19°C , Mostly cloudy | Kigali-Rwanda

Kagame yerekanye amahirwe urwego rw’ubwishingizi ruzagira

Yanditswe na MUTUNGIREHE Samuel

Ku ya 13-02-2018 saa 06:37:42

Perezida Paul Kagame yavuze ku mbogamizi urwego rw’ubwishingizi ku mugabane w’Afurika rugihura nazo, ariko yerekana amahirwe urwo rwego rugiye kugira mu rugendo rwo kuzamura no korohereza ishoramari kuri uwo mugabane.

Perezida Paul Kagame uwa kane (mu b’imbere) uturutse ibumoso. Yagaragaje imbogamizi ubwishingizi buhura nazo muri Afurika ndetse n’amahirwe buzagira

Yabitangaje ejo hashize i Kigali, tariki ya 12 Gashyantare 2018, ubwo yafunguraga ku mugaragaro Inama ya 42 y’Impuzamashyirahamwe Nyafurika y’Ibigo by’Ubwishingizi (FANA), inama y’iminsi ine irimo kubera mu Rwanda ku nshuro ya gatatu.

Perezida Kagame yasobanuriye abaturutse mu bihugu 32 birimo 29 biri muri iryo shyirahamwe FANA, ko urwego rwa serivisi ruri mu byihutisha vuba ubukungu bw’isi aho kugeza ubu rufite 70% by’ubukungu na 60% by’ibitanga imirimo myinshi, harebewe ku mibare ya Banki y’Isi, kandi ibigo by’ubwishingizi bibifitemo uruhare rukomeye.

Iyi nama yitabiriwe n’abantu banyuranye bavuye mu bihugu 32 byo ku mugabane w’Afurika

Yavuze ko ku isi umuntu umwe muri batandatu aba ari Umunyafurika, ni ukuvuga abagera kuri 17%, ariko kugeza ubu Afurika ubwayo itanga 1.5% by’umusaruro w’ibigo by’ubwishingizi ubarirwa muri miliyari 75 z’amadolari y’Amerika, mu gihe bitatu bya kane byayo nabwo ava muri Afurika y’Epfo.

Ati “Ndakeka ko ibi bigomba guhinduka kandi muri abo kubihindura […] ibyo bituma kwinjira mu bwishingizi muri Afurika biri ku kigero cyo hasi ugereranyije n’ubundi bukungu bw’ibihugu byateye imbere.”

Yavuze ko nubwo hari uburyo amabanki n’ibigo by’amasoko y’imigabane birimo guhindura imikorere bikagira impinduka nziza mu kwinjiza abantu mu gukorana n’amabanki binyuze mu ikoranabuhanga, ariko ibigo by’ubwishingizi bikigenda gahoro muri urwo rugendo, gusa yerekana inzira ebyiri zigiye gutuma ibyo bibonerwa umuti.

Ati “Turacyafite inzira ndende ariko hari inkuru nziza ebyiri; Iya mbere ni uko nubwo iyo mibare idashamaje hakiri amahirwe menshi mu kuzamuka k’ubukungu by’umwihariko kuri Afurika irimo kwihuta kurusha ahandi hose.

Ibigo by’Afurika muhagarariye hano muzaba umusemburo wo kwagura ubufatanye mu kureshya amahanga ashaka kwinjira muri iryo soko. Mukwiye gukorana n’abandi ariko bitavuze ko mubaherekeza.”

Indi nkuru nziza Perezida Kagame yabwiye abitabiriye iyo nama, ni uko imbogamizi zose zajyaga zibaho mu kudindiza ubukungu bw’uyu mugabane zirimo kugabanuka, ahereye ku masezerano yo gukuraho imbogamizi ku bucuruzi bwo ku mugabane (The agreement on the Continental Free Trade Area) agiye gushyirwaho umukono mu kwezi gutaha i Kigali mu Rwanda, mu nama idasanzwe y’Abakuru b’ibihugu by’Umuryango w’Ubumwe bw’Afurika.

Perezida w’Impuzamashyirahamwe FANA, Adam N’Diaye, yavuze ko kugira ngo hakurweho imbogamizi zigihari hakwiye gushyirwaho isoko ryihariye ryo ku mugabane mu bigo by’ubwishingizi n’ibikorwa remezo no kwinjiza ubukungu bw’ibigo mu ikoranabuhanga.

TANGA IGITEKEREZO

Leave a Reply

Your email address will not be published. Required fields are marked *