23°C , Intermittent clouds | Kigali-Rwanda

Kagame yasabye abaganga gutanga serivisi nziza birinda amakosa mu mwuga

Yanditswe na Mutungirehe Samuel

Ku ya 07-11-2019 saa 20:23:00
Perezida Kagame aganira n'abashinzwe n'abitabiriye ibi biganiro kuri uyu wa Kane tariki 7 Ugushyingo 2019

Perezida Paul Kagame yahuye n’abakora mu mwuga wo kuvura abantu, abaganga n’abayoboye ibitaro bya Leta n’ibyigenga baturutse mu gihugu hose bagera kuri 800, abasaba gutanga serivisi nziza kuri buri wese, batitaye ku rwego ariho kandi bakamenya gukoresha ubushobozi buhari mu mwuga wabo.

Ni ibikubiye mu kiganiro yagiranye nabo, kuri uyu wa Kane i Kigali ubwo basuzumaga imbogamizi zikiri mu rwego rw’ubuvuzi n’uko zakemuka.

Perezida Kagame yababwiye ko umwuga wo kuvura abantu ugengwa n’amategeko n’amabwiriza azwi kimwe n’indi myuga ariko abibutsa ko uko uwukoramo yitwara ari byo bigaragaza uko awumva.

Yabibukije ko igihe amahame y’umwuga adakurikijwe neza bitera ibibazo byinshi, abibutsa ko umuntu ushaka imibereho myiza muri uwo mwuga agomba kurangwa n’indangagaciro zimugaragaza uwo ari we bigatuma agera ku ntego.

Akomeza agira ati “Biri no mu buryo ubana n’abantu muri sosiyete. Uri umunyamwuga, ubona umushahara kandi utewe ishema n’ibyo ukora igihe uhuye n’abantu, abarwayi n’imiryango yabo, ufite inshingano nk’umunyamwuga.

Uzi icyo igihugu cyawe gishobora gutanga kandi ushobora gutandukanya ko hari ibintu bidahari atari gusa ko umuntu yaguhaye agaciro gake ahubwo atari uko bitaraboneka mu bushobozi bwacu. Inshingano zanyu ni ukuzamura ubunyamwuga no kwiga uko ugereranya ibyo ukenera byawe by’ibanze n’ibyo abo uha serivisi bakenera by’ibanze. Ugomba kugira imyumvire ko ibintu bitangirira kuri wowe, ntugomba kwicara ngo utegereze abandi ngo bakubwire ko ibyo urimo gukora ari bibi, bitajyanye. Nturi umuswa.”

Perezida Kagame yasabye abatanga serivisi z’ubuvuzi kurangwa n’ubunyamwuga

Umukuru w’Igihugu yakomeje abagaragariza ingero zimwe na zimwe z’ibyo abakora mu rwego rw’ubuvuzi bakwiye kwirinda no kwitondera bakarushaho gutanga serivisi kuri bose kandi nziza, abasaba gukosora ibishobora gukosoka, abasaba kandi kwereka abaturage impinduka ziri mu buvuzi Igihugu kigezeho babigaragariza mu bikorwa kuruta amagambo.

Ati “Uburyo bwiza bwo gukemura ikibazo ni ukugerageza kuvuga ko hari ikintu twahindura, bigatangirira kuri nge, nkeneye kwisuzuma ubwange ndebe niba nshobora guhindura ngashyiramo imbaraga.”

Minisiteri y’Ubuzima Dr. Diane Gashumba yagaragaje uko urwego rw’ubuzima ruhagaze kugeza ubu, aho umubare w’abaganga mu bitaro bya Leta n’ibyigenga ari 1464. Abaganga basanzwe (General Practitioners) ni 751 ndetse n’abaganga b’inzobere 504. Hari kandi abaganga bari mu kiciro cya gatatu cya Kaminuza bimenyereza umwuga mu bitaro bagera kuri 209. Ibyo bigaragaza ko mu gihugu cyose hari umuganga umwe ku baturage 8.197.

Umubare w’abaforomo wavuye ku muforomo 1 ku baturage 1.291 muri 2010 ugera ku muforomo 1 ku baturage 1.094 muri 2017. Umubare w’ababyaza wavuye ku mubyaza 1 ku baturage 66.749 ugera ku mubyaza 1 ku baturage 4.064 muri 2017.

Ubu bwiyongere bwatanze umusaruro kuko imfu z’ababyeyi zigabanuka ku kigero cya 75% naho iz’abana zigabanuka ku kigero cya 79% mu myaka 20 ishize. Mu gihugu cyose hari Abajyanama b’ubuzima 58.445.

Umwanditsi:

Mutungirehe Samuel

Tanga Igitekerezo

Email yanyu ntigaragazwa ku rubuga. Amazina na Email ni ngombwa.