19°C , Partly cloudy | Kigali-Rwanda

Kamonyi: Meya yaburiye abunama hejuru y’abaguzi bakabahenda bitwaje Koronavirusi

Yanditswe na Twizeyimana Fabrice

Ku ya 25-03-2020 saa 12:54:57
Abacuruzi bibukijwe ko uzafatwa yazamuye ibiciro azahanwa kuko nta mpamvu bafite yo kubihanika

Umuyobozi w’akarere ka Kamonyi Kayitesi Alice, yabwiye abacuruzi bo muri aka karere ko nta mpamvu n’imwe bafite yo guhanika ibiciro muri iki gihe u Rwanda rwugarijwe n’icyorezo cya Koronavirus, abibutsa ko uzafatwa azabihanirwa bikomeye.

Uyu muyobozi yunze mu rya Minisiteri y’ubucuruzi n’inganda mu Rwanda nayo iherutse gukebura abunama hejuru y’abaguzi bakabahenda, bitwaje Coronavirus.Yabigarutseho ubwo yasuraga isoko rya Musambira muri aka karere, mu ruzinduko rwari rugamije kureba uko bashyize mu bikorwa ingamba zo kwirinda COVID-19.

Muri rusange uyu muyobozi n’itsinda bari kumwe, basanze isoko ryaremye ingamba zo kwirinda zarakajijwe, kuko mu rwinjiriro rw’isoko uhasanga amazi n’isabuni buri wese yaba umuguzi cyangwa umucuruzi bakaraba, ndetse bamaze kubimenyera mu rwego rwo kwirinda umwanda no gukumira iyi ndwara ihangayikishije ibihugu byose ku isi.

Yasabye abarema iri soko n’abaricururizamo kugira umuco wo gukaraba intoki, kwirinda guhana ibiganza basuhuzanya n’ibindi byose bishobora gutuma bandura Coronavirus.

Yagize ati “Mugire umuco wo gukaraba neza amazi meza n’isabuni, mwirinde guhana intoki mu gusuhuzanya cyangwa mu guhoberana kuko iyi ndwara ya Coronavirus yandura vuba cyane muri ubwo buryo”.

Ku rundi ruhande ariko yanagarutse ku bacuruzi bihisha inyuma y’iki cyorezo bagafatirana abaturage, ibiciro by’ibicuruzwa byose bikazamuka kandi mu by’ukuri nta mpamvu ifatika babishingiyeho.

Meya Kayitesi yagize ati “Bacuruzi, mwirinde kuzamura ibiciro mwitwaje iki cyorezo cya Coronavirus, mukurikize amabwiriza yashyizweho na Minisiteri y’Ubucuruzi n’Inganda kandi mukurikize ibiciro bisanzwe”.

Uyu muyobozi w’Akarere ka Kamonyi kandi yaboneyeho kwibutsa abacuruzi ko hari ibihano biteganyijwe muri ayo mabwiriza ya Minisiteri y’ubucuruzi n’inganda, kandi uzabirengaho ashobora gucibwa amande cyangwa akaba yafungirwa ubucuruzi bwe.

Ku ruhande rw’abacuruzi ndetse n’abaguzi nabo bemera ko ibiciro by’ibicuruzwa bimwe na bimwe bikenerwa mu buzima bwa buri munsi nk’ibiribwa ndetse n’ibikoresho by’isuku byazamutse.

Uwitwa Mukarutamu Dative wari aaje kugura ibiribwa muri iri soko rya Musambira yagaragaje ko abacuruzi bari kubabwira ko amaduka baranguriramo i Muhanga n’ahandi nayo yazamuye ibiciro, bityo ngo iyo bageze mu isoko nabo bagerageza kugira ayo bongeraho kugira ngo badahomba.

Umwanditsi:

Twizeyimana Fabrice

Tanga Igitekerezo

Email yanyu ntigaragazwa ku rubuga. Amazina na Email ni ngombwa.