19°C , Partly sunny | Kigali-Rwanda
Karekezi Olivier utoza Rayon Sports ashimangira ko hakenewe rutahizamu w'umunyamahanga mu ikipe y'igihugu

Karekezi asanga hakenewe ba rutahizamu b’abanyamahanga mu Mavubi

Yanditswe na BIZIMANA ERIC

Ku ya 29-01-2018 saa 07:58:55

Karekezi Olivier wahoze ari kapiteni w’ikipe y’igihugu “Amavubi” kuri ubu akaba ari umutoza mukuru wa Rayon Sports arahamya ko hakenewe nibura ba rutahizamu babiri b’abanyamahanga kugira ngo  babere ikitegererezo abana b’Abanyarwanda.

Karekezi Olivier utoza Rayon Sports ashimangira ko hakenewe rutahizamu w’umunyamahanga mu ikipe y’igihugu

Ibi arabishingira ku musaruro w’Amavubi muri CHAN 2018 ahagaragaye imbaraga nke z’ubusatirizi. Imibare ikerekana ko Amavubi yavuye muri CHAN atsinze igitego kimwe cya myugariro Manzi Thierry, inatera amashoti make mu izamu nko ku mukino wa Nigeria (atatu y’u Rwanda kuri 21 ya Nigeria) no ku mukino wa Libya  yateye 5 kuri 19 ya Libya).

Ikibazo cya ba rutahizamu b’abana b’Abanyarwanda cyatangiye nyuma yo gusezera kwa ba rutahizamu nka Gatete Jimmy, Karekezi we unafite agahigo ko gutsinda ibitego byinshi mu ikipe y’igihugu (25), Jimmy Milisa n’abandi  bari mu Mavubi yagiye muri CAN 2004 muri Tunizia.

Nyuma yo kureba imyitwarire y’Amavubi muri CHAN 2018, Karekezi asanga bituruka kuri shampiyona y’u Rwanda nayo idafite ba rutahizamu b’Abanyarwanda beza. Ati “Shampiyona yo mu Rwanda ngira ngo urwego ni rumwe. Umukinnyi nka Mubumbyi sinzi uwo ashobora kwigiraho mu ikipe nka Bugesera FC, utsinda ibitego akavuga ati uyu rutahizamu ndabona ari umuhanga ndamwigiraho ibi ngibi waza mu ikipe nka Police FC, waza mu ikipe ya AS Kigali urwego ni rumwe, abataha izamu ni bamwe”.

Nk’umuntu ufite ubunararibonye mu mupira w’u Rwanda asanga kuba mu gihe cyabo mu ikipe y’igihugu  harimo abanyamahanga byanatumaga n’abakinnyi b’Abanyarwanda bakora cyane kugira ngo banahamagarwe.

Ati “Uyu munsi umukinnyi araza akigaragaza agacenga abantu babiri ugahita umuhamagara mu ikipe y’igihugu  na twe bizatugora igihe tuzaba tugiye guhura n’ikipe zikomeye kuko twe  igihe cyacu  kugira ngo bagufate mu ikipe y’igihugu wabaga ubikwiye. Ntabwo ari ibintu byo kuvuga ngo kuko ndi umunyarwanda wenda wakinnye na shampiyona, ufite ibitego bine mu bahamagarwa ugomba kuba urimo, ni ukuvuga ngo twabuze uko tugira”.

Mu gutanga umuti, Karekezi asaba abashinzwe siporo kureba niba batadohora kuri ba rutahizamu b’abanyamahanga berekana ikinyuranyo ku buryo bakwemererwa kuza  kwigisha abana b’Abanyarwanda.

Ati “Turabyishimiye ko abana b’Abanyarwanda bakina; mu bwugarizi turabafite, hagati turabafite, ariko bagerageze mu ikipe y’igihugu bavugane bati nibura reka tworoshye tuvuge ko tuguze ba rutahizamu babiri batsinda ibitego noneho na ba bana b’Abanyarwanda barebe icyo babigiraho”.

Guha ubwenegihugu abakinnyi b’abanyamahanga byahagaritswe mu 2014, ubwo Amavubi yasezererwaga mu mikino yo gushaka itike ya CAN 2015 azira gukinisha Birori Dady wakinaga ku mazina abiri mu marushanwa y’Afurika.

Ku ruhande rwumwe ni igitekerezo cyumvikana ndetse cyanakorwa mu kwigana ibihugu bimwe na bimwe n’ubwo ariko hakiri kare kugira ngo umuntu yemeze ko nta rutahizamu mwiza w’umunyarwanda wabaho.

TANGA IGITEKEREZO

Leave a Reply

Be the First to Comment!

avatar