22°C , Partly sunny | Kigali-Rwanda

Kagame yashishikarije urubyiruko gushakisha amahirwe aho gutegereza ko abasanga aho bari

Yanditswe na Twagira Wilson

Ku ya 10-10-2019 saa 08:03:41
Umukuru w'Igihugu Paul Kagame yasabye urubyiruko ruteraniye i Kigali mu Ihuriro Nyafurika ry'Urubyiruko guhaguruka bagashakisha amahirwe aho ari, bakareka kwicara bategereje ko yazabasanga aho bari

Perezida Paul Kagame asanga igihe kigeze ngo urubyiruko rw’Afurika ruhaguruke rushake aho amahirwe ari, kuko ngo nibatabikora bagategereza ko azabasanga aho bari azabacika, abibutsa ko amahitamo ari ayabo yo gukomanga aho amahirwe ari maze bakayabyaza umusaruro bakiteza imbere.

Ibyo Perezida Kagame yabisabye Ihuriro Nyafurika ry’Urubyiruko ruri mu nama ya Youth Connekt yatangiye kuri uyu wa 10 Ukwakira 2019 mu Rwanda ku nshuro yayo ya 3, ikaba ihurije i Kigali abantu bagera ku bihumbi icumi baturutse mu bihugu 99 by’Afurika n’ahandi ku Isi, barimo abikorera, abanyenganda, n’abayobozi mu nzego zitandukanye n’ibyamamare muri muzika. Mu gihe k’iminsi 3 abari muri iyo nama baraganira ku cyakorwa mu guteza imbere urubyiruko rwo kuri uyu mugabane w’Afurika.

Umukuru w’Igihugu yibukije urubyiruko ko intambwe ya mbere ibaganisha ku kwiteza imbere ari bo bagomba kuyitera bashyira imbaraga mu gukomanga aho ari ho hose hari amahirwe, hanyuma Leta ikaza ibunganira aho bishoboka ikabashyiriraho ahantu n’uburyo bwiza bwo gukora, ndetse harimo n’ubufatanye n’inzego z’abikorera kuko ngo ntacyo umuntu yageraho akora wenyine.

Ati “Mwebwe urubyiruko mugomba guharanira gushaka amahirwe aho ari hose mugakomanga icyo gihe ayo mahirwe azabaha ikaze, ariko nta bwo ari yo azaza kubashaka akomanga aho muri, nibigenda bityo mukayategereza azabacika. Amahirwe arahari nimuhaguruke muyashake kandi muzayabona.”

Ku birebana n’ubufatanye bw’inzego za Leta n’abikorera, Perezida Kagame yavuze ko izo nzego zombi ari magirirane kuko nta na kimwe umwe yageraho atuzuzanya n’undi, kuko asanga bose bekeneranye mu byo bakora, aho yagarutse ku ngero zirebana n’ishoramari mu by’amahoteri nubwo bamwe mu bafatanyabikorwa mu iterambere ba Leta y’u Rwanda batabanje kubyumva ariko nyuma bakabyemera.

Ati “Byabaye ngombwa ko tubasobanurira akamaro n’impamvu yabyo ko ibikorwa remezo by’amahoteri ari bimwe mu bituma urwego rw’ubukerarugendo tubonamo inyungu, barabyumva kuko icyo gihe byarubatswe dufata gahunda yo kubyegurira abikorera hamwe na bimwe mu bigo by’itumanaho mu gihugu, kandi bikaba byaragenze neza bitanga umusaruro.”

Umukuru w’Igihugu abajijwe ku gitekerezo u Rwanda rwagize rwo korohereza abanyamahanga kubona viza bakigera mu gihugu n’uburyo abantu bamwe babifashe nkaho u Rwanda ruzagira ikibazo cy’umutekano w’abantu benshi badasobanutse, Perezida Kagame yavuze ko ibyo nta kibazo kirimo u Rwanda rwakira abantu bose bapfa kuba hari icyo baje gukora mu gihugu, by’umwihariko avuga ko u Rwanda rukeneye abantu benshi baza kuhashora imari, ariko bakubahiriza amategeko Igihugu kinderaho.

Naho ku kibazo k’impunzi z’abimukira u Rwanda ruherutse kwakira bavuye muri Libya, yavuze ko ari ikemezo u Rwanda rwafashe rukivanye ku mutima aho gukomeza kurebera urubyiruko rw’Abanyafurika bari mu nkambi z’impunzi bicwa kandi ari inzirakarengane.

Ati “Twahisemo kubakira atari ukubera ko dufite byinshi byo gutanga, ahubwo ni uko twanze kurebera imibereho bari babayeho mu nkambi z’impunzi bicwa bazira ubusa. U Rwanda rwabakiriye kuko rukize ku mutima kandi tuzakomeza kubacumbikira kugeza aho ikibazo cyabo gisobanuka, baba ari abifuza gusubira iwabo basubirayo cyangwa ubundi buryo bushoboka.”

Madamu Ezikonwa Ahunna uhagarariye UNDP mu rwego rw’Afurika yashimye u Rwanda by’umwihriko Perezida Kagame kubera kureba kure, no kubona ko urubyiruko rw’Afurika rufite ikizere. Ashingiye ku byo yiboneye mu gihugu, asanga u Rwanda nyuma ya Jenoside yakorewe Abatutsi n’ibibazo bitoroshye rwanyuzemo rwarabashije kwiyubaka mu gihe gito, none ubu Igihugu kikaba kirabagirana.

Ati “UNDP izakomeza gushora mu rubyiruko hagamijwe guteza imbere impano zabo bifitemo haba mu rwego rw’amafaranga ku ikubitiro tukazahera ku bagize urubyiruko rw’Afurika bagera ku bihumbi ijana.”

Inama y’Ihuriro Nyafurika ry’Urubyiruko ‘Youth Connekt Africa’ 2019 yateguwe na Guverinoma y’u Rwanda ku bufatanye na UNDP, KOICA n’abandi bafatanyabikorwa.

Amafoto yaranze iyi nama yabereye muri Kigali Arena

Umwanditsi:

Twagira Wilson

Tanga Igitekerezo

Email yanyu ntigaragazwa ku rubuga. Amazina na Email ni ngombwa.