26°C , Partly sunny | Kigali-Rwanda
Umututu watewe n'imvura nyinshi n'ubutaka bworoshye

Karongi: Ubushakashatsi bwagaragaje icyatumye umusozi wa Murundi wiyasa

Yanditswe na IYAREMYE YVES

Ku ya 10-05-2018 saa 08:33:25

Dr Dushime Dyrckx impuguke akaba n’umushakashatsi mu bijyanye n’ubumenyi bw’Isi,  ibirunga ndetse n’iruka ryabyo akaba na Perezida  wa Croix Rouge y’ u Rwanda mu Ntara y’Iburengerazuba avuga ko gutandukana k’umusozi wa Murundi uri muri Karongi byatewe n’imiterere  y’ubutaka,  gusa ngo nta bwo hakwiye gucika igikuba ko bifitanye isano no gutandukana k’ubutaka kwabaye  muri Kenya.  

Umututu watewe n’imvura nyinshi n’ubutaka bworoshye

Avuga ko umusozi ukimara kugaragaza ukwiyasa,  afatanyije n’itsinda bahise bakora ubushakashatsi kugira ngo barebe icyaba cyabiteye,  gusa basanze byatewe ahanini n’imiterere y’ umusozi woroshye. Umututu wabaye ufite uburebure bw’ ibirometero nka bitatu kandi ubugari bw’uwo mututu bukaba bungana na santimetero ziri hagati ya 20 na mirongo 90.

Zimwe mu mpamvu zishobora gutuma ubutaka butandukana

Dr Dushime avuga ko muri kariya gace habayeho ikibazo cy’ubutaka bworoshye bwari bumaze igihe butandukana   ariko mu buryo bworoheje, gusa ngo byaje gukomezwa n’imvura yaguye cyane amazi akarushaho kwinjira mu butaka harushaho gutandukana.

Ati: “Hari hasanzwe hari umusate, ariko wagiye wiyongera buhoro buhoro, noneho kugwa kw’imvura cyane byatumye amazi yiyongera, twavuga ko ari ugutandukana k’ubutaka gusa, ubundi tujya gupima twarebaga niba bifitanye isano no mu nda y’Isi ariko twasanze atari byo ahubwo ari inkangu.”

Akenshi ngo biterwa n’igice kimwe kiba cyarushije ikindi imbaraga. Akomeza avuga ko ibi biza bidashobora kwirindwa ngo ni nk’uko umutingito udashobora kwirindwa, gusa habaho gufata ingamba.

Hamwe mu hantu hakunze kuba itandukana ry’ubutaka

Dr Dushime avuga ko hamwe mu hafite ubutaka bushobora guhura n’ibibazo nk’ibyabaye i Murundi muri Karongi ngo ni ibice byose byegeranye n’igice cya “Lift Valley” (Gutandukana gukabije kw’impande ebyiri z’ubutaka ziringaniye bifitanye isano n’ibirunga) harimo ibice byo mu Ntara y’Iburengerazuba, nubwo biriya ntaho bihuriye na Lift Valley.

Inkangu itandukanye n’iyabaye muri Kenya

Dr Dushime avuga ko inkangu yabaye itandukanye cyane n’ibyabaye muri Kenya kuko mu gihugu cya Kenya ari mu cyo bita “Lift Valley” ihanyura iturutse muri Ethiopia, igahingukira mu gice cya Uganda, ikamanukira mu birunga, igakomereza mu kiyaga cya Kivu, Tanganyika ,  ikarangirira  mu gihugu cya Malawi,  kandi ngo unyuze muri izo nzira hose usanga hari imisate y’uwo murongo.

Ati: “Ibimaze iminsi bibaye muri Kenya twasanze ntaho bihuriye cyane ko aho byabaye muri kiriya gihugu hari icyo bita Lift Valley kandi yo ifite umwihariko wo gutandukana;  aho  buri mwaka ugutandukana k’ubutaka kugenda kwiyongera,  buri mwaka hiyongeraho santimetero 4.  Ndamara impungenge abaturage ko ibyo bagenda bumva cyangwa bibwira ko hazabaho ugutandukana burundu, nta bwo byapfa guhita biba kuko bifata imyaka myinshi cyane.”

Ibyabaye  i Karongi byabayeho no  mu 1963

Dr Dushime avuga ko baganiriye n’abaturage batuye muri Karongi, bakuriye hariya habaye ikibazo, babasobanurira ko no mu mwaka wa 1963 byigeze kubaho aho ubutaka bwari bwatandukanye abaturage bamwe bakahimurwa bakahava. Ubu ariko bikaba byari byafashe akandi gace.

Ati: “Abaturage batubwiye ko muri 1963 byigeze kubaho,  abari bahatuye  barahimurwa kugira ngo batazahasiga ubuzima, ikindi batubwiye ko hari hashize umwaka hariya hantu hagenda hatandukana buhoro buhoro ni bwo ejo bundi byakomeje noneho bifite imbaraga nyinshi baratwiyambaza tujya kureba ibikomeje kuba.”

Inama atanga

Dr Dushime avuga ko icyo abaturage bakangurirwa ari  ukuhava bakajya gutura ahandi nk’uko Leta yahise ibikora ikabajyana ahandi kuko bashoboraga guhura n’ibibazo byinshi birimo kuhasiga ubuzima, kuko uko imvura ikomeza kugwa ubutaka bushobora gukomeza kwika. Ariko kandi akavuga ko nta gikuba kigomba gucika ko  ubutaka bwaba bugiye gutandukana burundu.

 

TANGA IGITEKEREZO

Leave a Reply

Your email address will not be published. Required fields are marked *