22°C , Partly cloudy | Kigali-Rwanda

Karongi: Harifashishwa ‘drone’ mu kwiga imiterere y’ubutaka

Yanditswe na DUSINGIZUMUREMYI VESTINE

Ku ya Feb 5, 2018

Mu murenge wa Rubengera mu karere ka Karongi hatangirijwe igikorwa cyo gukusanya amakuru ku butaka buhingwaho hifashishijwe indege zitagira abapilote zizwi nka Drone.

Mbuya Frederic (uwunamye)ari kwerekana imikorere y’iyi ndege (Foto Dusingizumuremyi V)

Muri icyo gikorwa hakaba hari kwigwa imiterere y’ubutaka, ikigero cy’ububobere bwabwo, ubuso bw’ubutaka, icyo ubutaka bukeneye ngo umusaruro wiyongere, n’ibindi bipimo nkenerwa byafasha mu kuzamura umusaruro.

Mbuya Frederic Umupilote uyobora izi ndege akoresheje mudasobwa avuga ko izi ndege zizafasha mu kumenya uko ubutaka bumeze n’uburyo bwagirira umuturage akamaro kurushaho.

Yagize ati: “Igikorwa kitaweho cyane hifashishijwe drone ni ukumenya imiterere y’ubutaka, ikigero cy’ububobere bwabwo (Moisture), ubuso bw’ubutaka, icyo ubutaka bukeneye ngo umusaruro wiyongere, n’ibindi bipimo nkenerwa byafasha mu kuzamura umusaruro w’ubuhinzi”.

Umukozi ushinzwe ubuhinzi mu karere ka Karongi Safari Fabien avuga ko aba batekinisiye bari gufata ibipimo by’ubutaka bikazapimwa nyuma bakazajya baha amakuru abaturage y’uko bakoresha ubutaka bakurikije ibipimo byabwo.

Ati: “Aba bakoresha ‘drone’ baje mu misozi gufata ibipimo by’ubutaka, ni uburyo bwo kwiga ubutaka, nibamara kubona ibipimo byabwo bagaruke babiganire n’abaturage batubwire noneho uburyo twajya gufasha abaturage.

Barakorera mu turere umushinga RWH ukoreramo harimo Nyanza, Rwamagana, Karongi n’ahandi n’ibikorwa bikurikiye ibyagiye biterwa inkunga na Banki y’isi kugira ngo yenda umushinga uzarangire hari ibipimo nyabyo bahaye abaturage byazabafasha mu gukomeza kunoza ubuhinzi”.

Ubu buryo bukoresha igihe gito, nibumara gushyirwa mu bikorwa, abaturage bazahabwa amakuru yo kumenya uko banoza ubuhinzi bw’umwuga bityo babashe kurushaho kwihaza mu biribwa no gusagurira amasoko.