21°C , Partly cloudy | Kigali-Rwanda

Kamena 1994: “OPERASIYO INSECTICIDE” yashyiriweho gutsemba Abatutsi

Yanditswe na Imvaho Nshya

Ku ya 22-06-2020 saa 07:56:53

Mu kwezi kwa Kamena 1994, muri Perefegitura ya Kibuye, kimwe n’ahandui henshi mu gihugu, ubwicanyi bwari bwarakozwe hasigaye abatutsi bake cyane bari bakivumburwa aho bihishe. Muri Kibuye, ahari hasigaye Abatutsi ni mu Bisesero. Habayeho ibyemezo bya Guverinoma n’ibya Perefegitura ya Kibuye n’ingabo kugira ngo begeranye imbaraga n’ibikoresho byo kujya kwica Abatutsi bari bakomeje kwirwanaho mu Bisesero bahanganye n’Interahamwe mu Bisesero.

Inama ya Guverinoma yemeje ishyirwaho rya Operation yo kumaraho Abatutsi yiswe “INSECTICIDE”

Inama ya Guverinoma yabaye ku wa 20 Kamena 1994 yasuzumye uburyo bwihuse bwo kumaraho Abatutsi hose mu gihugu ishyiraho icyiswe “Operasiyo Insecticide” yatangirijwe mu Bigogwe. Gukoresha iri jambo “Insecticide” nk’iry’umuti wica udusimba kari ukugereranya Abatutsi nk’Inyenzi, bakaba bagomba gushakirwa umuti wo kubica vuba bakarangira nkuko Inyenzi zicwa na bene uwo muti. Nkuko byatanzweho ubuhamya n’abantu batandukanye, “Operasiyo Insecticide” bayishinze kapiteni Paul BARRIL w’Umufransa.

“Operasiyo Insecticide” yari igizwe n’ibice bibiri. Icya mbere cyari kijyanye no kwihutisha kumaraho Abatutsi b’imbere mu Gihugu, bafatwaga ko ari ibyitso by’Inkotanyi, hagamijwe kubuza Inkotanyi kuzabona abo bafatanya nazo.

Icyo kabiri ari nacyo Kapiteni BARRIL yatangirije mu kigo cya gisilikare cya Bigogwe, cyari kijyanye no kwigisha abasilikare n’Interahamwe uburyo bwo gucengera mu bice by’u Rwanda byafashwe na FPR-INKOTANYI ngo kugira ngo babisubirane.

Muri Agenda ya NYIRAMASUHUKO, handitse ko mu rwego rwo gukora “Operasiyo Insecticide”, Inama ya Guverinoma yemeje gukomeza gushyira mu bikorwa amabwiriza yose ya “Auto-defense civile” nkuko yatangajwe na Guverinoma ku wa 25 Gicurasi 1994, kongera itangwa ry’imbunda za mortiers 82, 105, 120 na 122 ndetse n’amasasu y’imbunda za R4. Inama ya Guverinoma yanemeje gushaka uburyo ngo bwo kwirinda abacengera mu bice igenzura, iniyemeza gukora ibishoboka byose igasubirana ibice yatakaje mu ntambara.

Urugero rw’amabaruwa atandukanye hagati y’inzego za Leta na gisilikare arerekana ku buryo butabigwaho impaka ko Jenoside yakorewe Abatutsi mu Rwanda muri 1994 ari ubwicanyi bwateguwe na Leta. Biravuguruza ku buryo bugaragara abajya bigiza nkana bahakana ko nta bimenyetso byanditse bigaragaza imitegurire ya Jenoside yakorewe Abatutsi. Icyiswe operation de ratissage yo mu Bisesero ndetse na Operation Insecticide zateguwe na Guverinoma ya KAMBANDA yo kwica Abatutsi mu Bisesero n’ahandi hose mu gihugu, aho bari bataricwa mu mpera za Kamena 1994, ni kimwe mu bimenyetso byivugira byerekana ko Leta y’u Rwanda ariyo yatanze amabwiriza n’intwaro zo kwica Abatutsi hose mu gihugu.

Minisitiri u’Ubutegetsi Bw’Igihugu, Edouard KAREMERA, yagaragarije Perefe wa Kibuye Clement Kayishema uburyo bwihuse bwo gutera Abatutsi mu Bisesero

Hari inyandiko zigaragaza uburyo Kibuye yibasiwe na Jenoside bikozwe na Leta. Muri Kamena 1994, kuba Jenoside yari yarashobotse hose uretse mu Bisesero ahari hakiri resistance, byahagurukije inzego za Leta zose.

Hari inyandiko ebyiri (2) za Perefe Clement KAYISHEMA zo ku wa 09/06/1994 no ku wa 12/06/1994 yandikiye Minisitiri w’ubutegetsi bw’igihugu n’amajyambere ya Komini, Edouard KAREMERA, ukomoka ku Kibuye mu yahoze ari Komini Mwendo, asaba ko habaho icyo yise “ratissage” = ni ukuvuga guhiga cyangwa kumaraho; iyo “ratissage” igakorerwa muri Segiteri ya Bisesero ahari hakiri Abatutsi.

Ku wa 20/06/1994, Minisitiri KAREMERA yandikiye Perefe KAYISHEMA ibaruwa imuha igisubizo imumenyesha ko Inama ya Guverinoma yateranye ku wa 17/06/1994 ifata icyemezo ko Komanda w’Ingabo muri segiteri ya gisilikare ya Gisenyi, ni ukuvuga Lt Col Anatole Nsengiyumva, azohereza abasilikare bo gufasha Jandarumori ya Kibuye bagatera mu Bisesero bitarenze tariki 20/06/1994.

Minisitiri KAREMERA yibutsaga Perefe KAYISHEMA ko nyuma y’icyo cyemezo cy’Inama ya Guverinoma, yandikiye mugenzi we Minisitiri w’Ingabo, Augustin BIZIMANA, amusaba guhita yubahiriza icyemezo cya Guverinoma. KAREMERA agakomeza amenyesha perefe KAYISHEMA ko Minisitiri w’ingabo yabishyize mu bikorwa kuko yandikiye abayobozi bose b’ingabo bireba ku wa 20/06/1994 abasaba kubahiriza ayo mabwiriza. KAREMERA agasaba Perefe KAYISHEMA gukora ibishoboka byose agakurikirana ishyirwa mu bikorwa ry’iyo operation yo gutera mu Bisesero, akora ubukangurambaga bwose mu baturage ba za Komini Gishyita, Gisovu na Gitesi, kandi akazatanga raporo kwa Minisitiri KAREMERA ku migendekere y’icyo gikorwa cy’ubwicanyi bwo mu Bisesero.

Minisitiri KAREMERA yashoje iyo baruwa yo ku wa 20/06/1994, abwira Perefe KAYISHEMA ko Guverinoma yiteguye gutanga intwaro zose zizakenerwa muri icyo gikorwa, harimo no kurinda ibikorwa remezo nk’uruganda rw’icyayi rwa Gisovu na Electrogaz ya Karongi.

Perefe Kayishema yagaragarije Major Jabo uko iyicwa ry’Abatutsi bo mu Bisesero rigomba gukorwa

Ku itariki 23/06/1994, Perefe KAYISHEMA yandikiye ibaruwa uwayoboraga Jandarumori ya Kibuye, Major JABO Jean Baptiste, yise “Securite Bisesero” (Umutekano mu Bisesero). Muri iyi baruwa, Perefe KAYISHEMA yamenyeshaga Major JABO ko ku birebana no gushyira mu bikorwa ibaruwa bandikiwe na Minisitiri w’ubutegetsi bw’igihugu ku wa 20/06/1994, ku birebana no gutera mu Bisesero, ko hamaze gukaza ubukangurambaga mu baturage bo muri Komini zituriye Bisesero kandi ko byari byaranakozwe mu mezi abiri ashize ya mata na gicurasi, akongeraho ati: “Nkuko namwe mubyiyiziye” ari nko kwerekana ko ari umugambi n’ubundi abo bategetsi bari basanzwe baziranyeho.

Igishya KAYISHEMA yashyize muri iyo baruwa ni icyo kubwira Komanda wa Jandarumori ku Kibuye ko icyo bategereje kugira ngo Operasiyo rurangiza yo kwica Abatutsi mu Bisesero itangire ari ibikoresho n’abantu bo kubatera ingabo mu bitugu (appui materiel et operationnel), ngo bikazaza bije kunganira ibikorwa byatangiwe ku wa 20/06/1994 na Jandarumori ifatanyije n’Interahamwe zaturutse muri Gisenyi.

KAYISHEMA yakomeje abwira Komanda wa jandarumori ku Kibuye ko iyi operasiyo ya rurangiza ikeneye gukurikiranwa no gukorwa vuba bishoboka kugira ngo isozwe idafashe igihe kinini, ngo kugira ngo idahura n’ingorane zo kuba itagera neza ku cyo bifuza.

Mu kunoza imyiteguro yo kugaba ibitero byo gutsemba Abatutsi mu Bisesero, hifashishijwe abasilikare bavuye ku Gisenyi batanzwe na Liyetona Koloneli Anatole NSENGIYUMVA, nkuko byari byifujwe na Guverinoma baza kunganira abajandarume bo ku Kibuye.

Hifashishijwe kandi Interahamwe nyinshi ziganjemo izari mu Mutwe udasanzwe witwaga TURIHOSE zavuye ku Gisenyi, zifatanya n’izavuye ku Mugonero ziyobowe na Obed RUZINDANA na mwene nyina Joseph MPAMBARA ndetse n’izavuye I Cyangugu mu Bugarama zitanzwe na Yussuf MUNYAKAZI. Izi Nterahamwe zose zatwawe muri Autobus za Leta z’Ikigo ONATRACOM, zihurizwa mu isoko rya Gishyita n’izo muri Kibuye, cyane cyane izavuye muri Komini Gishyita, Gisovu na Rwamatamu zayoborwaga na Mikayeli MUHIMANA, Vincent RUTAGANIRA na ba burugumesitiri Aloys NDIMBATI wa Gisovu, Charles SIKUBWABO wa Gishyita, Abeli FURERE wa Rwamatamu, Alfred MUSEMA wayoboraga uruganda rw’icyayi rwa Gisovu n’abandi.

Abicanyi bagabye ibitero mu Bisesero ku wa 27 Kamena 1994 barimbura Abatutsi bari bagihanganye n’Interahamwe mu misozi ya Bisesero. Ibitero byamaze iminsi itatu (3), bikorwa ingabo z’Abafransa zibirebera zarageze Bisesero, zikambitse Gishyita mu birometero bitarenze bitatu (3) by’aho ubwicanyi bwakorerwaga mu misozi ya Bisesero. Abatutsi b’Abasesero barenga ibihumbi bibiri (2000) bararimbuwe muri iyo minsi itatu (3) gusa.

Dr BIZIMANA Jean Damascene, Umunyamabanga Nshingwabikorwa wa Kimisiyo y’Igihugu yo Kurwanya Jenoside, CNLG

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.