28°C , Sunny | Kigali-Rwanda

Kamonyi: Umuryango ‘SEVOTA’ ugiye kubaka Ikigo cy’Amahoro

Yanditswe na Ntawitonda Jean Claude

Ku ya 21-08-2019 saa 18:35:38
Madamu Mukasarasi asuhuza umwe mu banyamuryango ba SEVOTA

Umuryango SEVOTA (Solidarité pour l’Épanouissement des Veuves et des Orphelins visant le Travail et l’Auto-promotion) ufite igitekerezo cyo kubaka Ikigo cy’Amahoro mu gihe witegura kwizihiza isabukuru y’Imyaka 25 ubayeho.

SEVOTA ni Umuryango w’ubufatanye mu kubungabunga ubwisanzure bw’abapfakazi n’imfubyi binyuze mu murimo no kwiteza imbere, washinzwe ku ya 28 Ukuboza 1994 ufasha benshi kuva mu bwigunge binyuze mu mahuriro y’isanamitima no komorana ibikomere, amahugurwa n’ibikorwa by’ubuhinzi, ubworozi ndetse n’ububoshyi bikorerwa mu matsinda y’ubufashanye n’ubufatanye.

Umuhuzabikorwa w’Umuryango SEVOTA akaba ari na we wawutangije Madamu Mukasarasi Godelieve, yatangarije Imvaho Nshya ko Ikigo cy’Amahoro kizubakwa mu Karere ka Kamonyi kuko ari ho SEVOTA ifite inkomoko n’ibigwi birenze ahandi mu gihugu.

Iki kigo kizubakwa kigamije kubumbatira amahoro, ubumwe n’ubwiyunge. Kizaba gifite ikiciro cyagenewe urubyiruko, rurimo urwavutse ku ihohoterwa ryakorewe abagore mu gihe cya Jenoside yakorewe Abatutsi, hagamije kurufasha gukira ibikomere no kwiyubaka.

Hazazamo n’igice cy’ubuvuzi (clinic) kivura abagifite ibisigisigi by’ingaruka za Jenoside yakorewe Abatutsi ndetse habemo n’Inzu Ndangamurage (Musée) yerekana uruhare rw’umugore mu butabera nyuma ya Jenoside yakorewe Abatutsi.

Madamu Mukasarasi yagize ati: “Tuzagaragaza inkurikizi nziza z’igihe abagore batangaga ubuhamya mu Rukiko Mpuzamahanga Mpanabyaha Rwashyiriweho u Rwanda (ICTR), kuko baharaniye ubutabera abafashe abagore ku ngufu muri Jenoside barahanwa kandi n’ubu baracyahanwa ku rwego mpuzamahanga.”

Hazabamo n’igice kijyanye n’uruhare rw’abagore mu gusakaza urukundo n’amahoro bitangwa n’Imana (Spiritualité Féminine), n’igice cy’ubusitani kizaba gifite ibihingwa bitamenyerewe mu Rwanda bivamo imiti n’ibiribwa.

Mukasarasi avuga ko uyu mushinga uzarangira utwaye amafaranga y’u Rwanda miriyoni zirenga 435, ukazakorwa hifashishijwe abaterankunga kandi ku bufatanye na Minisiteri y’Uburinganire n’Iterambere ry’Umuryango (MIGEPROF), Komisiyo y’Ubumwe n’Ubwiyunge, Unity Club, Umuryango Profemmes Twese-Hamwe, AVEGA, Umuryango Haguruka, Komisiyo y’Igihugu yo kurwanya Jenoside (CNLG) n’inzego z’ibanze.

Mukasarasi akomeza agira ati: “Turateganya ko igice cya mbere cy’ubusitani bwiza n’inzu biciriritse bizaba birangiye igihe tuzaba twizihiza isabukuru y’imyaka 25 SEVOTA imaze ishinzwe tariki 28 Ukuboza 2019. Tuzakomeza kunoza ibyo bikorwa mu mwaka wa 2021 ari na bwo tuzaba twakoze igenamigambi ry’imyaka 5 igeza mu mwaka wa 2025.”

Mu myaka 25, SEVOTA yakuye benshi mu bwigunge

Kuva mu mwaka wa 1994 SEVOTA yatangiriye imirimo yayo ahitwa ku i Taba mu Karere ka Kamonyi ifite abanyamuryango 27 biganjemo abapfakazi n’imfubyi bagezweho n’ingaruka za Jenoside yakorewe Abatutsi.

Nyuma y’imyaka itatu uyu muryango watangiye kwagura ibikorwa ahahoze ari Komini Taba, Runda, Kayenzi na Komini Musambira zaje kubyara Akarere ka Kamonyi.

Mukasarasi ati: “Twakoranye n’abantu bagera ku 2,000 harimo abapfakazi 1,200, imfubyi zarengaga 1,000, abarokotse Jenoside yakorewe Abatutsi bagera kuri 500 ariko harimo itsinda ryihariye (Urunana rw’Abashaka Amahoro) ryari rigizwe n’abadamu bageze ku 150 bagize ihungabana kubera ko basenyewe, biciwe abana n’abagabo, barimo abagore 40 bafashwe ku ngufu muri Jenoside n’umunani babyaye abana bavutse ku ihohoterwa bakorewe icyo gihe.”

Nyuma y’aho, uyu muryango wagejeje ibikorwa byawo mu turere dutandukanye tw’Igihugu ufasha n’abafashwe ku ngufu muri Jenoside yakorewe Abatutsi barenga 300 kongera kubaho bifitiye ikizere.

Kugeza ubu SEVOTA igizwe n’amashyirahamwe arenga 106 agizwe n’abanyamuryango 1,575, n’amatsinda (club) y’urubyiruko 26 arimo abantu 1,884 biganjemo imfubyi n’abapfakazi ba Jenoside yakorewe Abatutsi.

Kuri ubu uyu muryango ukomeje gushyira mu bikorwa Umushinga “Icyerekezo Mpisemo” ushishikariza abakobwa babyaye ari abangavu guhindura imyifatire n’imikorere bagaharanira gutera imbere birinda kongera gusama no kubyara abana batifuje kandi bakiri bato ahubwo bagasubira mu ishuri, bakiyubaka, n’abagore bafite virusi itera SIDA bagasabwa kwiyitaho no kwita ku buzima bw’abo babana kandi bagakomeza ibikorwa byongera ubukungu bakorera muri Koperative.

Undi mushinga witwa “Iwacu ni Amahoro”, Umuryango SEVOTA ukorana n’abagore bashatse, bari imfubyi za Jenoside yakorewe Abatutsi hagamijwe kububakira ikizere bakamenya ko u Rwanda rwababereye umubyeyi kandi rugikomeje. Bakubaka ingo zigakomera, bo n’abagabo babo n’abana babo bakaba bandebereho mu bumwe n’amahoro.

Mukasarasi ashimira cyane Nyakubahwa Perezida wa Repubulika Paul Kagame nk’Umubyeyi, Madamu Jeannette Kagame n’abagize izindi nzego badahwema kubera urugero rwiza Abanyarwanda bashyigikira ibikorwa by’amahoro, ubumwe n’ubwiyunge, byo nkingi y’iterambere rirambye.

Abanyamuryango ba SEVOTA bahurira mu bikorwa by’ubuhinzi n’ubworozi

Abanyamuryango ba SEVOTA mu bikorwa by’ububoshyi bugamije ubumwe n’ubwiyunge

Umuhuzabikorwa w’Umuryango SEVOTA Madamu Mukasarasi Godelieve

TANGA IGITEKEREZO

Leave a Reply

Your email address will not be published. Required fields are marked *