26°C , Partly sunny | Kigali-Rwanda
Abari bitabiriye irushanwa ryo gushaka impano i Kayonza

Kayonza: Batangije ikipe y’umukino wo gusiganwa ku magare

Yanditswe na HAKIZIMANA YUSSUF

Ku ya 07-02-2018 saa 07:33:36

Mu Karere ka Kayonza batangije ikipe yo gusiganwa ku magare izabafasha kuzamura impano ziri mu bana bato zipfukiranwa n’uko batabona aho bakinira.

Abari bitabiriye irushanwa ryo gushaka impano i Kayonza

Mu gutangiza iyi kipe “Kayonza Young Stars Cycling Team”  habaye amarushanwa yo kujonjora abakinnyi bazajya muri iyi kipe aho basiganwe ibilometero 31, umwanya wa mbere wegukanwa na Niyoyita Emmanuel ufite imyaka 19  aho yakoresheje iminota 49 n’amasegonda 35, ubusanzwe akora akazi ko gutwara abagenzi ku igare, akorera mu murenge wa Rukara.

Niyoyita yagize ati “Mbere nitorezaga i Rwamagana ubushobozi buba buke ndabireka nza kwitwarira abagenzi, i Rwamagana ntabwo badufashe twari abana 6 twaviriyeyo icyarimwe kubera ubushobozi bukeya hari amagare yari ahari ariko tubura ubushobozi bwo kuyakoresha, rero iki ni cyo gihe cyacu ngo twerekane impano zacu”.

Umuyobozi w’iyi kipe, Karama Geofrey yasobanuye imwe mu mpamvu yatumye bashinga iyi kipe. Ati “Aho twakuye igitekerezo ni uko dufite abakinnyi benshi kandi beza, ariko ukumva ngo bamwe bari i Kigali, abandi bari i Rubavu abandi i Rwamagana kandi ari ba kavukire b’i Kayonza, ni ho nakuye igitekerezo cyo kwifatanya n’abandi tugakora ikipe nziza izatugeza aho dushaka, twe twariyemeje uwo tuzajya tubona afite umusaruro tuzajya tumuha igare akine nyuma turebe ko twamukuramo undi musaruro cyangwa nawe ashobore kwitunga, ubu twatangiye buri kwezi tuzajya dushyiraho amarushanwa kugira ngo tubone izo mpano zapfukiranwe”.

Abitabiriye aya marushanwa bakoresheje amagare asanzwe azwi ku izina rya pinebalo, umutoza w’iyi kipe Habumugisha Nepomuscene yemeza ko ibyakozwe  byari uburyo bwo kujonjora abashoboye, ariko ngo mu ikipe bazabashakira amagare meza bazajya bitorezaho, ubu abakinnyi bazajya bitoza bataha mu gihe batarabona ubushobozi bwo gukusanyiriza abakinnyi bose hamwe ariko ngo nabyo biri mu biteganywa vuba kugira ngo bazabashe kubitaho neza umunsi ku wundi.

TANGA IGITEKEREZO

Leave a Reply

Be the First to Comment!

avatar