuzigamira abifuza guteganyiriza ikiruhuko k’izabukuru mu cyo yise “Liaison Pension Scheme Ituze” kugira ngo ikomeze gutanga serivisi nziza ku bakiriya bayo no guteza imbere urwego rw’ubukungu.

Umuyobozi mukuru wa KCB mu Rwanda Odhiambo George, asanga iyo serivisi nshya batangiye izarushaho gufasha ababagana mu kwizigamira muri KCB amafaranga agendanye n’ikiruhuko k’izabukuru, yaba umuntu ku giti ke ubyifuje cyangwa n’andi ashobora kujya atangwa n’ibigo bakorera.

George avuga ko ayo mafaranga y’ubwizigamire azaba afite umutekano usesuye kandi bikozwe kugira ngo bunganire ibindi bigo byatangaga iyo serivisi nka RSSB (Ikigo k’Igihugu cy’Ubwiteganyirize), ibyo bikazanafasha na KCB kuba Banki ikomeye, itanga serivisi zinyuranye kandi ikorana n’abakiriya benshi.

Impuguke (consultant)muri uwo mushinga ari na we wagaragaje uburyo iyo serivisi izatangwa, Fred Nyayieka, avuga ko kuba batangije iyo serivisi ari n’ikifuzo cya Guverinoma cyo kugira ngo ibigo by’imari byunganire abaturage mu kuzigama.

Avuga ko kuzigamira izabukuru bifasha ukiri mu kazi kandi n’igihe umuntu akavuyeho akabasha kubona uko akora bizinesi zindi, ibyo bikaba bimwe mu byatuma abantu bitabira iyo gahunda.

Nk’uko abisobanura, avuga ko gukoresha iyo serivisi bidasaba amafaranga y’umurengera kuko umuntu azigama uko abishoboye

Nyayieka agira ati Uyu munsi urakora ariko ejo ushobora kuba utakiri mu kazi, ukabura uko wishyura amashuri y’abana n’ibindi bikenerwa. Birakwiye rero ko abantu basobanukirwa akamaro ko kuzigamira izabukuru kugira ngo birinde ibyo bibazo byose”.

Guverineri wa Banki Nkuru y’u Rwanda John Rwangombwa wafunguye ku mugaragaro serivisi y’ubwizigamire bw’izabukuru yatangijwe na KCB, yashimye iyi banki yashyizeho ubwo buryo bwo gufasha Abanyarwanda kandi asaba ubuyobozi bwayo kuzakoresha neza iyo serivisi, yongera no kwibutsa ibigo by’imari ko bihari kugira ngo biteze imbere urwego rw’ubukungu.

TANGA IGITEKEREZO

Leave a Reply

Be the First to Comment!

avatar