17°C , Thunderstorms | Kigali-Rwanda

Kagame yasangije Abanyanijeriya inkuru y’inkurikizi zo kudahemba neza abapolisi

Yanditswe na Nshimyumukiza Janvier Popote

Ku ya 11-06-2019 saa 14:25:34
Perezida Kagame na mugenzi we wa Nigeria Mumammadu Buhari, mu munsi mukuru wa Demokarasi, i Abuja

Perezida Kagame ari muri Nigeria mu ruzinduko rw’iminsi ibiri, aho yagejeje ijambo ku bitabiriye ibiganiro by’Umunsi Mukuru wa Demokarasi wibanze ku Kurwanya Ruswa, i Abuja. Yabasangije inkuru y’umupolisi wamusabye ikaramu.

Ntiyavuze uwo mupolisi niba ari uwo mu kihe gihugu, ariko yeruye ko ari uwo ku mugabane w’Afurika, ukora ku kibuga cy’indege, ndetse asobanura n’isomo yabikuyemo.

Yagize ati, “Hari ubwo twita cyane kuri ruswa zo mu buzima bwa buri munsi tukirengagiza indi ruswa ifite ingaruka nyinshi abantu babwirana bongorerana, kuko abakire n’abanyembaraga ari bo bayungukiramo.

Umunsi umwe narimo ngenda, tuza guhagarara ku kibuga kimwe cy’indege hano muri Afurika. Ubwo twarimo tunywesha (twongeramo benzine) nagiye hirya gato umupolisi aranyegera, ansaba akantu.

Yakomeje kureba mu gituza cyanjye, sinibukaga ko mfite ikaramu mu mufuka. Narayimweretse ambwira ko ari yo ashaka. Namenye icyo ashaka. Nasubiye inyuma mbaza abo twari kumwe niba hari ufite amafaranga, uwo mupolisi muha amafaranga na ya karamu.

Iyi nkuru nayibwiye abaminisitiri banjye, mbabwira ko iyo nkuru y’umupolisi itwigisha ko dusobora kuba dukenera umusaruro mwinshi ku mupolisi.

Abapolisi ntitubahemba neza, bityo bakajya kuzerera basabiriza, kandi hanyuma utabaha amafaranga akaba yakoresha imbunda ye mu kukugirira nabi.

Nubwo nk’igihugu tudafite byinshi ariko twasaranganya neza bike dufite ku buryo n’umupolisi yumva ko yitaweho.”

Perezida Kagame na mugenzi we wa Nigeria Mumammadu Buhari, mu munsi mukuru wa Demokarasi, i Abuja

Kurwanya ruswa bikwiye guhera mu bayobozi

Mu ijambo yavugiye muri uwo muhango, Perezida Kagame yagarutse ku bubi bwayo, avuga kandi ko kubaho kwayo gushingira ku kuba abayobozi bayiha urwaho.

Kuri we, urugamba rwo kurwanya ruswa rwatanga umusaruro mwiza habayeho kwimakaza “gukorera mu mucyo, ubunyangamugayo no kubazwa ibyo umuntu ashinzwe.”

Perezida Kagame yavuze ko kurwanya ruswa bihereye mu bayobozi, byatuma n’abaturage babyibonamo bityo bakajya bamagana abayobozi barya ruswa.

Umukuru w’u Rwanda yashimangiye ko ruswa iteza ibibazo byinshi mu nzego zitandukanye z’ubuzima bw’igihugu, ariko ko umuzi wayo uri mu kuba abayobozi bayijenjekera.

Ati, “Hari Umunyanijeriya wanditse igitabo gifite umutwe ugira uti; Kurwanya ruswa bigira inkurikizi, ampa kopi, namusabye kwandika ikindi kivuga ko kutarwanya ruswa bigira inkurikizi kurusha.”

Yunzemo ati, “Ubu ni ubukangurambaga bushobora gutanga umusaruro mwiza, kujenjekera ruswa ni amahitamo, si ibintu twavuga ko bidashobora kwirindwa, kandi biri mu bushobozi bwacu kubihagarika, naho ubundi gukomeza kubivuga tutabihagarika byaba ari uguta igihe.”

Perezida Kagame yavuze ko inzego z’ubuyobozi bw’igihugu zose zagakwiye gusenyera umugozi umwe mu gukumira no guhashya ruswa aho igaragaye, ati, “Ni inshingano z’abayobozi mu nzego zose, aho ruswa yabaye umuco, ni uko abayobozi ari ko baba babisaka.”

Umukuru w’u Rwanda yavuze ko nubwo bimeze bityo, ruswa atari umwihariko w’Afurika, ko ndetse ubushakashatsi bwagaragaje ko hamwe mu hagaragara ruswa nyinshi ari hanze y’Afurika.

Perezida Kagame yatumiwe ngo ageze ijambo ku bitabiriye ibirori by’umunsi wo kurwanya ruswa byibanze kuri ruswa yo mu matora, nk’umuyobozi w’u Rwanda, igihugu kimaze imyaka ibiri kiri muri bitatu bya mbere birimo ruswa nke muri Afurika.

U Rwanda ni na cyo gihugu cya mbere cyatangije uburyo bwa e-procurement, bwo gupiganira amasoko hakoreshejwe ikoranabuhanga, nk’uburyo bufasha mu kugabanya ruswa mu mitangire y’amasoko, mu mwaka wa 2016.

Ku munsi wa kabiri w’uruzinduko rwe muri Nigeria, Perezida Kagame biteganyijwe ko azitabira irahizwa rya Perezida Muhammudu Buhari watorewe indi manda mu matora yo muri Gashyantare uyu mwaka.

Bamwe mu bitabiriye uyu muhango wabereye mu Murwa Mukuru wa Nigaeria, Abuja, kuri uyu wa 11 Kamena 2019.

Umwanditsi:

Nshimyumukiza Janvier Popote

Tanga Igitekerezo

Email yanyu ntigaragazwa ku rubuga. Amazina na Email ni ngombwa.