15°C , Mostly cloudy | Kigali-Rwanda

Kayonza: Ababyeyi bafata “Shisha Kibondo” nk’urukingo rw’igwingira

Yanditswe na TUMUKUNDE GEORGINE

Ku ya 11-11-2020 saa 07:07:05
Muhimpundu Christelle ushinzwe imirire mu Kigo Nderabuzima cya Nyamirama

Ababyeyi bo mu Karere ka Kayonza bahabwa ifu y’igikoma yitwa Shisha Kibondo barayivuga imyato kuko ituma bagira ubuzima bwiza bo n’abana babo.

Bamwe mu baganiriye n’Imvaho Nshya batangaje ko umwana wanyweye igikoma cyayo ntaho aba agihuriye n’ibibazo by’igwingira, agira umubiri mwiza agakura neza akaba ari yo mpamvu bayifata nk’urukingo rw’igwingira.

Shisha Kibondo itangwa mu buryo bubiri; hari ihabwa umugore ugisama n’uwonsa umwana utarageza ku mezi 6, igihe umwana agejeje kuri ayo mezi atangira guhabwa igenewe abana bari muri icyo kiciro kugeza yujuje imyaka 2, ikunganira amashereka.

Muteteri Bernadette utuye mu Mudugudu wa Ruvumu, mu Kagari ka Rurambi, mu Murenge wa Nyamirama, afata ifu igenewe abagore batwite, avuga ko aho atangiriye kunywa igikoma cyayo yiyongereye mu biro.

Yagize ati: “Nyifata kugira ngo imfashe kugira ubuzima bwiza n’uwo ntwite bimurinde kugwingira, ituma umwana agira ubuzima bwiza muri ya minsi 1000, ntabashe kugwingira akiri mu nda, kandi nange intera imbaraga ubuzima bukaba bwiza. Nayifashe muri kuriya kwezi kwa kenda ubu ibiro byariyongereye, nari mfite 58 ntarayinywa ariko maze kuyinywa nagize 61[…], ku munsi nyiteka mu gitondo na nimugoroba, nzayinywa kugeza mbyaye umwana agejeje ku mezi atandatu ni bwo noneho nzatangira gufata igenewe abana ntangire kumuha nkazakomeza konsa umwana kugeza agize imyaka ibiri. Batubwiye ko ari umusingi ukomeye urinda umwana kugwirira.”

Muteteri Bernadette umwe mu bafata ifu ya Shisha Kibondo

Uwitwa Muhawenimana Lydia wo mu Mudugudu wa Rugarama, Akagari ka Rurambi, ashimangira ko amaze kubona akamaro kayo, yishimira kuba harashyizweho gahunda yo kuyibaha.

Yagize ati: “Ni ifu irimo intungamubiri baguha kugira ngo ugire ubuzima buzira umuze, maze umwaka nyifata, natangiye kuyifata umwana afite ibyumweru nka bibiri[…], ni nziza ifasha umuntu akagira ubuzima bwiza, itunga umubiri.”

Yakomeje asobanura uburyo imwunganira mu mirire dore ko anayibona nta kiguzi, ati: “Mbere hari igihe wabaga ufite amafaranga ari makeya udafite ubushobozi bwo kuyaguramo ibyo ukeneye byose byo kwita ku mirire, ariko aho Shisha Kibondo yabonekeye amafaranga wagombaga gukoresha ugura ifu uyakoresha ikindi wari ukeneye kuko yo bayiduhera ubuntu. Badushyize muri gahunda y’abahabwa iyi fu kuko amikoro yacu yari make cyane, ariko ubu turashima Leta yacu yadutekereje ikaduha iyi nyunganizi kugira ngo abana bacu batagwingira.”

Kayirangwa Lydivine wo mu Kagari ka Rurambi yatangiye kuyifata atwite inda ifite amezi atatu, umwana avutse agejeje ku mezi 6 na we atangira kuyihabwa. Atanga ubuhamya agira ati: “Nayifataga ntwite ikangwa neza, nkumva indyoheye mu kanwa, umwana na we ubu ndayimuha mbona ameze neza, ibiro bye bizamuka neza ku gipimo kiza gikwiye.”

Kayirangwa Lydivine asobanura uko ategurira umwana igikoma cya Shisha Kibondo

Ababyeyi batozwa uko bayitegura ikabagirira akamaro

Kayirangwa Lydivine yasobanuye ko aho bayifatira ku Kigo Nderabuzima batayibaha gusa ngo birangirire aho ahubwo bigishwa n’uburyo bwiza bwo gushigisha igikoma bakabikorana isuku.

Ati: “Ndabanza ngakaraba intoki, ngakoresha igipimo bitewe n’amezi umwana afite, icyo gipimo napimishije ifu ngipimisha n’amazi ngashyiramo angana n’inshuro enye zacyo.”

Kayirangwa afite umwana w’amezi ikenda, yavuze ko amuha igikoma mu gitondo, akongera saa yine, saa kenda na saa kumi n’ebyiri. Ati: “Nta bundi bwoko bw’igikoma muha, ngenda muha n’ibiryo nk’imfashabere.”

Intungamubiri ziboneka muri Shisha Kibondo

Shisha Kibondo igizwe n’ibigori, soya, amata, isukari na vitamini. Muhimpundu Christelle ushinzwe imirire mu Kigo Nderabuzima cya Nyamirama yagaragaje intungamubiri ziyibonekamo n’akamaro kazo, avuga ko mu ifu yagenewe ababyeyi (iba iri mu ishashi y’umuhondo) harimo ibitera imbaraga, poroteyine, amavuta, Vitamini A na Vitamini B n’ibindi bitandukanye birimo karisiyumu, iyode na feri (Fer).

Umubyeyi ahabwa iriya fu agisama inda kugira ngo umwana atazagira ikibazo k’igwingira. Ati: “Umubyeyi wayiteguye neza, akayinywa ku gihe usanga ibibazo by’igwingira umwana we atarabigize, ikindi ni uko ubona kwiyongera kw’ibiro bitewe n’igihe umubyeyi agezemo atwite”.

Yongeyeho ati: “Igihe cyo kubyara umubyeyi atakaza amaraso menshi, iriya feri baba barayishyizemo kugira ngo igende yongere amaraso umubyeyi ntazagire ikibazo mu gihe cyo kubyara”.

Shisha Kibondo iri mu ishashi y’umuhondo yagenewe ababyeyi iri mu y’icyatsi yagenewe abana

Yakomeje asobanura ko ifu yagenewe abana (iba iri mu ishashi y’icyatsi) na yo ibonekamo ibitera imbaraga na poroteyine hakiyongeraho Vitamini D na E bifasha umwana gukomera.

Muhimpundu agaragaza ko na yo ifite akamaro cyane mu mikurire y’abana. Ati: “Ibitabo twandikamo na byo birabigaragaza, uyu munsi nshobora gutangira gufasha umwana afite amezi atandatu afite nk’ibiro bitanu, uko agenda aza buri kwezi tukamupima usanga hari ukuntu ibiro n’uburebure byiyongereye, ni ukuvuga ko ifite akamaro mu mikurire y’umwana.”

Amara impungenge abafite imyumvire ko igira ingaruka ku buzima, avuga ko mu gihe yateguwe neza, yateguranwe isuku nta ngaruka yagira.

Ati: “Ubundi iyo umubyeyi agiye kuyitegura agomba kubanza gukaraba intoki neza akoresheje amazi meza n’isabune akabona gufungura ishashi irimo ifu, hari udukombe twabahaye tugena ingano y’ifu umubyeyi agomba guteka, iyo amaze kuyifata arongera agafunga ishashi neza kandi nta bwo ibikwa ahantu hakonje hasi. Ifu yafashe, ayivanga n’amazi meza, akavangira mu isafuriya nziza akoresheje ikiyiko, agacanira igikoma kikabira. Iyo agiye guha umwana igikoma na bwo akoresha ibikoresho bisukuye.”

Asobanura ko ku munsi, umwana ashobora kuyinywa mu gitondo, saa yine na saa kenda cyangwa hakiyongeraho indi nshuro bitewe n’ubushake umwana agira bwo kurya, umubyeyi akagenda acishamo n’andi mafunguro. Ku ifu igenewe umubyeyi nta gipimo ntarengwa gihari, igihe ashakiye igikoma arakinywa.

Kugeza ubu ku Kigo Nderabuzima cya Nyamirama Shisha Kibondo ihabwa abana 570, n’ababyeyi 310 buri kwezi. Bwa mbere yahabwaga abo mu kiciro cya 1 cy’ubudehe ariko biza kugaragara ko muri icyo kiciro abarimo benshi baba batakibyara hongerwaho ikiciro cya 2. Ihabwa abo muri ibi byiciro kugira ngo bunganirwe mu bushobozi bwo kurwanya imirire mibi n’igwingira.

Umusaruro umaze gutangwa na Shisha Kibondo mu karere

Ngarambe Alphonse Umuyobozi w’Ishami rishinzwe Ubuzima mu Karere ka Kayonza asobanura ko intego yo gutanga Shisha Kibondo ari ukugabanya igwingira mu bana batoya kandi itanga umusaruro bakurikije ibipimo bagenda bafata umunsi ku wundi.

Yagize ati: “Nubwo nta bushakashatsi mu bijyanye n’ubuzima n’abaturage (DHS) burakorwa ngo turebe neza impinduka ariko tubona ibirebana n’igwingira bigenda bigabanyuka; twifashishije ibipimo dufata umunsi ku munsi nta bana tubona bafite ibyago byo kugwingira; hari gahunda twatangiye yo gupima abana imikurire tureba niba nta kibazo bafite cyo kugwingira, dupima abafite amezi 3, 6, 9, 12, 15 na 18”.

Avuga ko ubushakashatsi bwakozwe n’Ikigo k’Igihugu k’Ibarurishamibare (NISR) muri 2015 bwerekana ko kariya karere kari kuri 42,4% by’abana bagwingiye, ariko mu bipimo bagenda bakora bya buri munsi, imibare iheruka igaragaza ko bari kuri 25,8%.

Kugeza ubu mu Karere ka Kayonza abagore batwite bafata ifu ya Shisha Kibondo bagera ku 1086, abonsa ni 1677 naho abana ni 6236. Iyi gahunda igendana no guha bariya bagenerwabikorwa amafaranga 7500 ku kwezi kugira ngo bagure ibyo bakeneye mu rwego rwo kurwanya igwingira n’imirire mibi mu bana muri rusange.

Ikigo k’Igihugu gishinzwe Ubuzima (RBC) kivuga ko kudafata indyo yuzuye mu gihe umubyeyi atwite, mu gihe yonsa ndetse no kudaha umwana imfashabere igizwe n’indyo yuzuye (kuva ku mezi 6 kugeza ku myaka 2) ari zo mpamvu nyamukuru zituma habaho ikibazo cyo kugwingira ku bana, bikanagira ingaruka ku mikurire y’ubwonko bwabo.
Ubushakashatsi bwakozwe ku mibereho n’ubuzima bw’abaturage muri 2015 (DHS2015) bwagaragaje ko 38% by’abana bari munsi y’imyaka 5 bafite ikibazo cyo kugwingira, ni muri urwo rwego Leta y’u Rwanda ibinyujije muri Minisiteri y’Ubuzima yagiranye amasezerano n’umushoramari ukora ifu y’igikoma SHISHA Kibondo ikize ku ntungamubiri, igenewe imiryango yo mu kiciro cya mbere cy’Ubudehe ifite abana bafite amezi 6 kugera ku myaka 2, ababyeyi batwite ndetse n’abonsa batishoboye.

SHISHA Kibondo yunganira izindi ngamba zigamije guhangana n’ikibazo k’imirire mibi mu bana bari munsiy’imyaka 5, nk’ubukangurambaga ku minsi 1000 ya mbere y’ubuzima bw’umwana.

Muhawenimana Lydia avuga ko ifu ahabwa ituma umwana agira ubuzima bwiza

Umwanditsi:

TUMUKUNDE GEORGINE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.