19°C , Intermittent clouds | Kigali-Rwanda

Karongi: Tugomba guharanira kuba ab’imbere, kandi birashoboka kuko byose turabifite – Munyantwali

Yanditswe na Twizeyimana Fabrice

Ku ya 10-11-2019 saa 11:44:52
Guverineri Munyantwali (hagati uwa gatatu) yabasabye guharanira kuba ab'imbere

Guverineri w’Intara y’Iburengerazuba Munyantwari Alphonse, yasabye abayobozi b’akarere ka Karongi guharanira kuba mu b’imbere, kuko ibisabwa byose babifite, igikenewe gusa akaba ari uguhindura imyumvire bakumva ko babifite mu bushobozi.

Yabigarutseho mu kiganiro yagiranye n’abayobozi b’aka karere, ubwo we n’itsinda ryari rigizwe n’umuyobozi w’Ingabo, Lt. Col.  John Ndengeyinka, umuyobozi wa Polisi y’Igihugu mu Ntara y’Iburengerazuba, CP Rutikanga Rogers,  umuyobozi w’igenamigambi mu Ntara Nsanzimana Silyvestre, umuyobozi wa Porogaramu z’iterambere ry’uturere, Nyamaswa R. Emmanuel, n’abandi bakozi ku rwego rw’Intara, basuraga Akarere ka Karongi bagamije gusuzuma uko imihigo igenda ishyirwa mu bikorwa hanatangwa inama ku bikwiye kunozwa.

Ku rwego rw’Akarere bakiriwe na Visi Perezida w’Inama Njyanama y’Akarere Basiime Jossy, n’Umuyobozi w’Akarere Mukarutesi Vestine, n’abandi bayobozi barimo abagize Komite Nyobozi, Abanyamabanga Nshingwabikorwa b’imirenge, Abayobozi b’amashami n’abandi bakozi b’Akarere.

Muri uru ruzinduko uretse kugaragaza aho Akarere kageze kesa imihigo, hanagaragajwe igishushanyo mbonera cy’umujyi wa Bwishyura na Rubengera aho Umuyobozi w’Intara yagaragaje ko icyo gishushanyo kizateza imbere Akarere, asaba ubuyobozi guharanira ko gishyirwa mu bikorwa uko cyakabaye.

Ku kijyanye n’imihigo, Guverineri Munyantwali yagarutse ku mikorere ikwiye kuranga abakozi kugira ngo batange umusaruro ushimishije, abibutsa ko bafite ibishoboka byose byabageza ku byiza byose bishoboka, igisigaye ari uguhindura imyumvire bakumva ko bishoboka kandi bagaharanira kubigeraho.

Yagize ati “Mu byo dukora byose, tugomba guhinduka, tugomba guharanira kuba ab’imbere, kandi birashoboka kuko byose turabifite.”

Munyantwari kandi yabasabye gukorera hamwe nk’ikipe, bagahuza imbaraga kuko ari byo bitanga umusaruro mwiza kurusha uko umuntu yakora ari nyamwigendaho.

Impanuro nk’izi kandi abayobozi bo mu karere ka Karongi nanone bazigiriwe na Minisitiri w’Ubutegetsi bw’Igihugu ubwo yabasuraga muri Nzeri uyu mwaka, mu ruzinduko rwari rugamije gutanga impanuro ku buyobozi bw’Akarere, no kujya inama ku byakorwa mu kwihutisha iterambere ry’aka karere.

Yagize ati: “Mugomba gusenyera umugozi umwe kuko muri aka karere ibyo gukora bihari, kuva ku rwego rw’umudugudu kugeza ku karere bagomba kujya umujyo umwe wo kuzamura Karongi mu bikorwa by’iterambere.”

Imihigo ni imwe muri gahunda zashyizweho na Leta y’u Rwanda, hagamijwe kurushaho kwihutisha iterambere n’imibereho myiza y’abaturage. Ni gahunda ifite inkomoko mu mateka y’u Rwanda.

Umwanditsi:

Twizeyimana Fabrice

Tanga Igitekerezo

Email yanyu ntigaragazwa ku rubuga. Amazina na Email ni ngombwa.