Kagame yijeje Abanyarwanda umutekano usesuye kandi urambye

Yanditswe na Twagira Wilson

Ku ya 09-11-2019 saa 08:21:03
Perezida Kagame mu kiganiro yahaye abanyamakuru kuri uyu wa Gatanu tariki 8 Ugushyingo 2019

Perezida Paul Kagame yijeje Abanyarwanda ko umutekano wabo urinzwe kandi usesuye ndetse ko uzakomeza kuramba.

Ibyo Umukuru w’Igihugu yabitangaje mu kiganiro yagiranye n’itangazamakuru kuwa 8 Ugushyingo 2019. Iki kiganiro cyagarutse ku ngingo zitandukanye zireba ubuzima bw’igihugu zirimo umutekano, ubukungu, ubutabera, ubuzima, ndetse n’imibereho myiza y’abaturage.

Umukuru w’Igihugu Paul Kagame yavuze ko icyo Abanyarwanda bifuza ari uko umutekano bafite wakomeza kuba mwiza.

Ati: “U Rwanda rufite umutekano uhagije, kandi ruzakomeza kubungabunga umutekano warwo, Abanyarwanda bizere ko umutekano wabo urinzwe, kandi usesuye, ndetse ko ari umutekano uzakomeza kuramba.”

Kagame avuga ko umutekano ushingiye ku bushake bw’abaturage kubera ko buri wese awukeneye, n’izindi nzego z’umutekano ubushake zifite cyangwa ubushobozi zifite, n’ubwo umutekano uzahora hari abawugerageza nta cyo byahindura ku mutekano cyangwa imibereho y’Igihugu.

Ku birebana n’abashyikirijwe inzego z’ubutabera, bafatiwe mu bikorwa bitandukanye byo guhungabanya umutekano w’Igihugu, Perezida Kagame yagize ati: “Kiriya ubwabyo ni ikimenyetso cy’uko hari ibikorwa kugira ngo Igihugu gihangane n’icyo kibazo kandi kuba bafatwa bagashyirwa mu butabera ni ikimenyetso cy’ubwo bushobozi buriho mu guha Abanyarwanda umutekano. Tubanahamagarira kugira uruhare mu mutekano.”

Perezida Kagame yavuze ko niba hari aho bashingira mu bindi bihugu mu guhungabanya umutekano w’Igihugu icyo cyose,  bivuze ko biba byabaye umutekano muke w’akarere.

Ati: “Ni yo mpamvu no mu karere ibihugu bishaka gufatanya, nk’inama ziba kugira ngo zisuzume ibibazo by’umutekano rusange, ari mu Rwanda, ari no mu karere. Twebwe ni ugukomeza kurinda umutekano mu gihugu cyacu dufatanya n’abandi mu karere ngo turinde umutekano mu karere. ”

Abajijwe  ku mishinga migari  y’iterambere mu bukungu irimo  iya gariyamoshi  Isaka-Kigali,  Perezida Kagame yavuze ko kugeza ubu hari inzego zitandukanye ndetse n’ibigega by’imari nka Banki Nyafurika Itsura Amajyambere na Banki y’Ishoramari y’i Burayi ishinzwe iterambere (European Investment Bank), ziteguye gutera inkunga umushinga wo kubaka umuhanda wa gariyamoshi uzahuza Umujyi wa Isaka na Kigali.

Akomeza agira ati: “Ikifuzo cyo kubaka umuhanda wa gariyamoshi kirahari, kandi hari  inyigo zimwe zakozwe, ni umushinga usaba ingengo y’imari kandi twitezeho inyungu uzatanga nazo zirahari, kandi ubwo buryo bwose buzakoreshwa.”

Umukuru w’Igihugu agaruka ku nama nkuru ihuza ibihugu bisaga 50 biri mu muryango uvuga ururimi rw’Icyongereza,  CHOGM, u Rwanda rwitegura kwakira muri Kamena 2020, Perezida Kagame yasubije ko ari inama u Rwanda rwiteguye kwakira kandi ifitiye akamaro abanyamuryango bose kandi ko u Rwanda rwiteguye kuyakira n’ibyangombwa byose bikenewe biri mu murongo mwiza.

Ati: “Ibihugu biri muri uwo muryango byose bifatanya mu birebana n’ubuhahirane mu rwego rw’ubucuruzi, umutekano uburezi n’ibindi. Rero twasabwe kuyakira kandi basanga ibyangombwa byose bisabwa u Rwanda rubyujuje. Rero twiteguye kwakira iyo nama itegenyijwe muri Kamena 2020’’.

Icyo kiganiro Umukuru w’Igihugu yagiranye n’itangazamakuru kitabiriwe na bamwe mu bayobozi mu nzego z’igihugu batandukanye.

Umwanditsi:

Twagira Wilson

Tanga Igitekerezo

Email yanyu ntigaragazwa ku rubuga. Amazina na Email ni ngombwa.