18°C , Intermittent clouds | Kigali-Rwanda

Karate: Abatoza bahuguwe  basabwe kuzamura impano muri uyu mukino

Yanditswe na BUGINGO FIDELE

Ku ya Jul 9, 2019 saa 7:57

Abatoza bagera kuri 27 bitabiriye amahugurwa    kuva tariki 01 kugeza 07 Nyakanga 2019  basabwe kuzamura impano muri uyu mukino njyarugamba wa Karate.

Aya mahugurwa  yabereye kuri Sitade Nto Amahoro i  Remera yakoreshwaga n’impuguke muri uyu mukino wa Karate,  Antonio Oliva  Seba ukomoka muri Espagne akaba yari  yoherejwe n’ishyirahamwe ry’uyu mukino ku Isi “World Karate Federation”.

Ubwo aya mahugurwa yasozwaga,  iyi mpuguke  yatangaje   aba batoza bari ku rwego rwiza icyo bakoze akaba ari ukubafasha kongera ubumenyi kugira ngo bazamure abakinnyi bazabashe kwitwara neza muri Afurika ndetse no ku Isi.

Perezida w’ishyirahamwe ry’umukino wa Karate mu Rwanda “ FERWAKA”, Uwayo Theogene yasabye abasoje amahugurwa gushyira mu bikorwa ibyo bahuguwemo kugira ngo bifashe kuzamura impano z’abakinnyi.

Yakomeje avuga ko muri rusange amahugurwa yagenze neza kuko abatoza bahuguwe bari ku rwego rwiza rwo kumva ibyo iyi mpuguke yabahuguye yabigishije  kuko  bose bakinnye umukino wa Karate ku rwego rwo hejuru.

Uwayo avuga ko aba batoza bagomba  gusangiza amakipe yabo ibyo bungukiye muri aya mahugurwa kugira ngo umukino ukomeze gutera imbere.

Aya amahugurwa yateguwe n’ishyirahamwe ry’umukino njyarugamba wa Karate  mu Rwanda “FERWAKA” ku nkunga ya Solidarite Olympic binyuze muri Komite Olempike y’u Rwanda.

Umunyamabanga mukuru wa Komite Olempike y’u Rwanda, Sharangabo Alexis yatangaje   ko yabashije  gukurikirana amahugurwa akaba yizere ko abatoza babashije kuzamuka ku yindi ntera.  Sharangabo na we yasabye abatoza bahuguwe  kugerageza gufasha basangiza abandi  ubumenyi bungutse.

Nkuranyabahizi Noel usanzwe ari umutoza w’ikipe y’igihugu mu mukino wa Karate  yavuze ko aya mahugurwa yagenze neza kandi bize byinshi bizabafasha mu kuzamura uyu mukino. Yakomeje avuga ko hari ibyo bungutse bishya ndetse n’ibindi bari bazi ariko batabikurikiza uko ikwiye.

Abatoza bose bitabiriye aya mahugurwa bahawe  impamyabumenyi.

Ubwo abatoza bari bamaze guhabwa impamyabumenyi nyuma yo gusoza amahugurwa

Antonio Oliva Seba, impuguke muri uyu mukino wa Karate ari we wahuguye aba batoza

Perezida w’ishyirahamwe ry’umukino wa Karate mu Rwanda “ FERWAKA”, Uwayo Theogene ari kumwe na bamwe mu batoza bahuguwe

Umunyamabanga mukuru wa Komite Olempike y’u Rwanda, Sharangabo Alexis ari kumwe n’abatoza nyuma y’amahugurwa