Kagame yasabye abavoka ba EAC kureba igituma amwe mu masezerano atubahirizwa

Yanditswe na Rutayisire Emile

Ku ya 09-11-2019 saa 08:02:02
Perezida Kagame ageza ijambo rye ku bavoka bitabiriye iyi nama

Perezida Paul Kagame yibukije inshingano abavoka bo mu bihugu by’Afurika y’Iburasirazuba, EAC, bafite zo gukorera mu mucyo mu gushaka icyafasha abaturage batuye mu karere, bakazamura ubukungu bw’ibihugu byabo, bareba imbogamizi zihari zituma amwe mu masezerano ibihugu biba byarasinye adashyirwa mu bikorwa.

Ibi yabivuze ku wa Gatanu tariki ya 8 Ugushyingo 2019, ubwo yafunguraga Inama y’Ihuriro ry’Abavoka baturutse mu bihugu bigize Umuryango EAC ribaye ku nshuro ya 24. Ihuriro rihuriyemo Abavoka ibihumbi 19 baturuka mu bihugu birimo Sudani y’Epfo, Uganda, Kenya, Tanzania, u Burundi n’u Rwanda.

Umukuru w’Igihugu yagize ati “Muri mu mwanya mwiza wo kuba abavugizi b’ibyiza byo gushyiraho uyu muryango, murahamagarirwa kubaza za Guverinoma zigize EAC kubahiriza uburenganzira bw’abaturage bahuriyeho mu muryango wacu bagomba kwishimira.”

Ibi akaba yabivuze mu gihe hari bimwe mu bihugu bigize EAC bikomeje kubangamira urujya n’uruza rw’abaturage ba bimwe mu bihugu, harimo kubafunga abandi bakahasiga ubuzima.

Perezida Kagame avuga ku nshingano z’aba banyamategeko ko bakwiye kubaza za Guverinoma zigize EAC kujya zubahiriza uburenganzira bw’abaturage, yashimangiye ko EAC ari umuryango ufite ikerekezo cyo guhuriza hamwe ubukungu, avuga ko bimwe byamaze kugerwaho birimo guhuza imipaka, isoko rimwe n’ibindi, kandi ko buri kintu cyose gikorwa ari uko kiba gikurikije amategeko.

Agira ati “Hadashyizweho amategeko agenga ibi byose nta na kimwe cyajya mu ngiro. Ndabashimira uruhare rwanyu mu kwishyira hamwe kw’aka karere mu myaka 24 ishize, hari ibihe bikomeye byabayeho ariko mwakoreye hamwe, hazabaho ibindi bibazo ariko turabasaba gukomeza muri uwo mujyo mwatangiranye.”

Umukuru w’Igihugu ashima uruhare Abavoka bagera ku bihumbi 19 bagize iri huriro bakomeje kugira mu guteza imbere ukwihuza kw’ibihugu bigize EAC, yanabashimiye kuba barateguye iyo nama bagahitamo kuyizana mu Rwanda, ababwira ko ari igihugu cyakira buri wese.

Perezida w’Urugaga rw’Abavoka mu Rwanda, Me Kavaruganda Julien- Gustave, yatangarije Imvaho Nshya ko abari muri iyi nama baganira uko amategeko yo muri ibi bihugu yahuzwa kuko hari aho usanga bimwe mu bihugu bigize uyu muryango bigikoresha amategeko yo mu bihugu byabikoronije, bikaba imbogamizi ku bavoka bamwe bashaka kujya muri kimwe muri ibi bihugu.

Yavuze kandi ko bigira hamwe uko ikoranabuhanga mu mwuga w’Abavoka ryarushaho gutezwa imbere, no gushaka uko abagore bakora muri uyu mwuga baba benshi kuko ngo bakiri bake.

Ku mikorere y’Abavoka mu Rwanda, Kavaruganda avuga ko u Rwanda rwashyizeho uburyo bushobora gufasha abanyametegeko kuba bakwisanga mu bihugu byose, byaba ibyakoronije n’u Bufaransa cyangwa u Bwongereza.

Inyanganyamatsiko y’iyi nama ni “Uruhare rw’Abavoka mu iterambere ry’ubukungu bw’umuryango EAC”.

Umwanditsi:

Rutayisire Emile

Tanga Igitekerezo

Email yanyu ntigaragazwa ku rubuga. Amazina na Email ni ngombwa.