22°C , Partly cloudy | Kigali-Rwanda

Kagame yatangije ibikorwa by’uruganda rukora imodoka mu Rwanda

Yanditswe na SEZIBERA ANSELME

Ku ya 28-06-2018 saa 08:03:05

Perezida Paul Kagame yatangije ibikorwa by’uruganda rukora imodoka zo mu bwoko bwa Volkswagen mu Rwanda, ashimangira ko ibyo bikorwa ari intambwe nshya y’urugendo rw’impinduka mu iterambere ry’ubukungu bw’u Rwanda n’Afurika.

Perezida Paul Kagame uwa 2 uturutse ibumoso, iburyo hari Umuyobozi wa Volkswagen muri Afurika y’Epfo, Thomas Schafer n’Umuyobozi w’ishami rya Volkswagen mu Rwanda, Michaella Rugwizangoga

Umukuru w’Igihugu yatangije ibi bikorwa ku munsi w’ejo hashize, ku wa 27 Kamena 2018. Perezida Kagame atangaza ko ibi bikorwa by’uruganda rukora imodoka rwa Volkswagen ari n’ikimenyetso cy’uko Abanyarwanda n’Abanyafurika muri rusange bakwiye ibyiza, aho guhora bahendwa n’ibyakozwe, agaragaza ko Afurika idakeneye kuba ikimpoteri k’imodoka zishaje cyangwa ikindi kintu cyakoreshejwe.

Yagize ati “Ibikorwa bya Volkswagen mu Rwanda no muri Afurika bizatanga impinduka ku iterambere ry’ubukungu. Afurika nta bwo igomba kuba ikimpoteri k’imodoka zakoreshejwe cyangwa se ikindi kintu cyakoreshejwe. Iyo urebye unasanga ubyishyura ku giciro kiri hejuru.

Perezida Paul Kagame yaganuye imodoka za Volkswagen mu muhango wo gutangiza ibikorwa by’uruganda

Niba wishyura igiciro kiri hejuru ku byakoreshejwe, kuki utakishyura ugura ikintu gishya. U Rwanda n’Afurika bikwiye ibyiza kandi ubu ni bumwe mu buryo bwo kwerekana ko bashobora kubigura”.

Mu gutangiza ibyo bikorwa ku mugaragaro, Perezida Kagame akaba yarijeje ba nyiri urwo ruganda ko narwo ruzunguka kuko Abanyafurika ari bo usanga ahanini bagura ibintu byinshi ku Isi. Ku bw’iyo mpamvu, yarwijeje ko nta kabuza Abanyarwanda ndetse n’Abanyafurika muri rusange bazababera abakiriya.

Umukuru w’Igihugu akaba yaravuze ko n’ubusanzwe imodoka ya mbere yageze ku butaka bw’u Rwanda yari Volkswagen. Akaba yaravuze ko hari abibwiraga ko bikomeye ko imodoka z’indage zateranyirizwa mu Rwanda.

Ikigo cy’uruganda rukora imodoka rwa Volkswagen mu Rwanda, kizateranya imodoka ndetse kizashyiraho uburyo bwo kuzisangira ku bantu benshi.

Biteganyijwe ko mu mikorere y’urwo ruganda rukora imodoka z’Abadage zo mu bwoko bwa Volkswagen ruzatanga imirimo nibura ku bantu bari hagati ya 500 na 1000. Imodoka ya mbere yateranyirijwe mu Rwanda ya VW Polo iragura 23,881 by’amadolari y’Amerika, bihwanye na miliyoni 20 zirengaho gato z’amafaranga y’u Rwanda ikaba ari nayo ihendutse.

Uruganda ruzwi ku izina rya ‘Volkswagen Mobility Solutions Rwanda’ ruherereye mu gice cyahariwe inganda i Masoro mu karere ka Gasabo, rukazatangirana n’imodoka 5000 ku mwaka zo mu bwoko bwa VW Polo, VW Passat, VW Tiguan, VW Teramont na VW Amarok.

Thomas Schafer, uyobora Volkswagen muri Afurika y’Epfo, yavuze ko u Rwanda ari ikerekezo kiza cy’ubucuruzi, akaba ari yo mpamvu bahisemo kuhakorera, kwiyongeraho kuba Kigali ari Umujyi ukoresha cyane ikoranabuhanga. Ashimangira ko ku ikubitiro iki kigo kizaba giteranya imodoka ibihumbi bitanu ku mwaka, nyuma zikazagera ku bihumbi 10.

TANGA IGITEKEREZO

Leave a Reply

Be the First to Comment!

avatar