15°C , Mostly cloudy | Kigali-Rwanda

Kayonza: Basabwe kutarebera abanyuranya n’amabwiriza yo kwirinda COVID-19

Yanditswe na TUMUKUNDE GEORGINE

Ku ya 12-11-2020 saa 06:49:27
Ahantu hatandukanye hahurira abantu benshi hashyizwe ubukarabiro

Ubuyobozi bw’Akarere ka Kayonza buratangaza ko abaturage bagerageza kubahiriza ingamba zo kwirinda COVID-19, gusa ngo ntihabura bake bateshuka ntibazubahirize, bukaba busaba buri wese kumva ko afite inshingano zo gukumira kiriya cyorezo yabona unyuranya n’amabwiriza ntamurebere gusa ahubwo akamuhwitura.

Umuyobozi w’Akarere ka Kayonza Murenzi Jean Claude agaragaza ko gushyira mu bikorwa ziriya ngamba bigenda neza, muri rusange imyumvire y’abaturage yazamutse ariko hakiri urugendo, bigisaba gukomeza gukora ubukangurambaga kugira ngo buri wese kwirinda abigire ibye.

Ati: “…kandi buri muntu wese ubonye urenze ku mabwiriza, cyane cyane abaturage bakumva ko ari uruhare rwa buri wese kumubwira ko atubahirije amabwiriza anamusaba ko ayubahiriza”.

Yakomeje akebura abakigaragaza intege nke mu kuyubahiriza cyane cyane ibirebana no kwambara agapfukamunwa kuko hari uwo usanga akambaye nabi cyangwa agatwaye mu mufuka akakambara ari uko hari ubimubwirije.

Yagize ati: “Abaturage ubutumwa tubaha ni ubwo gukomeza kubahiriza amabwiriza, dutanga intera hagati yacu, dukaraba intoki kenshi gashoboka no kwambara neza agapfukamunwa, udupfukamunwa baradufite ariko hari aho usanga umuntu agafite mu mufuka, ntibibe kukambara kubera ko abonye umuyobozi cyangwa abonye ubimubwira ahubwo akambare kuko ari inshingano agomba gukora mu rwego rwo kurwanya Koronavirusi.”

Umuyobozi w’Akarere ka Kayonza Murenzi Jean Claude arasaba abaturage gukomeza kwirinda COVID-19

Ubwo Imvaho Nshya yazengurukaga mu bice binyuranye byo muri aka karere birimo n’igice cy’umugi, hari bamwe yasanze bagatwaye mu ntoki, abakambaye bagapfuka umunwa bagasiga izuru ndetse n’abakambaye munsi y’akananwa.

Umwe muri bo utarifuje ko amazina ye atangazwa wari ugatwaye mu ntoki agenda mu muhanda ari kumwe n’abana bane bari mu kigero k’imyaka iri hagati y’itanu n’umunani batakambaye, batanagafite kandi uri hejuru y’imyaka ibiri wese agomba kukambara, yagize ati: “ … Nagakuyemo kugira ngo mpumeke (ahita akambara), abana bo …(araseka ntiyagira icyo yongeraho).”

Umuyobozi w’Akarere ka Kayonza Murenzi Jean Claude, avuga ko bakomeje ubukangurambaga hifashishijwe uburyo butandukanye burimo itangazamakuru, indangururamajwi zitanga ubutumwa aho abantu batuye n’aho bakorera; mu masoko n’ahandi babibutsa ko COVID-19 igihari batagomba kwirara.

Agaragaza ko hakorwa n’ubugenzuzi kugira ngo harebwe niba amabwiriza yubahirizwa, hirya no hino hashyizwe ibikoresho bifasha abantu kwirinda birimo ubukarabiro, ahandi hari za kandagira ukarabe, hakarebwa ko bikoreshwa uko bikwiye.

Ati: “Icyo bisaba ni ukureba ko byubahirizwa kuko kubishyiraho ni kimwe ariko no kubikoresha mu by’ukuri ni ikindi”.

Kuri ubwo bukangurambaga hiyongeraho ubukorwa n’urubyiruko rw’abakorerabushake usanga ahahurira abantu benshi; ku masoko, muri gare, ku mashuri,…bahwitura uwo babonye warenze ku mabwiriza yo kurwanya icyorezo.

Rubega Joseph ukuriye Urubyiruko rw’Abakorerabushake mu Murenge wa Mukarange, yatangaje ko nubwo hari abadohoka ku ngamba zo kwirinda COVID-19 muri rusange abenshi barazubahiriza bitandukanye na mbere zigitangira kuko byari bigoye guhwitura abatazubahirije.

Ati: “Bigitangira byari bigoye, cyane ko iki cyorezo cyari gishyashya, ariko uko iminsi igenda isimburana ubona ko abantu bagerageza kugenda babyumva ndetse bumva n’umumaro wabyo.”

Rubega Joseph ukuriye Urubyiruko rw’Abakorerabushake mu Murenge wa Mukarange

Ibi bishimangirwa n’umukorerabushake Uwineza Mamy, ubwo yari kuri gare ya Kayonza akangurira bantu kuyinjiramo bakarabye intoki, yagize ati: “Mu bigaragara amabwiriza yo kwirinda COVID-19 abantu bamaze kuyamenya, keretse bake bake batarayamenyera ariko na bo turakora uko dushoboye kugira ngo ahinduke umuco wabo, mbere wahwituraga umuntu ntahite abyumva akabanza kwinangira, ariko ubu nko kwambara agapfukamunwa benshi barabyumva, gukaraba intoki na byo hari ababa babyibagiwe ariko iyo ubakebuye bahita babyumva, n’iyo umurebye gusa ahita yumva ko agomba gukaraba intoki.”

Ababusanya n’ingamba zo kwirinda ahanini si uko batazizi…

Kubona uwarenze ku mabwiriza yo kwirinda COVID-19 si uko aba atayasobanukiwe ahubwo haba hajemo kwirara nkuko bamwe mu baturage babitangaza.

Mukandirima Josiane utuye mu Mudugudu w’Akanyinya, Akagari ka Nyagatovu, Umurenge wa Mukarange, ati: “Ingamba twarazisobanukiwe rwose, ni ukwambara agapfukamunwa, ugakaraba intoki ukoresheje amazi meza n’isabune, guhana intera ya metero hagati y’umuntu n’undi, ukirinda ingendo zitari ngombwa. Utubahiriza ingamba si uko aba atazizi ahubwo ubwo haba hajemo kwirara[…], inama natanga; ndasaba ababyeyi bagenzi bange kubahiriza gahunda za Leta, icyo babahuguriye bakagikora bakirinda iki cyorezo.”

Mukandirima Josiane arasaba bagenzi be kutadohoka ku ngamba zo kwirinda COVID-19

Niyonkunda Alice utuye mu Murenge wa Kabarondo, na we agaragaza ko amabwiriza yo kwirinda yayasobanukiwe abikesheje ubukangurambaga bukorwa n’inzego zibishinzwe, asanga ntawukwiye kuyarengaho kuko abantu bigishijwe kenshi ububi bw’icyorezo.

Ati: “Amabwiriza nayamenye kubera ubukangurambaga burimo ubukorwa mu itangazamakuru, nasaba bagenzi bange rwose kutayarengaho, bakirinda ku buryo bukwiye”.

Nyirahabimana Léa wo mu Mudugudu wa Nyacyonga, Akagari ka Shyogwe mu Murenge wa Nyamirama, na we akangurira ababyeyi bagenzi be kwirinda bakarinda n’abana. Ati: “COVID-19 irahari tugomba kuyirinda, ababyeyi icyo nabashishikariza ni ugukomeza kubahiriza ingamba zashyizweho bakirinda bakarinda n’abana”.

Nyirahabimana Lea arakangurira ababyeyi bagenzi be kwirinda bakarinda n’abana babo

Nubwo muri kariya Karere ka Kayonza hagaragara abateshuka ku kwambara agapfukamunwa uko bikwiye bitwaje ko kababuza guhumeka, Dr. Nsanzimana Sabin Umuyobozi Mukuru w’ Ikigo k’Igihugu gishinzwe Ubuzima (RBC) agaragaza ko ubushakashatsi butandukanye bwakozwe ku gapfukamunwa bwerekanye ko nta cyo kagabanya ku mwuka ibihaha byinjiza n’uwo bisohora.

Agira ati: “Agapfukamunwa ntabwo ari inzitizi yo guhumeka. Keretse uwaba afite uburwayi bukomeye buvuga ngo ntakambare ariko ntihagire ukagira urwitwazo”.

Yatanze urugero rw’ubushakashatsi buherutse gukorwa ku kiciro cy’abakuze n’abantu bikekwa ko bashobora kugira ikibazo bambaye agapfukamunwa ukurikije uko abantu babitekereza, hapimwe umwuka winjira n’usohoka mu bihaha mu gihe bari bakambaye, ibipimo bigaragaza ko nta kigeze kigabanuka ku mwuka ibihaha bikenera.

Dr. Nsanzimana Sabin arasaba Abaturarwanda gukomeza kubahiriza ingamba zose zashyizweho zo kwirinda COVID-19 kuko igihari kandi bakamenya ko ntawutayirwara, gusa abantu bashobora kuyirwara mu buryo bunyuranye bitewe n’intege z’umubiri n’ubundi burwayi umuntu yaba afite, ikaba inakwirakwira mu buryo bworoshye, bityo buri wese asabwa gukomeza gushikama aharanira gutsinda urugamba rwo kurwanya iki cyorezo.

Niyonkunda Alice avuga ko ingamba zo kwirinda COVID-19 yazumvise kandi azubahiriza

Hari n’ahantu hatandukanye hashyizwe Kandagirukarabe

Ku bigo by’amashuri n’ahandi hashyizwe ubutumwa bwibutsa abantu kwirinda COVID-19

Abaturage barasabwa kwambara agapfukamunwa neza

Umwanditsi:

TUMUKUNDE GEORGINE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.