18°C , Mostly cloudy with thunderstorms | Kigali-Rwanda
Umuyobozi wungirije w'Akarere ka Kamonyi ushinzwe imibereho myiza y'abaturage Uwamahoro Prisca

Kamonyi: Hamaze gukoreshwa 80% by’ingengo y’imari mu mibereho myiza

Yanditswe na SEZIBERA ANSELME

Ku ya 19-02-2018 saa 07:51:18

Ubuyobozi bw’Akarere ka Kamonyi mu Ntara y’Amajyepfo buratangaza ko bumaze gukoresha agera kuri 80% by’ingengo y’imari mu bikorwa bigamije kuzamura imibereho myiza y’abaturage mbere y’uko hasigaye amezi 4 ngo umwaka w’imihigo urangire.

Umuyobozi wungirije w’Akarere ka Kamonyi ushinzwe imibereho myiza y’abaturage Uwamahoro Prisca

Mu kiganiro Imvaho Nshya yagiranye n’Umuyobozi w’Akarere ka Kamonyi wungirije ushinzwe imibereho myiza y’abaturage Uwamahoro Prisca, atangaza ko kugeza ubu hamaze gukoreshwa ingengo y’imari ingana na 80% mu bikorwa bizamura imibereho myiza y’abahatuye.

Nk’uko akomeza abisobanura, Uwamahoro, avuga ko ibyo bikorwa byibanze mu buzima, mu burezi no mu gufasha abatishoboye kuko ari byo by’ingenzi iyo nkingi y’imibereho myiza yibandaho muri rusange.

Agira ati: Muri 80% by’ingengo y’imari imaze gukoreshwa mu nkingi y’imibereho myiza mu karere ka Kamonyi, twibanze mu kubaka ibyumba by’amashuri 28 n’ubwiherero bwabyo 36, kugira ngo bisimbure ibindi byagaragaraga nk’ibishaje, hubakwa amazu y’abatishoboye barokotse Jenoside yakorewe Abatutsi mu Rwanda mu 1994 kugira ngo babone aho baba. Ikindi cyakozwe ni ibikorwa bitandukanye bitera inkunga abaturage birimo VUP, inkunga z’ingoboka n’ibindi”.

Nubwo atagaragaza ingengo y’imari yose yahariwe gukoreshwa mu bikorwa bigamije kuzamura imibereho myiza y’abaturage, Uwamahoro avuga ko icyo kigereranyo bagezeho kizakomeza kuzamurwa hubakwa ibikorwa bifasha abaturage kugira ngo imibereho yabo ikomeze kunozwa.

Gusa abaturage b’ako karere bishimira inkunga n’ibikorwaremezo bagenda bahabwa ngo habeho impinduka nziza mu buzima.

Uwumukiza Primitive ashima gahunda nziza yo kwegereza abantu amashuri kuko byorohereje imvune abana bahuraga nazo bakora ingendo ndetse kubaka ibyumba bishya bigamije kuvugurura na byo bikaba bitanga umutekano w’abana babo kuko hari aho bahoranaga impungenge ko imiyaga yayabagusha hejuru.

Ibi kandi birashimwa na Nkurunziza Innocent utuye mu murenge wa Runda, uvuga ko gahunda yo kwegereza abaturage ibigo bitanga serivisi z’ubuzima (Poste de Sante) hamwe n’abajyanama b’ubuzima byatumye nta muturage ukirembera mu rugo kuko ahita agana izo serivisi.

Mu bijyanye n’inzego zagarutsweho hejuru zirimo uburezi, mu karere ka Kamonyi kabarizwamo ibigo by’amashuri bisaga 104, mu buzima habarizwa ibigo nderabuzima 13 n’ibitaro bimwe, abaturage bakaba baragiye bitabwaho mu bufasha butandukanye haba mu kurihira abatishoboye amashuri, ubwisungane mu kwivuza n’ibindi birimo na gahunda ya Kora Wigire ku bagomba gufashwa kubona inguzanyo zo kwiteza imbere.

 

 

 

TANGA IGITEKEREZO

Leave a Reply

Be the First to Comment!

avatar