23°C , Mostly cloudy | Kigali-Rwanda
Abafite ubumuga bagaragaza ko bahura n'imbogamizi mu kubona insimburangingo ( Foto Archives)

Kamonyi: Abafite ubumuga bagiye kujya bahabwa inkunga y’ingoboka

Yanditswe na Kanamugire Emmanuel

Ku ya 05-12-2018 saa 04:47:45

Ubuyobozi bw’Akarere ka Kamonyi bwatangaje ko hagiye gutangizwa gahunda yo gutanga inkunga y’ingoboka ku bantu bafite ubumuga bigaragara ko badafite ubushobozi bwo kugira icyo bakora.

Byagarutsweho mu muhango wo kwizihiza Umunsi Mpuzamahanga w’Abantu bafite ubumuga wabereye mu Murenge wa Runda.

Abafite ubumuga bagaragaje ko hari intambwe yatewe mu kubafasha kwibeshaho ariko hakiri byinshi bikenewe gushyirwamo imbaraga nko koroherezwa kubona insimburangingo n’inyunganirangingo, nk’uko byagarutsweho n’Umuhuzabikorwa w’Inama y’Igihugu y’Abafite ubumuga mu Karere ka Kamonyi Dushiminana Theoneste.

Yagize ati: “Hari ibyakozwe ariko hari n’ibindi bigikeneye gukorwa kugira ngo ubuzima bw’abafite ubumuga bube bwiza kurushaho, bivuze ko hari inzitizi zigaragara mu buzima bwabo bwa buri munsi. Umubare munini w’abafite ubumuga ntufite insimburangingo n’inyunganirangingo. Hari intambwe yatewe kuko ikigo cya Gatagara cyatangiye gutanga no gusana inyunganirangingo hifashishijwe mituweli”.

Yakomeje agira ati: “Turasaba ko abakeneye insimburangingo bafashwa ndetse abakene cyane bagafashwa kubona n’amafaranga y’urugendo kugira ngo babashe kugera i Gatagara aho bafatira insimburangingo n’inyunganirangingo.”

Umuyobozi ushinzwe imirimo rusange mu Karere ka Kamonyi, Mushayija Fred, yatangaje ko gahunda yo gutanga inkunga y’ingoboka ku bafite ubumuga ari kimwe mu byitezweho kubafasha gukemura ibibazo bafite birimo n’iby’insimburangingo n’inyunganirangingo.

Ati: “Hu bufatanye bwa LODA na Leta y’u Rwanda hagiye kujya hatangwa inkunga y’ingoboka ku bo bigaragara ko badafite ubushobozi bwo gukora, bikaba bigiye gutangirana n’uyu mwaka. Iyo nkunga ishobora kuzaba kimwe mu bizajya bifasha abafite ubumuga bakibumbira hamwe mu makoperative bakagira ibikorwa bakora bibateza imbere. Iyi nkunga nyibona nk’intangiriro izajya ibafasha kugira ngo begeranye ubushobozi babone aho bahera babona izo nsimburangingo”.

Inkunga y’ingoboka yari isanzwe ihabwa Abanyarwanda bakennye cyane binyuze muri gahunda ya VUP, mu Karere ka Kamonyi abaturage 2874 ni bo bahabwa iyi nkunga, uyu mwaka ukazashira bageze ku 3185.

Ibindi abafite ubumuga basabye ko byitabwaho ni uguteza imbere imikino yose bashobora gukina kuko kugeza ubu uhari ni umupira w’amaguru ukinwa n’abafite ubumuga bw’ingingo gusa.

Bagaragaje kandi ko ibitabo by’amadini n’amatorero bidateye mu buryo bworohereza abafite ubumuga bwo kutabona kubikoresha ndetse ngo hari ibikigaragaramo imvugo zipfobya abantu bafite ubumuga.

TANGA IGITEKEREZO

Leave a Reply

Your email address will not be published. Required fields are marked *