22°C , Partly cloudy | Kigali-Rwanda
Umuyobozi w'Akarere ka Kamonyi Kayitesi Alice avuga ko imihigo y'Akarere ireba buri wese

Kamonyi: Ubuyobozi bwijeje kutazasubira mu myanya ya nyuma mu mihigo

Yanditswe na Kanamugire Emmanuel

Ku ya 07-12-2018 saa 15:11:46

Ubuyobozi bw’Akarere ka Kamonyi, butangaza ko buri gukorana n’abaturage no kubasobanurira imihigo y’umwaka wa 2018/2019, ku buryo bitanga ikizere ko aka karere katazongera kuza mu myanya ya nyuma mu kwesa imihigo.

Mu mihigo y’umwaka ushize wa 2017/2018, aka karere kaje ku mwanya wa 26 mu turere 30 tugize Igihugu, kavuye ku mwanya wa 19 mu ya 2016/2017 n’uwa 13 mu 2015/2016.

Umuyobozi w’Akarere ka Kamonyi, Kayitesi Alice, yabwiye itangazamakuru ko gushyira imbere abaturage bakaba ba nyir’ibikorwa n’abafatanyabikorwa ba mbere ari intwaro izatuma haboneka impinduka mu bikorwa biri mu mihigo.

Yagize ati: “Mu mihigo y’akarere duhiga, iyenda kugera kuri kimwe cya kabiri ni isaba ubukangurambaga. Imwe mu ngamba twafashe ni ukuyibasobanurira tugakorana na bo umunsi ku munsi dutangiriye ku munsi wa mbere dusinyiraho imihigo. Kuganira na bo no kubagezaho imihigo byarakozwe ndetse kuri uyu munsi icyo twishimira ni uko imihigo y’akarere yabaga yanditse mu rurimi ry’Icyongereza bigatuma abaturage batayimenya neza, twabashije kuyishyira mu rurimi twese twumva kandi tubona bigenda bitanga umusaruro aho tumaze kwisuzuma mu gihembwe cya mbere.”

Kayitesi yakomeje agira ati: “ Ikizere mbaha ni uko turi kumwe na bo; iyo tugiye kubasura kureba imihigo yabo tubona bitanga ikizere ko imyanya ya nyuma tutazongera kuyisubiraho, nkaba nange nagira ngo mbasabe kugira ngo dukomezanye umurava. Nta bwo imihigo y’akarere ikorwa na Meya, Gitifu w’umurenge cyangwa w’akagari bonyine, ni imihigo yacu twese, mba nasinye mu izina ry’abaturage bose uko bangana.”

Umuyobozi w’Akarere ka Kamonyi Kayitesi Alice avuga ko imihigo y’Akarere ireba buri wese

Guverineri w’Intara y’Amajyepfo, CG Gasana Emmanuel, yasabye Akarere ka Kamonyi gushyira imbaraga mu bikorwa bizatuma baza ku mwanya wa mbere.

Ati: “Mureke Kamonyi tube aba mbere, mureke ibintu byose tubikore ku gihe, tubikorere abaturage, tugire amahirwe angana, mukore uko mushoboye imihigo muyigire iyanyu. Kamonyi iri hafi y’umugi, ifite amahirwe menshi cyane, ifite amabuye meza.”

Mu mihigo y’umwaka ushize wa 2017/2018, uturere tw’Intara y’Amajyepfo twaje mu myanya ya nyuma, Kamonyi ikaba iri muri tune twa nyuma aho yaje ku mwanya wa 26 na ho Nyamagabe iza ku wa 28, Ruhango ku wa 29 na Nyanza ku wa 30.

TANGA IGITEKEREZO

Leave a Reply

Your email address will not be published. Required fields are marked *